Dual PanelTabé
1Oné-mai hi Paulus ata bui landing hi Kristus Yésus agu oné-mai hi Timotéus, asé-ka’é ca imbi dité. Latang te hi Filémon, haé-reba ca gori dami ata momang kéta lami,
2nenggitu kolé hi Apfia weta ca imbi dité, hi Arkhipus haé reba ca mping oné gori dité agu latang te sanggéd ata serani oné mbaru de hau.
3Tabing agu hambor-libur oné-mai Mori Keraéng Ema dité agu oné-mai Mori Yésus Kristus, loréng méuy.
Wali Di’a
4Aku wali di’a kamping Mori Keraéng, néténg ngaji daku nuk mtaung hau,
5ai dengé laku latang te momang de hau kamping sanggéd weki serani agu latang te imbi de hau kamping Mori Yésus.
6Ngaji daku, nahé nai ca anggit ditét ca imbi, te cir pecing mésé latang te sanggéd berkak ata manga oné ité landing le neki ca agu hi Kristus.
7Filémon ata momang daku, mohas de hau latang te sanggéd weki serani pandé nisang agu mberes kéta nai daku. Sanggéd weki serani poli téing lémbud le Mori Keraéng lut hau.
Tegi Di Paulus Oné Hi Filémon Latang Te Sékék Di Onésimus
8Ali mésén momang de hau latang te weki serani, agu ité kolé ca imbi oné hi Kristus, aku ngancéng te perénta hau apa ata paka pandé le hau.
9Maik ali momang hau laku, itu tara tegi kaut laku, toé perénta. Tu’a kaku ga, céwén kolé rémé oné buig, landing hi Kristus Yésus.
10Tegi daku kamping hau, nuk koé le hau hi Onésimus, ai hia cama kéta ného anak de rug ata poli titongn laku oné bui te imbi hi Kristus.
11Bo tu’ung kali danong hia toé manga belarn latang te hau, maik te ho’on ga, belarn kéta latang te hau agu latang te aku.
12Hi Onésimus hitut momang laku cama ného anak de rug, te jera koléy laku nggere-oné hau.
13Bo tu’ungn aku ngoéng te po’é hiak ka’éng cama agu akuy luing lesing hau, kudut campé aku rémé oné buig landing Keréba Di’a.
14Maik aku ogok te pandé nenggitu émé toé di éng le hau. Ngoéng daku, kudut pandé di’a hitu de hau, toé ali dedek molé, maik ali téti nai rum.
15Ai aram anor le Morin tara bécangn hi Onésimus oné-mai haun, wiga ali hitu hau ngancéng tiba kolé hia te ka’éng cama tédéng lén.
16Teho’on ga, néka rékéng hia ného mendi, maik rékéng hia ného asé-ka’é ca imbi ata momang oné hi Kristus. Hia belarn kéta latang te aku, abén kolé latang te hau. Hia belarn kéta, ot ného mendi de hau ko ného asé-ka’é ca imbi oné ranga de Morin.
17Émé hau rékéng aku ného asé-ka’é ca imbi, hau paka tiba hia cama ného tiba aku.
18Émé hia manga dé’it pandé salan ko manga raungn oné hau, sanggéd taung situ pando oné akus.
19Aku pandé surak ho’o le limé agu tanda ponggo rug, kudut imbi tu’ung le hau: Aku hi Paulus te bajar taungs. Ata di’an aku toé tombo oné hau, te hau manga raungm oné aku.
20Itu tara le ngasang de Morin, campé agu pandé lémbu koé nai daku oné hi Kristus.
21Ali imbi laku sundur de hau, itu tara tulisn laku surak ho’o. Ai pecing laku, ngancéng le hau pandén apa ho’ot tegi daku, ngot céwé do ata pandé le hau po oné-mai tegi daku.
22Mai nitu main, ambi koé le hau lo’ang oné mbarum latang te aku, ai imbi laku sanggéd ngaji de asé-ka’é do sendos le Mori Keraéng kudut aku ngancéng cumang kolék agu méu.
Tabé
23Tabé latang te hau oné-mai hi Épafras, haé reba ca bui agu aku landing hi Kristus Yésus,
24agu oné-mai hi Markus, hi Aristarkhus, hi Démas agu hi Lukas, haé-reba ca gori agu aku.
25Berkak de Mori Yésus Kristus loréng méuy!