Dual PanelPuang Yesus marru untondon Musa
1Dadi, anggammua' sa'do'dorangku to masero to mangka natambai Puang Allata'alla, paalai manappaia' penawa Puang Yesus to taakui kumua Rasulna Puang Allata'alla anna Pongkena Imam.
2Inde Puang Yesus-e matutu tongan-tongan lako Puang Allata'alla to unturoi, susi Musa yolona matutu tongan-tongan umpalako pengkaranganna illalan banuanna Puang Allata'alla, battu' dikua illalan alla'-alla'na petauanna Puang Allata'alla.
3Sapo la sipato' Puang Yesus marru dipakasalle anna la Musa, susi to umpake'de' banua marru la dipakasalle anna la banua napake'de'.
4Annu angganna banua innang dengan tukan umpake'de'i. Sapo to umpapia angga lako angga mesa-mesanna Puang Allata'alla.
5Innang matutu ia Musa umpalako pengkaranganna illalan alla'-alla'na petauanna Puang Allata'alla sirapan mesa sabua' matutu umpalako pengkaranganna illalan banuanna puangna. Anna inde napogau' Musae umpa'peissanan la natula' Puang Allata'alla illalan allo la ditingngayona.
6Sapo Kristus matutu annu Anakna Puang Allata'alla to ummissanan asan angganna issinna banuanna Puang Allata'alla. Kitamoa' dikuaan issinna banuanna Puang Allata'alla ke tontong liui matoro penawanta anna kaparannuanta la untarima pa'pebenganna Puang Allata'alla.
Pelliwean nadandi Puang Allata'alla lako to mangngorean
7Iamo too, susi tula'na Penawa Masero nakua: “Ianna urrangngikoa' kadanna Puang Allata'alla allo temo,
8daua' pomakarra' penawammu susi nenemu makarra' penawa iato anna umbali sola ussandak-sandak Puang Allata'alla dio padang alla'o.
9Ma'kada Puang Allata'alla nakua: ‘Diomo angngenan iatoo nangei ussandak-sandakna' nenemua' anna nasudi, moi kenada ummitamo pa'pogau'ku lako kalena appa' tapulo taunna.
10Iamo too anna kendekmo ara'ku lako tau iatoo anna kukua: Innang pusa penawa tongan anna moka unturu' lalangku.
11Napolalan keara'na' lambisan kupa'pindai kukua: Tae' la kupabeai ullambi' pelliwean kupatokanni.’”
12O anggammua' sa'do'dorangku, dagai manappai indamu dengammoa' ma'penawa kadake anna tae' mangngorean lambisan umpemboko'ikoa' Puang Allata'alla Dewata tuo.
13Sapo la sipakilala-lalakoa' allo-allona, indana dengammo illalan alla'-alla'mua' pusa natumang kamoraian umpogau' kasalaan lambisan umpemboko'i Puang Allata'alla, bayuanna dengampa attu battu dikua “Allo temo.”
14Annu kitamoa' to mesa kappa' Kristus ke tontong liui matoto' kapangngoreananta sae lako allo ma'katampakanna susi kapangngoreananta parandukanna.
15Susi inde battakadanna illalan Buku Maseroe: “Ianna urrangngikoa' kadanna Puang Allata'alla allo temo, dau pomakarra' penawammu susi nenemua' makarra' penawa iato anna moka unturu' Puang Allata'allao.”
16Benna dikuan to urrangngi kadanna Puang Allata'alla sapo moka unturu'i? Angganna to napatette Musa illalan mai lembangna Mesir.
17Anna benna dikuan to narua ara'na Puang Allata'alla appa' tapulo taunna? To kasalaan lambisan mate dio padang alla'.
18Ma'pinda Puang Allata'alla nakua: “Tae' la kupabeai ullambi' pelliwean kupatokanni.” Benna nakuan? Angganna to moka manuru' lako kalena attu iatoo.
19Dadi manassa anna taissanan temo kumua tae' ullambi' pelliwean dipatokanni annu tae' mangngorean.