Dual Panel1Kiu’rangi laloi, o Batara apa kajarianga mae ri kambe. Kiciniki laloi anne ikambe, Kiciniki antekamma tunanamo ikambe.
2Barang-barang warisi’na ikambe naallemi tau maraeng, balla’na ikambe tau maraemmi ampammantangngi.
3Manggena ikambe nibunomi ri musua; jandami amma’na ikambe ki’jarimo tau kukang.
4Manna je’ne’ inung siagang kayu tunuang musti naballi ngasemmi ikambe.
5Rapang olo’-olo’ nipassai ikambe anjama battala’, mangngangi ikambe, mingka tanikellaiaki’ ammari-mari.
6A’lampai ikambe appala’-pala’ ri Mesir, appala’-pala’ kanre ri Asyur.
7Dorakai boe-boena ikambe, anne kamma tenami ke’nanga; mingka musti ballasaki ikambe lanri dosa-dosana ke’nanga.
8Niparentai ikambe ri tau siratanga a’jari ata; natena tau makoasa allappassangi ikambe battu ri kakoasanna ke’nanga.
9Pantaranna kotaya, jai pabuno tau a’jappai; tuli a’reppeseki bala kamateanga ri wattu a’boyana kanre ikambe.
10Sessai ikambe napakamma cipuru’ sa’genna kamma a’barami bukkulenna ikambe rapang pappalluang.
11Tubai’-bainea ri Sion nigau’ bawangi nigau’ salai tuloloa ri desa-desa Yehuda.
12Pamimping-pamimpinna ikambe nijakkalaki nampa nigentung, tau-tau toana ikambe tenamo nanipakalompoi.
13Nipassai turungkana ikambe anjama battala’ ri panggilinganga, ana’ bura’nea niutungi ri kayu pisanganna sa’genna kodi nasa’ring.
14Tenamo nasse’re tau toaya ri pakke’bu’ lompona kotaya, tenamo nilangngere’ musi’ battu ri tau rungkaya.
15Tenami tallasa’ mate’nea ri kambe; tappinrami joge’-jogeka a’jari kasusaang.
16Tenami kalompoanna ikambe cilakami ikambe napakamma doraka.
17Sinomi Bulu’ Sion lanri nibokoi; kongkong romang mami a’lemere’ anjoreng. Lanri kammana panra’ lompomi atinna ikambe, tabajikami paccini’na ikambe napakamma angngarruka tojeng.
18(5:17)
19Mingka iKatte, o Batara, tuli makoasa, iKatte ammarenta satunggu-tungguna.
20Angngapa Kisallo kamma ambokoi ikambe? Maka tuli latakkaluppa maKi’ mae ri kambe?
21O Batara, allemi ikambe ammotere’; eroki ikambe ammotere’ mae ri Katte! Kipoterammi tallasa’na ikambe sangkamma riolo.
22Yareka Kipela’ tojeng-tojemmi ikambe? Maka tenamo sanggana larroTa mae ri kambe?