Dual Panel1"Pilangngeri sikamma sari’battangku ngaseng! Anne alloa a’limbangko untu’ ampantamakki daerana bansa-bansa la’bi lompoanganga siagang la’bi kassakkangnganga naikau. Kota-kotana ke’nanga lompo-lompo ngasengi, siagang tinggi tembo’ pattahanganna sanrapang tinggina langika.
2Taunna lompo ngasengi pakkaleanna; anjo ke’nanga rapangi rassasa, nampa nulangngere’mi angkanaya tena tau akkulle angngewai ke’nanga.
3Mingka kamma-kamma anne ikau kalennu lanciniki antekamma bateNa Karaeng Allata’alanu a’jappa ri dallekannu rapang pepe’ appakamutunga. LaNabetai ke’nanga ri dallekang matannu, sa’gennu akkulle ambongkai ke’nanga siagang angngancuruki silalonna ke’nanga sangkamma Napa’janjianga Batara.
4Punna le’baki Karaeng Allata’alanu ambongkai ke’nanga untu’ ikau, teako sala pahangngi angkanaya Naerangko mange anjoreng untu’ ampatangi anjo buttaya lanri baji’nu siagang nugaukanna ero’Na Karaeng Allata’alanu, sa’gennu siratang antarimai anjo buttaya. Tena sikali nakamma anjo! Nabongkai Batara anjo bansa-bansaya untu’ ikau lanri ja’dala’na ke’nanga. Nalappassangko Batara angngallei buttana ke’nanga, lanri ero’Na anrupai janjinNa mae ri boe-boenu iamintu Abraham, Ishak siagang Yakub.
5(9:4)
6Tappa’ mako angkanaya teai passabakkang siratannu antarimai anjo butta copponga na Napassareang mae ri kau. Tena! Nasaba’ ikau anne bansa kapala batuko.
7U’rangi antekamma batenu ampakalarroi Karaeng Allata’alanu ri parang lompoa. Baku’ nubokoina Mesir sa’gennu battu mae anrinni, tena numannuruki mae ri Batara.
8Ba’lalo le’baki nupakalarro sikali Batara ri Moncong Sinai, sa’genna eroki angngancurukko.
9Angngambikka’ nai’ ri anjo buluka untu’ annarima batu parjanjiang Napareka Batara siagang ikau. Patampulo allo siagang patampulo bangngia’ ammantang irate ri anjo monconga tangnganre tangnginung.
10Nampa Nasarea’ Batara rua batu le’baka Natulisi’ Allata’ala KalenNa. Natulisiki ri anjo batua kana-kana Napabattua mae ri kau battu lalang ri tangnga-tangngana pepeka mae ri kau, ri wattunnu asse’re ri bangkenna monconga.
11Ri allalonamo patampulo allo siagang patampulo bangngi, Napassareammi Batara anjo ruaya batu parjanjiang mae ri nakke.
12Nampa Nakana Batara mae ri nakke, ‘Naungko linta’, nasaba’ anjo bansanu nueranga assulu’ battu ri butta Mesir a’gau’ ja’dala’mi. Ammengkami ke’nanga battu ri parenta-parentaKu, siagang appare’mi patung untu’ nasomba.’
13Nakana pole Batara ri nakke, ‘Kuassengi angkana teai sipato’ kapala batuna anjo bansaya.
14Teako coba-cobai anrompaiA’. ErokKa’ angngancuruki ke’nanga sa’genna nikaluppaimo ke’nanga. Mingka ikau laKupa’jariko mangge ri se’reang bansa lompoangnganga siagang kassakangnganga naanjo ke’nanga.’
15Nampa kugilimmo kalengku, nampa naumma’ battu ri anjo moncong sitabanga a’rinra-rinra, siagang kuerang tommi anjo ruaya batu parjanjiang, kuta’gala’ siagang rua limangku.
16Kurapikang mako sitabang andakkai parentaNa Karaeng Allata’alanu. Doraka mako mae ri Batara lanri nupapparekanna kalennu se’re patung sapi.
17Jari kupatappasa’mi anjo ruaya batu parjanjiang sa’genna ancuru’ ri dallekanna ngaseng matannu.
18Nampa su’ju’ma’ pole sikalipi ri dallekanNa Batara irate ri coppo’na monconga patampulo allo siagang patampulo bangngi, tamangnganre tangnginung. Nakugaukang anjo kammaya lanri doraka mako mae ri Batara nasaba’ nugaukannamo apa ja’dalaka ri dallekanNa, sa’genna a’jari larro.
19Inakke mallakka’ ri larroNa Batara a’rinra-rinraya mae ri kau ngaseng sa’genna ero’mi angngancuru’ ngasengko; mingka anjo wattua Napilangngeri ija’ Batara.
20Larro dudu tongi Batara mae ri Harun sa’genna eroki Nabuno; mingka kupappala’ doangngang tongi.
21Anjo patung sapi nupareka, kupasambilai antama’ ri pepeka. Nampa kuancuru’ siagang kudengka sa’genna alusu’ sangkamma limbu’bu, nampa kupasambila anjo limbu’buka antama’ ri kaloro’ a’lo’loroka battu ri anjo monconga.
22Kammayatompa ri Tabera, ri Masa siagang ri Kibrot-Taawa, nupakanassui Batara.
23Nampa ri wattunnu nisuro ri Batara ambokoi Kades-Barnea untu’ maju siagang mange ampammantangngi butta laNapassareanga mae ri kau, nutumpaki parentaNa Karaeng Allata’alanu; taerokako tappa’ yareka mannuruki mae ri Ia.
24Baku’nu kuasseng, tuli tenana numappilangngeri mae ri Batara.
25Kuassengi angkanaya ero’ tojeng-tojengi Batara angngancurukko. Jari su’ju’ma’ ri dallekanNa Batara patampulo allo patampulo bangngi,
26siagang appala’ doamma’ angkana, O, Batara Kaminang Tinggia, tea’ laloKi’ ancuruki anne umma’ KalenTa, bansa le’baka Kilappassang siagang Kiantaraka assulu’ battu ri butta Mesir lalang kagassingang siagang kakoasang malompoTa.
27Kiu’rangi ata-atanTa Abraham, Ishak siagang Yakub, siagang teaKi’ jampangi anjo sipa’ kapala batuna, yareka kaja’dallanna siagang dosana anne bansaya.
28Punna tena taKiancuru’na ummatTa, nakanamo sallang tu Mesirka angkanaya tena Kimampu angngerangi bansaTa mange ri pa’rasangang Kipa’janjianga mae ri ke’nanga. Ba’lalo nakana sallang ke’nanga Kierangi anjo ke’nanga mange ri parang lompoa untu’ Kibuno lanri Kikabirissinna ke’nanga anjo bansaTa.
29Mingka Kiu’rangi laloi, o Batara, angkanaya anne ke’nanga bansa Kipile a’jari ummatTa, siagang Kierangi battu ri Mesir lalang kagassingang siagang kakoasang malompoTa."