Dual Panel1Iaminne pappasanNa Allata’ala, natarimaya Yesaya ana’na Amos ri passala’na Babel:
2Pakapeki sikamma bandera pa’bundukannu ri coppo’na bulu’ a’gondoloka! Akkiokko mae ri sikamma tantaraya, panaiki limannu sollanna maju ke’nanga anrumbangi pakke’bu’ lompoa kota tampoa anjo.
3Le’ba’mi Nakio’ Batara sikamma pejuang nipileNa. Kassaki ke’nanga, napatappaki kalenna siagang akkullei Nakalompoang pa’mai’. Nasarei tugasa’ Batara ke’nanga untu’ anghukkungi sikamma tau natabaya pangngalarroinNa.
4Pilangngeri sa’ra gegereka ri monconga, kamma nilangngere’ sammang tau jai asse’re. Pilangngeri gegere’na sikamma kakaraengang siagang bansa-bansa a’rappunganga. Naparessai Batara Kaminang Makoasaya pasukang bunduka.
5Battui ke’nanga ri pa’rasangang-pa’rasangang bellaya di cappa’-cappa’na buttaya. Lalang larroNa Napakei Batara ke’nanga untu’ ampanraki sikontu buttaya.
6Appiraung mako, lanri a’reppese’mi allonNa Batara, iamintu allo kapanrakang Napabattua Batara Kaminang Koasaya.
7Tunggala’ taua lanakasiaki mate limanna siagang tappela’ kabaranianna.
8Lanibattui ke’nanga ri kamallakkang lompo, nammulingkara’ sanrapang baine pa’risika nasa’ring lamana’. Lamassing sicinikimi ke’nanga lalang malla’, ejai rupanna napakamma siri’-siri’.
9Labattui allonNa Batara, siagang anjo alloa laNapa’betteseki kalarroang lompoNa. La’jari parang kalotoroki buttaya, siagang tunggala’ tau dorakaya lapanraki.
10Tunggala’ bintoenga siagang pa’rappungang bintoenga lammari accaya; lasassangi mataalloa ri wattunna ammumba, siagang tenamo nalaccaya bulanga.
11Nakana Batara, "LaKuhukkungi linoa lanri kaja’dallanna, siagang tau ja’dalaka lanri dosa-dosana ke’nanga. Tunggala’ tau tampoa laKupakatunai, siagang laKuhukkungi tau borroa siagang pallaka.
12Sike’de’ duduji tau lanipasalama’, sike’dekangngang na bulaeng ti’noka.
13LaKupannekkereki langika siagang lata’ge’gosoki buttaya battu ri tampa’na ri wattunna Kupappicinikang larroKu, Batara Kaminang Makoasaya.
14Bansa maraeng ammantanga ri Babel lasisa’la’-sa’laki siagang massing lari mange ri pa’rasanganna. Rapangi ke’nanga jonga lari battu ri pammuranga, yareka rapang gimbala’ tenayamo pakalawakinna.
15Inai-nai nijakkala’ lanitoboki sa’genna mate.
16Lanaciniki ana’ lolonna ke’nanga nilica’, balla’na ke’nanga niella’, siagang sikamma bainenna ke’nanga nigau’ bawang."
17Nakana Batara, "LaKupagioki bansa Madai untu’ ambunduki Babel. Takkulleai ke’nanga nibuccu’ siagang pera’ yareka bulaeng.
18Pana siagang anrong pana napake ke’nanga anbunoi sikamma tau rungkaya. Tena nasayangi ke’nanga ana’ loloa siagang tena nakamaseangi ana’-anaka.
19Yangasenna kakaraenganga, iaminjo Babel kaminang ga’ga siagang a’jari kalompoang pa’mai’na pandudu’na. Mingka iNakke, Batara, laKuancuruki ke’nanga, kamma le’baka Kugaukang mae ri kota Sodom siagang Gomora.
20Manna sitau tania’ ija lammantang anjoreng. Tena padete’ tau Arab lampasangi kemana anjoreng ri tampaka, siagang tena pakalawaki langngerangi bembena siagang gimbala’na untu’ a’ruku’ anjoreng.
21Anjo tampaka lanapammantangi olo’-olo’ liara’. Kokoci’ la’ru’mung ri balla’na ke’nanga, siagang jangang-jangang unta lammantang anjoreng. Bembe liara’ la’lumpa’-lumpa’ ri alla’na rumbanganga.
22Sa’ra pilollong kongkong romang siagang serigala kalangngerang battu ri sikamma balla’ rewataya siagang balla’ lompona Babel. A’reppese’mi wattu kaancuranna siagang takkulleami nipammono’ anjo wattua."