Dual Panel1Nakana Batara ri nakke,
2"He tau, tunrai Gog, iamintu karaeng battua ri pa’rasangang Mesekh siagang Tubal ri butta Magog.
3Paui mae ri ia angkana iNakke, Batara Kaminang Tinggia, musunna.
4LaKupalekkoi, laKupitabai pakkai’ cango-cangona, nampa Kupasinta’ assulu’ siagang sikontu pasukanna. Jai sikali pasukang a’jaranna, ammakeang sangkamma-kammaya. Tunggala’ tantarana massing angngerangi pannangkisi’ siagang pa’dang.
5Nirurungangi karaenga ri tantara-tantara Persia, Sudan siagang Libia, massing angngeranga pa’dang siagang topi baja.
6Sikontu tantara pejuang battua ri pa’rasangang Gomer siagang Bet-Togarma wara’, majui siagang ia, kammayatompa jai bansa maraeng amminawang todong maju.
7Suroi sadia-sadia siagang parentakangi tantara naaganga assita’gala’ sollanna sadia attayang komando.
8Tena siapa taung sallona naKusuro maju ambunduki se’reang pa’rasangang siagang pandudu’ le’baka nipa’rappung ammotere’ battu ri alla’na bansa-bansaya nampa ammantang ri anjo pa’rasanganga siagang amang. Lanaempoi Gog daera monconna Israel, iamintu salloamo sino siagang a’jari loro, mingka kamma-kamma anne nipammantangngimi ri ra’ya’ amanga katallassanna.
9Ia siagang tantarana siagang jaia bansa anrurungangi labattui ambunduki, rapang anging lompo battua ambunduki siagang rapang rammang antongkoki sikontu anjo pa’rasanganga."
10Nakana Batara Kaminang Tinggia ri Gog, "Anjo wattua lapparekko rancana ja’dala’.
11Lanupattantui untu’ ambunduki anjo pa’rasangang tenaya pattahanganna, pandudu’ attallasaka siagang amang na sannang ri kota-kota tenaya nammake tembo’ siagang tenaya nammake pattahangngang.
12Lanuellaki siagang lanurampasaki barang-baranna anjo pandudu’na kota a’jari loroa pirangalloang. Pandudu’na nipasse’rea battu ri a’rupa-rupaya bansa, kamma-kamma anne jaimi barang-baranna siagang olo’-olo’na ke’nanga, kammayatompa ammantammi ke’nanga ri pocci’na linoa.
13Pandudu’na Syeba, Dedan, siagang sikamma padangganga ri kota-kota pa’rasangang Spanyol lakkuta’nangi mae ri kau kamma anne, ‘Apaka nupagioki tantaranu lanri ero’nuji anrampasa’ siagang angngella’ bulaeng, pera’, olo’-olo’, siagang barang-barang maraenga, nampa nuengka’ ngaseng sikammaya anjo?’"
14Lanri kammana anjo Nasuroa’ Batara Kaminang Tinggia untu’ ampabattui anne pasanga mae ri Gog, angkana, "Ba’lalo ri wattunna attallasa’ amang siagang sannang ummakKu Israel nanubattu ambunduki.
15A’lampako battu ri pa’rasangannu, bella battu wara’, nirurungang ri tantara lompo siagang heba’, yangasenna pasukang a’jarang battu ri a’rupa-rupaya bansa.
16Nampa nubunduki ummakKu Israel rapang anging lompo antujui buttaya. Punna narapi’ sallang wattunna, laKukiringko mange angngempoi buttaKu. Lanri tindakangKu tete ri kau, he Gog, lanaassemMa’ bansa-bansaya angkanaya inaiA’ anne, iamintu Allata’ala matangkasaka.
17Sai ri sesena ikau naKua’bicara riolo tete ri sikamma atangKu iamintu na’bi-na’bina Israel. Nabotomi ke’nanga angkanaya ri allo labattua sallang laKusuroi taua untu’ ambunduki Israel. INakke, Batara Kaminang Tinggia, anne akkana."
18Nakana Batara Kaminang Tinggia, "Mingka tena nasallo le’ba’na Gog ambunduki Israel, lajallo’Ma’.
19Siagang sanna’ larroKu nalaKuangngancang, angkana ri anjo alloa lania’ kajariang lompo ri Israel, iamintu lata’ge’gosoki buttaya ri Israel.
20Kabusu’na jukuka siagang jangang-janganga, sikontu olo’-olo’ lompoa siagang ca’dia, kammayatompa sikontu rupataua ri lino, lannekkereki napakamma malla’ andallekangA’. Laruntungi sikamma monconga, lala’boroki sikamma ta’binga, siagang larumbangi sikamma temboka.
21Nampa laKupata’bangka Gog siagang a’rupa-rupa bala. INakke, Batara Kaminang Tinggia, anne akkana. Lasibunduki para ana’ buana siagang pa’danna ke’nanga.
22LaKuhukkungi siagang garring kammayatompa cera’ assolong. Bosi lompo, bosi es, pepe’ siagang batu a’bara laKutumpa mae ri ia siagang tantarana kammayatompa mae ri sikamma tantara naaganga sita’gala’.
23Kammami anjo caraKu lampappicinikangi mae ri sikontu bansaya angkanaya iNakke la’birikKa’ Kumatangkasa’. Jari lanaassemmi ke’nanga angkanaya iNakkemi Batara."