Dual Panel1Lepá nenda, itsókungan ai sia epat samalaika sipuririó ka epatnia matat rusa sipuboboroi ka polak. Pet-petrangan leú et ka epatnia matat rusa ka polak, bulé buí ipuboroi rusa ka polak elé ka laut, elé ka paloina-loiná.
2Lepá mitsá itsókungan sara malaika bagei barana ka kabelaiat sulu. Ai aiabbit segel sibara ka Taikamanua sipuririmanua. Iageti pugereinangan leú et isogai sia samalaika siepat sisiló gege sibara ka tubut Taikamanua masipakataí polak sambat koat.
3Kuanangan ka matadda malaika néné, "Bá pakakataí kam boikí polak sambat manua, elé paloina-loiná, ké tápei akukau kai toggaiat segel ka tou-toura sapakoiniet Taikamanuanta."
4Oto poiliatnangan ka tubukku kababaradda 144.000 sia igidda sikau toggaiat segel Taikamanua ka tou-toura. Sia néné sirurú ka sipulu rua ngasuku ka bangsa Israel;
5ka senen suku tualá 12.000 sia igidda. Iaté sibara ka suku: Jahuda, Ruben, Gat,
6Aser, Naptali, Manase, Simon, Lepi, Isasar,
7sibara ka suku Sebulon, Josep, sambat sibara ka suku Benyamin.
8(7:7)
9Lepá mitsá kinerekkungan nia, iageti itsókungan sirimanua simakopé igi, bulat tá tuagai nuntutda. Sia néné sibara ka senen bangsa, suku, negara, sambat nga-nga. Ai sia musasaraubá simabulau samba ai kakabeira katsaila rorot poula, puriórangan leú et sirimanua simigi néné, ka matat uddenan purimataat samba ka matat Togat Biri-biri.
10Iageti pugereirangan masisogaaké, "Ka Taikamanua lé ibabara puaragatta, sipuuuddet ka uddenan purimataat samba sibara ka tubut Togat Biri-biri!"
11Sangamberidda samalaika murió masibokkó uddenan purimataat sambadda tai bajá samba leú et samakluk siepat. Iageti purappoddangan samalaika ka matat uddenan purimataat paniddogiddangan leú et Taikamanua.
12Oto pusogaddangan leú et samalaika, rasogaaké, "Amen! Tuumun'aké lé Taikamanuanta sipululatsat sambat simasiku paatuat. Mateú tukau ka tubunia pusurakat sambat penghormatan. Ai ka tubunia gege samba leú et ron teret buru-burú! Amen."
13Iageti nou-nounangan aku sara ka talagadda tai bajá, pelé nga-ngania, "Kasonia sipusasaraubá simabulau néné; kaipa arabara?"
14Kuakkungan nia ka matania, "Tá té kuagai, Tuan. Kam lé te Tuan, iagai sia." Oto kuanangan nia ka matakku, "Sia té néné sipaarau ka paoreat sikataí besí. Arapalináan leppeira, arabulauakéan ka logau Togat Biri-biri.
15Iaté lulunia rapuririó ka matat uddenan purimataat Taikamanua, samba rapaniniddou ka tubunia, sinágó sambat sinoibó ka Uman Taikamanua. Samba memei nia ka talagadda, ka sia sikukuddu ka uddenan purimataat nenda, isakkeri sia.
16Táan raoorik laje sambat oggou; táan raoorik sulu elé rakat sulu,
17aipoí Togat Biri-biri sikukuddu ka talagat uddenan purimataat, ijajago sia. Palulunangan leú et sia ka bubuakat purimanuaiat. Ipoposa sangamberi eludda, Taikamanua."