Dual Panel1Nakana Batara Kaminang Tinggia ri nakke, "He tau, akkelongko lagu untu’ nitarawanna Tirus, kota biring tamparang a’dangganga siagang panduduka ri sikontu biring tamparanga; kamma anne kelonna: O Tirus, tampoko akkana kamma anne, ‘Ga’gaku tena callanna!’
2(27:1)
3(27:1)
4Tamparang lompoa rapangi balla’ mae ri kau. Nibangungko rapang kappala’ ga’ga.
5Rinrinnu kayu arasa’ battu ri Bulu’ Hermon benteng sombala’nu kayu camara battu ri Libanon.
6Sikamma pa’bisenu, kayu-kayu lompo battu ri Basan nipare’. Dapara’nu kayu camara nipare’, battu ri pulo Siprus kabattuanna, belo-belona battu ri gading ka’jalaka anggaranna.
7Sombala’ siagang areng pammateinu battu ri kaeng lenang nipare’, pare’ Mesir, a’rupa-rupa sulanna. Tamaka alusu’na bahanna tenda-tendanu, kaeng battu ri Siprus, cura’ lame butung.
8Pabisenu battu ri Sidon siagang Arwad. Ana’-ana’ bua kalennu sangnging pasombala’ pore.
9Tukang-tukang kayu anjamaya ri kappala’ iamintu panre battu ri Gebal. Battu ri tunggala’ pa’rasangang battu kappalaka ero’ angngagangko a’danggang.
10Tantara-tantara battu ri Persia, Lidia siagang Libia antamaki ri tantaranu. Nagentungi ke’nanga pannangkisi’na siagang topi bajana ri tembo’-tembo’ kotanu. Le’ba’ mako nabantu ke’nanga ambetai musu-musunnu siagang pila’ katambangi masahoro’nu.
11Tantara battua ri Arwad a’jaga ri tembo’-tembo’nu; sikamma menaranu nijagai ri tau battua ri Gamad. Pannangkisi’na ke’nanga ta’gentungi a’jiji’-jijiri’ ri tembo’nu. Iaminjo ke’nanga antambai kaga’gannu.
12Nubalukangi anjo barang-barang danggangannu alla’bi-la’bia ri Spanyol; na salaku ballinna annarima mako pera’, bassi, tima kebo’, siagang tima le’leng.
13A’danggangko mange ri Yunani, ri Tubal, siagang Mesekh; na salaku ballinna annarimako battu ri ke’nanga iamintu siapa are tau ata siagang barang-barang tambaga.
14Nupassambei barang-barannu siagang jarang kareta, jarang dongkokang siagang keledai battu ri Bet-Togarma.
15Pandudu’na Rodus a’danggang tongi siagang ikau kammayatompa pandudu’na daera biring tamparanga naballi barang-barannu siagang gading siagang kayu le’leng.
16Padanggang battua ri pa’rasangang Siria naballi barang-barang danggangannu siagang anjo wassele’nu jaia. Nabayarakko ke’nanga siagang paramata battu ri batu samru’, kaeng cura’ eja na lame butung, kaeng sulang, lenang alusu’, paramata battu ri batu korala’ siagang batu eja delima.
17Yehuda siagang Israel napassambei barang-barang danggangannu siagang gandung, je’ne’ bani, minynya’ zaitun, siagang rampa-rampa.
18Pandudu’na Damaskus naballi barang-barang danggangannu siagang wassele’nu na nabayarakko siagang anggoro’ battu ri Helbon, bulu gimbala’ battu ri Sahar, bassi de’de’ siagang rampa-rampa.
19(27:18)
20Pandudu’ Dedan nabayaraki barang-barannu siagang kaeng-kaeng pa’lapa’ dongkokang.
21Tu Arab siagang ammarentaya ri butta Kedar naballi barang-barannu siagang ana’ gimbala’, gimbala’ laki siagang bembe.
22Untu’ amballi barang-barannu sikamma padanggang battua ri Syeba siagang Raema angngerangi paramata-paramata, bulaeng, siagang rampa-rampa kaminang bajika.
23Kota-kota Haran, Kane, Eden, sikamma padanggang battua ri Syeba, kota-kota Asyur siagang Kilmad, yangasenna a’danggangi siagang ikau.
24Nabalukangi ke’nanga mae ri kau pakeang ga’gaya, kaeng cura’ eja siagang lame butung, kaeng sulang, permadani-permadani sangka’ rupaya cura’na, kammayatompa sikamma otere’ kassaka.
25A’rurung-rurungi kappala’ lompoa angngerangi barang-barang danggangannu. Rapangko kappala’ tarraka luranna, kappala’ assombali tamparang lompoa.
26Sikamma pabisea angngerangko mae ri tamparang luaraka. Nilappoko ri anging battu raya sannaka lompona.
27Sikontu barang-barang danggangannu nuluranga, sikontu pasombalaka siagang ana’ buanu, sikontu tukang kayu siagang padanggannu tunggala’ tantara ri anjo kappalaka, lanynya’ kabusuki tallang ri wattunnu tallang siagang kappala’nu.
28Sikamma pakappala’nu ammarrangi napakamma malla’ nilangngereki accalli’ ke’nanga ri biring-biring tamparanga.
29Kamma-kamma anne nibokoimi anjo kappalaka, sikontu pakappala’nu naiki ri bontoa.
30Nakarruki ke’nanga sarennu, akkunrareng nappiraung pacce nyawana. Appakioroki au ri ulunna ke’nanga anggulung ri limbu’bu’ tanra susana.
31Lanri ikau nanagondolo’ ulunna ke’nanga, ammake kaeng karung susa dudu. Angngarruki ke’nanga pacce nyawana angkarruki sarennu.
32Nampa akkelong ke’nanga se’re lagu untu’ tunitarawang, angkana, ‘O Tirus, inai ampasangkammaiko? O Tirus, kamma-kamma anne tamakkana-kanako lalang tamparang.
33Ri wattunna nusombali tamparang lompoa siagang lurang tarraka bonena, nupirassi sikamma paralluna bansa-bansaya; sikamma karaenga nupa’jari kalumanynyang ngaseng.
34Kamma-kamma anne tallang mako, ancuru’ rawanganna tamparanga. Kabusu’ ana’ buanu siagang sikontu luranga sipa’lanynyakkang ikau ri tangngana tamparang.’
35Sikontu tau ammantanga ri biring tamparanga annekkereki allangngereki sarennu. Manna karaeng-karaenna ke’nanga sanna’ todong malla’na; anjo malla’na ke’nanga a’nassai ri rupanna ke’nanga.
36Ikau lanynyakko sa’genna satunggu-tungguna. Sikamma padangganga ri sikontu linoa a’jari gegereki lanri malla’na ke’nanga langkasia’ tongi sare kammaya anjo."