Dual PanelTabé
1Oné-mai hi Simon Pétrus, mendi agu rasul di Yésus Kristus; latang te méu ata cama-cama agu ami tiba imbi landing agil de Mori Keraéng agu hi Yésus Kristus, Ata Sambé dité.
2Tabing agu hambor-libur penong oné méu landing le pecing Mori Keraéng agu te hi Yésus, Mori dité.
Mori Keraéng Benta Agu Pile Manusia
3Mori Keraéng pu’un kuasa poli tabing latang te ité sanggéd cao-ca ata betua laing kudut mosé nggeluk. Pandé hitu Diha, ai ité pecing hi Kristus hitut poli bénta itén, ali kuasaN hitut mengit agu dio-dolokn.
4Ali hitu, Hia poli widang ité sanggéd reké ata belard agu mésé tu’ung, kudut ngancéng cépé oné-mai belek da’at hitut pandé ampus lino agu tiba gauk de Run Mori Keraéng.
5Landing hitu, méu paka tu’ung-tu’ung kéta gejur te jemut imbis le bese-di’a agu tambang bese-di’a hitu le pecing Mori Keraéng.
6Jemutn pecing Mori Keraéng hitu le kuasa weki, jemutn kuasa weki le gepek, jemutn gepek le mosé nggeluk.
7Jemutn mosé nggeluk hitu le momang asé-ka’é ca imbi, jemutn momang asé-ka’é ca imbi le momang sanggén ata.
8Émé sanggéd taung gauk di’a situ manga do kétas oné méu, toét-toé méu ciri seber agu cir lahé oné pecing hi Yésus Kristus, Mori dité.
9Maik céing kaut ata toé paéng sanggéd gauk di’a situ, hia te ciri ného ata buta agu toé pecing do, ai hémong liha te sanggéd ndékokn polisg ampongd le Mori Keraéng.
10Asé-ka’én, landing hitu mping koé wuli wekis, kudut tambang kéta galan rang de méu, ai méu ata poli bénta agu pilé le Mori Keraéng. Émé pandé le méu situ, toé manga wéléng mosés.
11Ali hitu, méu manga hak mésés te tiba tabing latang te ngo oné Adak tédéng lén, ngong Adak di Yésus Kristus, Mori agu Ata Sambé dité.
12Ali hitu, aku kéngko mtaung nuks latang te sanggéd taung situ, koném po poli pecingd le méu agu metek kin oné toing de Mori Keraéng situt poli tibad.
13Dis daku te langga méu, kudut néka hémong sanggéd taung situ, rémé toé di tepo dongkarg aku.
14Baé laku, ruisg te tepo dongkarg, ai poli tombon oné aku li Yésus Kristus, Mori dité.
15Maik, koném po poli tepo dongkarg, gejur kig te langga méu, kudut nuk mtaung sanggéd taung situ.
Ita Dungka Mengit Di Kristus
16Mori dité hi Yésus Kristus te mai koléy déméng mengitN. Du ba keréba hitu oné méu, toé campit le joak de manusia maik le ita dungka lami mengit Diha.
17Ai hi Yésus Kristus tiba hiang agu mengit oné-mai Mori Keraéng Ema. Du hitu cain oné Hia reweng de Mori Keraéng, nenggo’o taéN, “hau dé Anak momang Daku, ata henan kéta oné Nai Daku.”
18Weki rug ami dengé reweng hitut mai éta-mai Surgan, du ami cama-cama agu Hia manga éta poco nggeluk hitu.
19Ali hitu, ami tambang mberes oné keréba hitut poli caing le sanggéd nabi. Itu tara paka idep di’a le méu keréba hitu, ai keréba hitu cama ného lampu hiot néra oné osang nendep dengkir gérakn tana agu cama ného ntala awo mai par te gérak nai de méu.
20Ho’o kétay ata sékékn te paka pecing le méu: Sanggéd keréba de Mori Keraéng ata létang le nabi oné Surak Nggeluk, néka pangong kaut lorong ngoéng rus.
21Toé dé’it manga keréba ata cir ali ngoéng de manusia, maik dod ata ba keréba de Mori Keraéng ali sur de Nai Nggeluk.