Dual Panel1Ri tenanapa nabunduki karaeng Mesir anjo kota Gaza, a’bicarai Batara ri nakke, ri sesena pa’rasangang Filistin.
2Nakana Batara, "Ciniki, assolongi je’neka battu wara’ siagang allumpai sangkamma binanga a’baya antujui pa’rasanganga siagang bonena, kota-kotaya siagang pandudu’na. Lammarrangi taua appala’ tulung siagang sikontu ra’yaka appiraungi.
3Lallangngereki ke’nanga sa’ra bangkeng jarang, sa’ra reku’na karetaya, siagang a’galutturu’na roda-rodana. Tau toaya la’jari lammai, natenamo nanawa-nawai ana’na.
4Narapi’mi wattunna bansa Filistin nipanraki kabusu’, sa’genna tenamo nanggappa bantuang Tirus siagang Sidon. INakke, Batara, ampanraki kabusuki sikontu tu Filistin niaka tassesa battu ri Kreta.
5Tu Gaza nitujui ri susa lompo; pandudu’ Askelon a’jari rapangi tau pepe. Siapapi sallona tu Filistin tassesaya tulusu’ lasi’na?
6Ammarrangko angkana, ‘Siapapi sallonu la’bundu’, he pa’danNa Batara? Ammotere’ mako antama’ ri banoannu nampa ammantang mako anjoreng siagang sannang!’
7Mingka maka akkullei sannang punna le’ba’mo Kuparentakang untu’ ambunduki Askelon siagang pandudu’na ri biring tamparanga?"