Dual Panel1Nampa accinika’ mae ri pattongko’ niaka irateanna ulunna anjo sikamma malaeka’ akka’nyika, na nia’mo kucini’ apa sangkamma empoang kakaraengang nipareka battu ri batu nilang.
2Nampa Nakana Allata’ala ri anjo tau ammakeang lenanga, "Antamakko ri alla’na roda-roda niaka irawanganna anjo malaeka’-malaeka’ akka’nyika siagang angngalleko sikangkang bara pepe’. Nampa pakioroki anjo bara pepeka mae ri kotaya." Mannurukimi, siagang kuparhatikangi anjo tau ammakeang lenanga.
3Ri wattunna antama, anjo sikamma malaeka’ akka’nyika sitabangi ammenteng ri timboranna Balla’Na Batara. Nia’ sipa’gompoang rammang antongkoki paranglakkeng bageang lalanga siagang sikontu Balla’Na Batara.
4Caya accilla’, iamintu pammatei kahaderanNa Batara, tassioroki battu ri anjo sikamma malaeka’ akka’nyika siagang a’letteki mange ri pakke’bu’ antamaya ri Balla’Na Batara, sa’genna a’jari singara’ sikali paranglakkenna.
5Sa’ra pakkape’na ka’nyi’na anjo sikamma malaeka’ akka’nyika kalangngerangi sa’genna ri paranglakkeng pantaranga, rapang sa’ranna Allata’ala Kaminang Koasaya.
6Le’baki Nasuro Batara anjo tau ammakeang lenanga angngalle sikangkang bara pepe’ battu ri alla’na roda-roda rawanganna anjo sikamma malaeka’ akka’nyika, antama’mi anjo taua nampa ammenteng ri sa’rinna kalase’renna anjo roda-rodaya.
7Nampa kalase’renna anjo malaeka’ akka’nyika napantamaki limanna ri pepe’ niaka ri tangnga-tangngana ke’nanga, anrappung pirang polong are bara pepe’, nampa napassareang mae ri anjo tau ammakeang lenanga. Anjo taua naallemi anjo bara pepeka nampa a’lampa.
8Kuciniki irawanganna tunggala’ ka’nyi’na anjo malaeka’ akka’nyika nia’ apa kamma lima tau.
9Kucini’ tongi angkanaya anjo malaeka’ akka’nyika massing nia’ tasse’renna roda ri sa’rinna. Anjo appaka roda sangkammai tanja’na, accillaki rapang paramata ga’ga. Massing nia’ roda maraenna, ia tappalanga ri tangnga-tangngana.
10(10:9)
11Lanri kammana anjo, akkullei anjo malaeka’-malaeka’ akka’nyika a’lampa mange ri appa’ sulapa’. Akkullei ke’nanga a’lampa kemae-kemae situru’ pangngainna, natanagilinga kalenna.
12Sibatu kalenna ke’nanga, salangganna, limanna, ka’nyi’na siagang roda-rodana, rassi kabusuki mata.
13Kulangngereki angkanaya anjo roda-rodaya niarengi "anging tapputara’".
14Tunggala’ anjo malaeka’ akka’nyika massing appa’ rupanna, tenaya nasangkamma-kamma rupanna. Rupanna uru-urua iamintu attanja’ kammai sapi liara’, makaruaya attanja’ sangkammai tau, makatallua attanja’ sangkammai singa, siagang makaappaka attanja’ sangkammai jangang-jangang rajawali.
15Iaminjo malaeka’-malaeka’ akka’nyi’ kucinika riolo ri birinna Binanga Kebar. Punna a’gio’ yareka napaka’rang ka’nyi’na anjo malaeka’-malaeka’ akka’nyika, nai’ ri allaka siagang anri’ba’ mae ri dallekang yareka ammantang, tuli amminawangi anjo roda-rodaya, lanri nikoasai ri anjo malaeka’-malaeka’ akka’nyika.
16(10:15)
17(10:15)
18Nampa caya accillaka, iamintu pammatei kahaderanNa Batara, nabokoi pakke’bu’ antamaka ri Balla’Na Batara siagang a’letteki nai’ ri anjo malaeka’-malaeka’ akka’nyika.
19Kuciniki anjo malaeka’-malaeka’ akka’nyika napaka’rang ka’nyi’na siagang anri’ba’ ambokoi buttaya nampa a’lampa, siagang amminawangi roda-rodana. Nampa ammantang ke’nanga ri ampi’na pakke’bu’ lompona balla’Na Batara ri bageang iraya; nampa anjo caya accillaka tuli nia’na irateanna ke’nanga.
20Kuu’rangimi angkanaya iaminjo malaeka’-malaeka’ akka’nyi’ kucinika riolo, niaka irawanganna Allata’alana Israel, ri biranna Binanga Kebar.
21Anjo malaeka’-malaeka’ akka’nyika massing appa’ rupanna, ruampasang ka’nyi’na, siagang massing nia’ nicini’ kamma lima tau irawanganna anjo ka’nyi’na.
22Rupanna ke’nanga sangkamma tongi siagang rupanna anjo malaeka’-malaeka’ akka’nyi’ kucinika ri birinna Binanga Kebar. Massing a’jappa lambusuki mae ri dallekang.