Dual PanelNdékok Le Lema
1Asé-ka’é ata momang daku, néka do bail oné-mai méu ngoéng ciri guru. Pecingp le méu, ali ciri guru, ité te bicart céwé mésé oné-mai ata bana.
2Ai sanggéd ité manga salad oné sanggén cao-ca; céing ata toé manga sala oné curupn, hia hitu ata besik, ata ngancéng wi’uk kolé sanggéd wekin.
3Ité na’a rapa oné mu’u de jarang, wiga hia lorong ngoéng dité, ali hitu ité ngancéng wi’uk wekin.
4Lélo kolé sanggéd kepal, koném po méséd agu pandé wulis ali buru warat, maik ngancéng wi’uk kaut le haju kemudi koé, lorong ngoéng dihat caun.
5Nenggitu kolé dé lema dité, koném po koén, maik ngancéng pandé angos latang te sanggéd cao-ca ata méséd. Lélo dé, koném po koén api, maik ngancéng pandé muntung poco mésé.
6Lema hitu cama ného apiy. Hia dé pu’un da’at te wécak da’at situ oné sanggéd taung weki dité. Le api wa-mai neraka hia pandé muntung taung sanggéd weki dité.
7Sanggéd taung kaka mila, kaka lélap, agu sanggéd kaka horos wa tana agu kaka oné tacik ngancéng pandé merups agu poli merupd le manusia.
8Maik toé kéta manga cengatan ata ngancéng pandé merup leman. Lema dité hitu cama ného kaka rani ata toé ngancéng petun, hia penong ali rasung te pandé mata laing.
9Le lema, ité naring Morin agu Ema dité; le lema hitu kolé, ité mawang haé atad hitut poli dédék lorong tara de Mori Keraéng.
10Oné-mai mu’u hitu kin, tuad berkak agu mawang. Asé-ka’é daku, néka manga pandé nenggitu.
11Asa léng, oné-mai ca ulu waé, ngancéng cengkali pé’angn waé belé agu waé pa’it ko?
12Asé-ka’é daku, ngancéng néng ca pu’u ara cir wua zaitun, ko ca pu’u anggor cir wua aray? Nenggitu kolé mata waé cerak toé ngancéng pé’ang waé belé.
Nggalas Éta-Mai
13Émé manga ata nggalas agu gauk di’a, hia hitu poro toto oné mosén le pandé di’a ali nggalas agu lembak nai.
14Émé méu manga beti-nai agu haé ata, ko céwé nuk weki ru, néka mésé-nai landing le nggalas hitu, ai le hitu méu nggopét te dungkang molor.
15Hitu toé nggalas éta mai, maik nggalas de lino, ngong nggalas de belek da’at agu nggalas de jing da’at.
16Ai nia manga beti-nai agu ata, ko nuk weki ru, nitu mangan ngai-ngaok agu sanggéd taung pandé da’at.
17Maik nggalas éta mai, laring cain kéta nggélok taran, poli hitu ngoéng te hambor, lumu, lorong, lembak nai agu sanggéd pandé di’a, toé kambé agu pisik.
18Agil hitu cir oné-mai hambor-libur, ata wécak lisét momang hambor-libur.