Alkitab Mobile SABDA
[VER] : [MANGGARAI]     [PL]  [PB] 
 <<  Kisah Para Rasul 6 >> 

Pitu Taus Ata Pilé Laingd, Te Wintuk Ata Lénggé

1Du cekeng hitu, woko tambang cuku tambangs nekid ata nungku, manga kolé jugut oné mai isét Yahudi situt curup Yunanis kamping isét Ibrani, ai pati sékék lété leso, latang te ata luang disé toé bilang calas oné gori disé.

2Rasul situt campulusua bénta sanggéd ata nungku situ te nempung agu mai taéd: “Toé di’an émé ami hémong te keréba Reweng de Mori Keraéng méséng kaut te wintuk lompong de méu.

3Landing hitu asé-ka’én, pilé pitu taun oné mai méu, ata pecing taung lata te isé ata di’a, agu penong le Nai Nggeluk agu léwé nuk, kudut ami téti isé oné gori situ,

4agu kudut weki rug ami ngancéng nuk kanang ngaji agu ba keréba reweng de Morin.”

5Gejék hitu tiba di’a le weki serani, itug kali pilén hi Stéfanus, cengata ata imbi mésé agu penong le Nai Nggeluk, agu hi Pelipus, Prokhorus, Nikanor, Timon, Parménas agu hi Nikolaus, cengata ata lut agama Yahudi oné mai Antiokhia.

6Isé ngo oné ranga de rasul-rasul, og kali rasul-rasul situ ngajis agu témba liméd éta sa’i disé téing berkak.

7Reweng de Mori Keraéng tambang bekan, agu tambang kéta dod ata nungku oné Yérusalém, agu manga kolé imam situt condo wekid agu imbis.

Mangkong Hi Stéfanus

8Hi Stéfanus hitut penong le widang agu kuasa, pandé tanda lenget agu gantang oné bahi-réha ata do.

9Maik tua kolé pisa taus ata oné mai ro’éng Yahudi ata carod Libertini (ata ledo oné mai mendid) – isé oné mai Kiréné agu Aléksandria – cama laing agu pisa taus ata Yahudi oné mai Kilikia, agu oné mai Asia. Isé léwang taud agu hi Stéfanus,

10maik isé toé ngancéng dungkang nai ngalis ata téing le Nai Nggeluk hitut susung hia te curup.

11Itu kali isé pandé karu-kak pisa taus ata kudut taé: “Ami poli dengé hia loér hi Musa agu Mori Keraéng.”

12Ali hitu isé sosok ata dos agu tu’a-tu’a agu ata pecing Taurat, isé deko hi Stéfanus, sorok hia agu dadé hia oné ranga de Adak Agama.

13Itus kali toso ata saka-si adong, taéd: “Ata ho’o toé kéta hema bon tombo léwang osang nggeluk ho’o agu Wintuk Taurat,

14ai ami poli dengé hia tombo te Mori Yésus ata Nasarét hitu, te pandé renco osang ho’o agu caling adak dité, ho’ot mbaté di Musa oné ité.”

15Sanggéd ata situt lonto oné sidang Adak Agama hitu, lélo hi Stéfanus itu kali ita lisé ranga di Stéfanus cama ného ranga de cengata malékat.


  Share Facebook  |  Share Twitter

 <<  Kisah Para Rasul 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel