Dual Panel1"He tau, ammentengko. ErokKa’ a’bicara siagang ikau."
2Ri wattunna kulangngere’ anjo sa’raya, antama’mi RohNa Allata’ala ri kalengku, nampa Napabangunga’ nai’. Nampa kulangngere’ pole anjo sa’raya angkana,
3"He tau, ikau Kusuroko mange ri tu Israel angngewaya ri Nakke. Anjo ke’nanga angngewai sangkamma boe-boena ke’nanga.
4Kapala batui ke’nanga siagang tena napakalompoA’. Kusuroko mange ri ke’nanga untu’ ampabattui kanangKu, iamintu iNakke Batara Kaminang Tinggia, mae ri ke’nanga,
5apaka napilangngeri ke’nanga yareka tena; ia parallua, iamintu musti naassengi ke’nanga angkanaya nia’ na’bi ri tangnga-tangngana ke’nanga.
6Mingka ikau, he tau, teako mallakki mae ri anjo tau paewaya, yareka mae ri manna apa pole nakana ke’nanga. Lanaewako siagang lanahinako ke’nanga, sa’gennu rapangko tau attallasaka ri tangnga-tangngana olo’-olo’ niaka racunna punna angngokko’. Mingka manna nakamma teako mallakki.
7Pabattui sikontu pasangKu mae ri ke’nanga, apaka eroki yareka teai ke’nanga ampilangngeri. U’rangi angkanaya anjo ke’nanga tau paewa-ewa.
8He tau, pilangngeri apa Kupaua mae ri kau. Teako amminawangngi tongi angngewa. Sungkei bawanu siagang kanrei apa Kupassareanga mae ri kau."
9Nampa nia’ kucini’ lima ta’jonjo mae ri nakke. Lalang ri anjo limaya nia’ kitta’ nigulung,
10niaka tulisang ri rua-rua sa’rinna. Nampa nasungke anjo gulunganga siagang nia’ tattulisi’ anjoreng piraung, karru’ siagang kunrareng.