Dual Panel1Néténg Imam Mésé ata le pilé oné-mai bahi-réha manusia, wéréty latang te manusia oné woé-joé disé agu Mori Keraéng, kudut hia ba takung agu hélang landing ndékok.
2Imam mésé hitu paka ngancéng haéng-pa’él sanggéd ata toé pecing agu ata wéléng, ai weki run hia penong ali les.
3Landing hitu, hia paka ba takung agu hélang latang te ampong ndékok, toé hanang latang te ndékok data imbi, maik latang te ndékok de weki run kolé.
4Toé manga cengatan ata téti le weki run te ciri imam mésé, maik le bénta de Mori Keraéng cama ného hi Harun danong.
5Nenggitu kolé hi Kristus, toé téti le weki run te ciri Imam Mésé, maik téti le Mori Keraéng. Ai nenggo’o taé de Mori Keraéng: “Hau hitu dé Anak Daku! Leso ho’o hau poli ciri Anak Dakum.”
6Taé kolé le Mori Keraéng, “Hau Imam tédéng lén ného hi Mélkisédék.”
7Oné moséN ného manusia, Mori Yésus ngajiy tegi ali rétang nenep agu lanar lu’u mata oné Mori Keraéng ata ngancéng selamak Hia oné-mai mata. Ali nggelukN, tegi Diha sendo le Mori Keraéng.
8Koném po Mori Yésus Anak de Mori Keraéng, maik Hia poli nungku te junggu oné ta’ong susaN.
9Ali hitu, Hia ciri ata sambé ata besik, agu ciri pu’un selamak tédéng lén latang te sanggéd atat junggu oné Hia.
10Hia ciri Imam Mésé le Mori Keraéng ného hi Mélkisédék.
Langga Kudut Néka Ledong Imbi
11Latang te rang Imam Mésé de Mori Yésus, do kéta ata paka curup lami. Maik toé émongn latang te si’angn ai mandeng kéta méu te baé pa’él sanggéd cao-ca.
12Émé lélo oné-mai sokor, méu naun te ciri guru. Maik méu ngai sékék kis te tiba nungku oné-mai ata bana latang te raja pu’ud curup de Mori Keraéng. Méu ngai sékék kis te inung susu, toé hang cirang.
13Ai néténg ata situt ruda kid inung susu, hia toé idep di’a toing molor, ai hia anak koé kin.
14Maik hang cirang latang te sanggéd ata tu’a, siot ngancéng baé woléngd ata di’a oné-mai ata da’at, landing le paténg oné manté.