Dual Panel1Nakana Batara, "He Babel, naungko battu ri empoang kala’birannu, siagang ammempo mako rate ri limbu’buka. Tenamo nulale siagang kanang-kanang kamma riolo.
2Anggiling mako labu’ siagang batu; sungkemi bongonnu, angkaki ro’nu sa’genna kaccinikang bitisi’nu, siagang a’limbang mako ri binanga-binangaya.
3Lanacinikko taua assolara’, nihina siagang nipakasiri’. ErokKa’ a’balasa’ mae ri kau, na tena manna sitau laKupata’lappasa’."
4Allata’ala matangkasa’na Israel allappassangki’, arenNa Batara Kaminang Makoasaya.
5Nakana Batara ri Babel, "A’merekko, siagang antama’ mako ri sassanga. Tenamo nalaniarengko ‘Karaeng bainena sikamma kakaraenganga.’
6Riolo larroA’ mae ri ummakKu, tenamo naKukana iNakke ampatangi. Nampa Kupassareang ke’nanga mae ri kau, nampa tena nukamaseangi ke’nanga, ba’lalo manna tau toa-toaya nujallakkang nukapallaki todong.
7Nukapangi angkanaya la’jari karaeng baineko satunggu-tungguna, na tanuassenga yareka tanupikkira kale’bakkanna.
8Lanri kammana anjo pilangngeriA’, he ikau nungaia angngondanga kasannangngang! Nukapangi angkana amangi katallassannu, siagang tena sangkammannu. Tanupikkirai angkana la’jari jandako, siagang talapanrakai turungannu.
9Mingka poro sinampe’ji bawang, lalang siallo, nappada kajariang anjo ruaya passala’. Manna ammakeko baca-baca siagang pangngissengang, lanialle tonji bura’nennu siagang ana’nu.
10Nukana kalennu amangko lalang ri kaja’dallannu, nupikkiriki angkana tena niparhatikangi panggaukannu. Nipa’linguko ri kacara’dekannu siagang pangngassengannu, nukapangi angkana tena sangkammannu.
11Mingka lanatujuko bala, takkulleai baca-bacanu ampalili. Lanibattuiko ri bahaya, takkulleako ampasalai. Ti’ring labattui kapanrakanga, tanusanna-sannayai la’bi riolo.
12Na’na’ mako bawang siagang sikontu baca-bacanu na pangngissengannu, ambattalliako appakkaramula ri ca’dinu. Inai angngassengi, gassingka nia’ matu-matunna mae ri kalennu, untu’ ampakamalla’-mallaki sikamma musunnu.
13Mangngangko lanri jaina pappakainga’. Suromi sikamma pacinika maju untu’ ampasalamakko; le’ba’mi naparessa ke’nanga sikontu panyingkulu’na langika na napilajari sikamma bintoenga, na ri tunggala’ bulang berua natappui angkana apa kajarianna sarennu.
14Ciniki, rapangi ke’nanga rarame nakanrea pepe’; takkulleai napasalama’ kalenna ke’nanga! Ta’lalo bambanna anjo pepeka mae ri ke’nanga, teai pepe’ kammu’ untu’ a’binrung.
15Iaminjo matu-matunna pacinika mae ri kau ambattalliako appakkaramula ri ca’dinu; massing a’lampai ambokoiko; tena nia’ battu untu’ antulungko."