Dual PanelMata Agu Mosé Cama Agu Hi Kristus
1Émé nggitu, apa ata kudut curup lité? Ngancéng ité seber pandé ndékok, kudut tambang don tabing hitu?
2Toé nggituy! Toé weli ité ata poli célad oné-mai ndékok, co’o tara ngancéng mosé kid oné ndékok?
3Ai toé pecing le méu ko, te sanggéd ité ho’ot poli cebong le waé serani oné hi Kristus Yésus, poli neki-ca oné mata Diha?
4Ali cebong le waé serani hitu ité poli boak agu mata cama-cama agu Hia, nenggitu kolé ité ngancéng mosé oné mosé weru. Cama ného hi Kristus poli pandé to’o kolé oné mai ata mata le angos de Mori Keraéng Ema.
5Ai ité poli ciri cad oné mata cama agu Hia, te ité kolé ciri cad oné to’o cama agu Hia.
6Ai pecing lité gauk manga dité poli lut pépék oné panggol, kudut weki ndékok dité mora kuasan, kudut ité kolé néka pandé mendi wekid oné ndékok.
7Ai céing ata poli matan, hia poli ledo oné mai ndékokn.
8Jari, ai ité poli mata agu hi Kristus, imbi lité te ité mosé kolé agu Hia.
9Ai pecing lité du hi Kristus polig to’o kolén oné mai ata mata, Hia toé manga mata kolén. Mata toé manga kuasan kolé oné Hia.
10Ai mata Diha, mata latang te ndékok, cangkalin latang te tédéng lén, maik Hia moséy, mosé latang te Mori Keraéng.
11Ného nggitu kolé latang te méu: Méu poli matas latang te ndékok, maik mosém latang te Mori Keraéng oné hi Kristus Yésus.
12Landing hitu nahé ndékok néka manga kuasan kolé oné weki hitut matay, kudut méu néka kolé lorong ngoéng diham.
13Méu néka téi wekis oné ndékok kudut paké ného harat nai, maik téi taung wekis oné Mori Keraéng kudut ciri harat de sanggéd molor.
14Ai ndékok toé manga kuasan kolé latang te méu, ai méu toé manga be-wa mai wintuk Taurat, maik be-wa mai tabing de Mori Keraéng.
Sua Tarad Mendi
15Co’o weli ga? Ngancéngt ité pandé ndékok, ai ité toé be-wa mai wintuk Taurat, maik be-wa mai tabing? Toé kolé nggitu!
16Asa toé baé le méu te méu condo wekis oné cengata ata ného mendi kudut lorong hia, méu te ciri mendi data hitum, agu paka lorong tu’ung le méu. Aram hitu ndékok te ba méu nggere-oné mata, ko hitu muing junggu te ba méu nggere-oné selamak?
17Maik naring ga Mori Keraéng! Danong méu tu’ung mendi de ndékokm, maik te ho’on méu ali nai di’as poli lorong toing hitut caing oné méu.
18Méu poli céla oné mai ndékok, agu ciri mendi te pandé molor.
19Le gejék de manusia aku curup ho’o, ai toé danga pamot le méu. Cama ného méu poli condo wekis te ciri mendi de ndékok agu itang, ata dadé méu nggere-oné itang, nenggitu kolé méu te ho’on, paka condo wekis ciri mendi te pandé molor ata dadé méu nggere-oné selamak.
20Ai du méu ciri mendi de ndékokm, méu ledo oné mai ngoéng de Mori Keraéng.
21Wua apa ata pua de méu oné mai sanggéd situt pandé ritak méu te ho’on? Cemoln sanggéd taung situ te ba méu nggere-oné mata.
22Maik te ho’on du poli célas méu oné mai ndékok, agu du méu poli ciri mendi de Mori Keraéng, méu tiba wua ata dadé méu nggere-oné mosé nggeluk. Cemold taung situ méu tiba mosé tédéng lén.
23Ai lahé de ndékok hitu mata, maik widang de Mori Keraéng mosé tédéng lén, oné hi Kristus Yésus Mori dité.