Dual Panel1Ambangungko, he Yerusalem, ambangung mako! Pakajarreki pa’mai’nu! Pakei pakeang kalompoannu! He Yerusalem, kota matangkasaka, takkulleami allalo antama tau rantasaka ri pakke’bu’ lomponu.
2Ambangungko battu ri limbu’buka, he Yerusalem, pa’be’beseki limbu’bu’ niaka ri kalennu. He pandudu’na Sion nitahanga, la’gasi rante niaka ansikkoki kallonnu!
3Nakana Batara mae ri umma’Na, "Nibalukang bawang-bawangko riolo, jari kamma-kamma anne nilappassang bawang-bawang tongko.
4Riolo a’lampako mange ri Mesir nampa ammantangko anjoreng a’jari tau annompang. Nampa napaccokko Asyur natena pasabakkanna.
5Kamma-kamma anne apa urusangKu anrinni? Natahangko tu Babel, na natahang bawang-bawang jako. Anjo tau anjallakkangako tulusu’ napattampoanna kalenna siagang nahinA’.
6Lanri kammana anjo lanuakuimi angkana iNakke Allata’ala, nampa anjo wattua lanuasseng ngasemmi angkanaya iNakke anne a’bicara mae ri kau."
7Tamaka sannanna pa’maika anciniki kabattuanna tunisuroa; a’jappai allalo ri pa’monconganga siagang angngerang kabara’ baji, kabara’ salewangang, kabara’ kasalamakkang mae ri Sion: nakana, "Allata’alanu Karaeng!"
8Pilangngeri pakkio’ rannuna pangawala’na kotaya, para ma’rannu-rannui ke’nanga! Saba’ mata kalenna ke’nanga anciniki ammotere’ Batara mange ri Sion.
9Akkio’ rannuko, he sikamma rumbanna Yerusalem, saba’ Nasaleori Batara umma’Na na Napakabebasa’ Yerusalem.
10Napappicinikang Batara kakoasanNa ri dallekang matanna sikontu bansaya. Nanasa’bi sikontu buttaya kasalamakkang battua ri Allata’alata.
11A’lampamako! Bokoi kota Babel, he ikau ngaseng angngerangai pakkasa’na Balla’Na Allata’ala! Teako seroi barang ra’masaka; tangkasi kalennu ri tenanapa nu’lampa.
12Tena nula’lampa karo-karo, siagang tena nusangkamma tau laria. Saba’ laNarurungangko Batara; laNajagaiko Allata’alana Israel battu ri tammulilinu.
13Nakana Batara, "Sikontutojenna la’jari apa nagaukanga atangKu; lanipakalompoi siagang lanipakatinggi.
14Riolo jai tau ta’bangka anciniki, nipanraki rupanna sa’genna tenamo nattanja’ tau.
15Mingka kamma-kamma anne jai bansa napa’jari lannasa’, lannasa’mi siagang takkulleami akkana sikamma karaenga napakamma. Lanaciniki ke’nanga siagang lanapahangi, apa tenaya naassengi riolo."