Dual Panel1Nakana Batara ri nakke, "Tena nalaKukamaseang anne bansaya, manna pole nania’ Musa siagang Samuel anrinni untu’ ammenteng ampappalakkangi ke’nanga pangngamaseangKu. Suroi anne bansaya a’lampa, tena Kuero’ anciniki ke’nanga!
2Punna akkuta’nang ke’nanga ri kau angkana kemae musti a’lampa ke’nanga, appialiko kamma anne, ‘Nakana Batara, ia nipattantua lamate lanri garring lappassammi mate lanri garring. Ia nipattantua lamate lalang pa’bundukang lappassammi mate lalang pa’bandukang. Ia nipattantua lamate lanri cipuru’ lappassammi mate lanri cipuru’! Ia nipattantua lanitahang, lappassammi niengka’ salaku tunitahang!’
3Inakke, Batara, le’ba’mi Kupattantu angkanaya nia’ appa’ rupanna hukkungang hebaka lakajariang mae ri ke’nanga: lamatei ke’nanga lalang pa’bundukang, maya’na ke’nanga lanire’resangi ri kongkong, nikanrei ri jangang-jangang, siagang nipaccappuki ri olo’-olo’ sekke’.
4LaKupa’jari sikontu bansaya ri lino sanna’ malla’na anciniki ke’nanga. Kugaukang ngasengi anjo sikammaya lanri panggaukanna Manasye ana’ bura’nena Hizkia ri Yerusalem ri wattunna ia a’jari karaeng ri Yehuda."
5Nakana Batara, "He pandudu’na Yerusalem, inai langkamaseangko? Inai ero’ lasi’na nyawana lanri ikau? Inai ero’ assengka ampakkuta’nangngangi antekamma katallassannu?
6Le’ba’Ma’ nusorongboko siagang nubokoi, lanri kammanami anjo naKuangka’ limangKu untu’ angngancurukko, lanri lanreMa’ antahangi larroKu.
7Ri tunggala’ kotaya ri anne pa’rasanganga lanipelakko rapang rarame. Manna pole ikau ummakKuko mingka laKupanrakiko siagang ana’-ana’nu lanri teanu ampinrai batenu attallasa’.
8Larassi pa’rasangannu ri janda, la’biangngang na kassika ri biring tamparang jaina. LaKubunoi sikamma taua ri wattu rungkana sa’genna pa’risi’ nasa’ring amma’na ke’nanga. Ri wattu alloa Kupabattui mae ri ke’nanga sitau tulammanraki sa’genna malla’ siagang lussa’ ke’nanga.
9Amma’ ammoteranga tuju ana’na takkaluppami lanri sukkaraki nasa’ring a’mai’. Sassammi nacini’ allo katallassanna, nihinami siagang nipakasiri’mi ri pakkasia’na. Kusuroi musu-musua ambunoi niaka ija attallasa’ battu ri kau. INakke, Batara, anne akkana."
10Tojeng, inakke siala’ memang tonga’. Untu’ apa nanalassukanga’ anrongku? Tunggala’ tau niaka ri anne pa’rasanganga kuagang ngasengi a’besere’ siagang a’gea’. Manna kutale’baka appapiinrang yareka angnginrang, mingka nitunraia ri sikontu taua.
11O Batara, punna ma’nassa tena memang kugaukangi tugasakku siagang baji’, siagang tena nakualle musu-musua ri dallekanTa ri wattunna anggappa ke’nanga bala siagang susa, lappassammi kajariang tojeng pattunrana sikamma anjo taua.
12(Tena manna sitau akkulle antepoki bassia, la’biangampabassia battu waraka ia le’baka nibengkoro’ siagang tambaga.)
13Nakana Batara ri nakke, "LaKukiringi musua untu’ angngengkaki kakalumanynyangnganna siagang pa’barang-baranganna ummakKu salaku hukkungang mae ri dosa-dosa le’baka nagaukang ke’nanga ri sikontu pa’rasanganga.
14Ri pa’rasangang maraeng tenaya naassengi ke’nanga, laKupa’jari atai ke’nanga mae ri musu-musunna, lanri allumpana larroKu rapang pepe’ a’rinra lompoa siagang tenaya naero’ mate pepe’na."
15Nampa kukanamo, "Batara, Kipahangi. U’rangia’ siagang tulunga’. Pa’balassanga’ mae ri anjo ke’nanga angngondanga’ siagang anjallakkanga’. TeaKi’ sa’bara’ dudui mae ri ke’nanga sa’genna akkulle sallang ke’nanga ambunoa’. Kiu’rangi angkanaya lanri iKatte nakunihina.
16IKatte a’bicara ri nakke, siagang tuli kupilangngerinna bicaranTa. IKatte ampatanga’, o Karaeng Allata’ala Kaminang Koasaya, lanri kammana anjo nakupakasannang siagang napakate’ne kana-kananTa.
17Tena kukaturu’-turukang assannang-sannang siagang sikamma tau asse’rea untu’ a’bicara bonga-bonga. Lanri mannurukingku mae ri Katte, nakusa’la’mo kalengku lalang larroku kusa’ring.
18Angngapa kutulusu’ sessa mamo? Angngapa nasanna’ lokokku siagang tena le’bakai ammolle? Maka erokKi’ ampakala’bai pa’maikku rapang binanga a’jari kalotoroka ri wattu timoro’?"
19Appiali Batara angkana, "Punna ammoterekko, laKutarimako. La’jariko ammotere’ atangKu. Punna nukabarrangi apa a’matu-matua siagang teai bicara tena bonena, akkulleko ammotere’ a’jari na’biKu. Labattui pole taua mae ri kau, siagang tenamo nuparallu mae ri ke’nanga.
20LaKupa’jariko rapang tembo’ tampa’ pattahangngang nipareka battu ri tambaga mae ri ke’nanga. Lanabundukiko ke’nanga, mingka tanakulleai ke’nanga ambetako. INakke lanrurungangko untu’ anla’langngiko siagang ampasalamakko.
21LaKulappasangko battu ri kakoasanna sikamma tau ja’dalaka siagang pallaka. INakke, Batara, anne akkana."