Dual Panel1Punna nia’ sapina yareka gimbala’na julu bansanu lingu, nampa nucini’ anjo olo’-oloka, teako assara-sarai tanuassenga, mingka erangi anjo olo’-oloka ammotere’ mange ri patanna.
2Punna bellai balla’na anjo patanna, yareka punna tanuassenga angkana inai patanna, erangi anjo olo’-oloka mae ri balla’nu. Punna battu patanna amboyai, passareangi anjo olo’-oloka mae ri ia.
3Kamma tomminjo musti nugaukang punna ammuntulukko keledai, pakeang, yareka apa-apa mamo ri barang-baranna julu bansanu.
4Punna nia’ keledaina yareka sapina julu bansanu anra’ba ri aganga, teako assara-sarai tanuassenga, mingka tulungi nanupabangungi ammotere’ anjo olo’-oloka.
5Tubainea takkulleai ammakeang sangkamma tu bura’ne, siagang tu bura’nea takkulleai ammakeang sangkamma baine, nasaba’ anjo tau appanggaukang kammaya taningaiyai ri Karaeng Allata’alanu.
6Punna nia’ nubuntulu’ ru’mung jangang-jangang ri poko’ kayua yareka ri buttaya siagang anrong jangang-jangang sitabang angngoppoki bayaona yareka angngoppoki ana’-ana’na, teako allei anjo anrong jangang-janganga.
7Akkullei nualle ana’na anjo jangang-janganga, mingka lappassangi nanri’ba’ anronna, sollanna la’bu umuru’nu siagang salewangang ri tallasa’nu.
8Punna ambangungko balla’, musti apparekko kalli’ ri tammulilina biring pattongko’na anjo ballaka. Jari tena nanibattalliko punna nia’ tau tu’guru’ battu rate ri pattongko’na anjo ballaka sa’genna mate.
9Teako a’lamungi lamung-lamungang maraeng ri koko anggoro’nu pantaranganna poko’ anggoroka. Punna kamma nulamunginna, takkulleai nuallei wassele’na anjo kokoa, baji’ na anggoro’, kammayatompa lamungang maraengannaya.
10Teako appa’bali sapi siagang keledai ri se’rea pa’jeko.
11Teako ammakei pakeang nipasitannunga battu ri kaeng wol siagang kaeng lenang.
12Papakei rombeng-rombeng ri appaka cappa’na pakeannu."
13"Ebara’ angkana nia’ bura’ne taerokami ri bainenna,
14nampa appare’ tuduhang takontutojeng angkanaya anjo bainenna tenamo natulolo ri wattunna a’bunting ke’nanga.
15Punna kamma anjo passalaka, tutoana anjo bainea musti naallei baju buntinna anjo ana’na niaka bate cera’na akkullea ampa’nassai angkanaya tulolo iji anjo ana’na ke’nanga anjo wattua. Musti napappicinikangi ke’nanga anjo pakeanga ri pangadelanga mae ri sikamma tau-tau toana kotaya.
16Angkanai manggena anjo bainea mae ri ke’nanga, ‘Le’ba’mi kupassareang anakku mae ri anne taua untu’ a’jari bainenna, mingka kamma-kamma anne taerokami ri ia.
17Appareki tuduhang takontutojeng mae ri anjo bainenna angkanaya tenamo natulolo ri wattunna a’bunting ke’nanga. Mingka anne buttina angkanaya ma’nassa tulolo iji anakku anjo wattua. Parhatikammi bate ceraka ri anne pakeang buntinga!’
18Na anjo sikamma tau toa-toana kotaya musti nakioki bura’nenna anjo bainea nampa naba’ji.
19Musti napassala tongi ke’nanga anjo bura’nea sibilangngang doe’ pera’ nampa napassareang anjo doeka mae ri matoanna, lanri le’ba’namo napanraki areng baji’na se’rea tubaine Israel. Nampa pole anjo bainea musti tuli nabaineangi, siagang takkulleai nisa’la’ ri bainenna lalang sikontu tallasa’na.
20Mingka ebara’ angkana kammatojengi anjo tuduhanga, siagang tena butti angkanaya ma’nassa tulolo iji anjo bainenna ri wattunna a’bunting ke’nanga,
21anjo bainea musti nierangi mange ri pakke’bu’ balla’na tau toana. Anjoreng ri tampaka musti nisambilai siagang batu anjo bainea ri tubura’-bura’nea ri anjo kotaya sa’genna mate. Anjo bainea le’baki ampanggaukang appakasirika mae ri bansata lanri nagaukanna assikatinroanga siagang bura’ne ri tenanapa na’bunting, ri wattu ammantanna ija ri balla’na manggena. Lanri nihukkunna anjo bainea nupaccappu’mi anjo kaja’dallang kammaya.
22Punna nia’ bura’ne nirapikang assikatinroang siagang baine maraeng, musti nihukkung mate rua-ruai. Kammaminjo carana nanupaccappu’mo anjo kaja’dallang kammaya.
23Ebara’ angkana ri se’reang kota nia’ bura’ne nirapikang assikatinroang siagang se’re tulolo le’bakamo nipa’bayuang siagang bura’ne maraeng.
24Punna kamma anjo passalaka, musti nierangi anjo ke’nanga assulukang ri pantaranna kotaya nampa nisambila batu sa’genna mate. Anjo tuloloa musti nibunoi lanri tenana nakkio’ appala’ tulung, nasaba’ anjo passalaka lalangi ri kotaya kajariang, jari akkullei nilangngere’ sa’ranna punna akkioki. Nampa anjo bura’nea musti nibunoi lanri assikatinroanna siagang tulolo le’bakamo nipa’bayuang siagang bura’ne maraeng. Lanri nihukkunna anjo tau ruaya, nupaccappu’mi anjo kaja’dallanga.
25Mingka maraeng tongi passala’na punna nia’ bura’ne ampassai se’rea tulolo untu’ angngagangi assikatinroang ri se’reang koko nampa anjo tuloloa le’ba’mi nipa’bayuang siagang bura’ne maraeng. Punna kamma anjo passalaka, musti bura’neaji bawang nihukkung mate.
26Anjo tuloloa takkulleai niapa-apa, lanri tenana nagaukangi apa siratanga nanihukkung matei. Anjo parkara kammaya sangkammai parkarana punna nia’ tau ambakkai paranna tau nampa nabuno.
27Anjo bainea anjorengi ri kokoa nipassa nigau’ bawang, siagang manna pole akkioki anjo tuloloa appala’ tulung, mingka tena tau akkulle battu antulungi.
28Ebara’ angkana nia’ tu bura’ne nirapikang ampassai se’rea tulolo assikatinroang, nampa anjo tuloloa tenapa bayuanna.
29Punna kamma anjo passalaka, anjo tu bura’nea musti a’bayaraki mae ri manggena anjo bainea iamintu sangkamma jaina doe’ panai’, iamintu limampulo doe’ pera’, nampa musti nabaineangi anjo tuloloa lanri le’ba’namo napassa assikatinroang siagang ia. Lalang tallasa’na takkulleai natalla’ anjo bainea.
30Tena manna sitau akkulle anghinai manggena lanri assikatinroanna siagang kalase’renna bainenna anjo manggena."