Dual Panel1Teinefa fogora iwa inoku ifos rot yeyin mar oga era mar okowu ongga angh gij ifekesa fogora imorka mar koma skoita hakim erek komo. Jeska hakim koma bera erek rusnok ongga runougif gu Allah guru. Ongga tenten bera iwa ongga Kristen imohoturuma noba yuga ojga rot yeyin mar koma gu isinsa ojgomu.
2Iwa inodou ofoj joug rot guru oida mimif ongga Kristen mumoga ojga rot rusnok mebif nomnaga rerin rita mar ongga oska si. Mimif mumotunggom mar koma morototuma jera Yesus gij mona ongga Ofa ongksons en. Jefeda erek iwa yuga ojga rot yeyin mar oga ongga angh gu ifekesa gu isinsa ojgomu, beda koma bera erek mar ongga osufou nou iwa ojgomu.
3Dugun deika, gij mona ongga Yesus ongksons en fob, beda mimif tein mumoga ojga rot malaikat-malaikat tein rerin rita mar ongga oska si. Noba mar koma bera ofoufem ekirsa jeska yeyin mar oga jera mar okowu insa koma ongga angh gu ifekesa. Jefeda erek iwa yuga ojga rot yeyin mar oga jera mar okowu ongga angh jah isinsa ifekesa, beda koma bera erek osufou ojgomu
4Erek yeyin ebirfager Mod Ari rudou eskes jefeda runoga ojga rot mar insa koma guru, beda yeyin rusnok ongga erek runofoka aksa guru bera ruga ojga rot mar insa koma ojgomu. Jeska rua risinsa tein bera rudou efesis ekirsa jeska hakim koma ongga runougif gu Allah guru rot mar insa koma ojgomu.
5Didif dinagot rot mar insa kef jeskaseda duh mojen gu iwa ojgomu. Jeska erek yeyin rusnok ongga rudou efesis nou bera erek runofoukou guru, tina didif dusujohu rot oida erek osnok egens ai era egeka jah suma bera adaij nou oga ojga rot yeyin mar jah suma ei?
6Tina iwa ineita mar erek koma tein guri! Jeska iwa orohrus yeyin ihuj egens jeska ifekesa skoita hakim rot efen mar okowu ojgomu. Noba ongga oska ekirsa bera, hakim koma bera erek rua ongga runougif gu Allah guru!
7Mar oga jera mar okowu insa koma ongga ah gu ifekesa bera orocunc rot oida mar ongga iwa insujohu rot gij idou efesi bera erek oska ros. Jefeda erek idou eskes fogora yunoga ojga rot yeyin mar okowu insa koma guru, beda iwa irons mar oga jera mar okowu insa koma ah ojgomu. Noba inorka mar koma skoita hakim insa koma tein guru. Jeska koma bera erek oska ekirsa.
8Tina iwa intunggom mar ongga oska ekirsa deika, jeska iwa bera ongga yucuwei mar fogora irokrusa yeyin yuhujir ongga ruroru Yesus tein.
9Iwa inejginaga rot oida rusnok ongga rita mar ongga oska bera runoira morototuma jera Allah efen rusnok gij mona ongga Ofa ofoka ereij keingg rusnok nomnaga fob guru ei! Enadaij nou iwa yucuwei mar gu isinsa erek koma guru. Jeska rusnok ongga risiri morototuma ni, rugif gu mar ongga tenten guru ni, risiri rot egema efen mohona ni, runer ongga ruckahtah rot runer enjgineg fogora risiri morototuma rot fifi ni,
10rusnok ongga rukoreka mar ni, rudou eftirir keingg mareibra ofoukou ni, ribirfaga erebibei rot mofut efeyi ni, ruhurmei mar gij rusnok enjgineg ni, rurokrusa rusnok rot rerin mareibra ni, rua koma nomnaga bera runoira jera Allah efen rusnok gij mona ongga Ofa ofoka ereij keingg rusnok nomnaga jinaga guru.
11Noba rineya jeska iwa bera rita mar erek koma sis roso. Tina Allah ontunggom iwa erek rusnok ongga rudou ebsi komowa fob. Noba iwa tein ija erek rusnok ongga Allah esinsa efen ojgomu. Jefeda ebeibeyaif Allah osujohu rot oida iwa bera erek rusnok ongga rerin mar ongga oska oskiyai tein guru. Noba iwa inja erek koma oisouska mar ongga Tuhan Yesus Kristus ontunggom tumu mega salib nou iwa jera oisouska Efena Ebsi Allah ongga engker gij idou efesi tein.
12Sis fob bera iwa ingg rot mar ongga didif danggot erek kef oida, "Allah onsuwa didif jeska dedin mar ongga oska fob. Jefeda adaij nou didif duroru mar meidu ongga dudou os rot ojgomu." Erek koma tina, mar nomnaga ongga didif dudou os rot bera erek eneya onoufa eteb nou didif tein guru. Jefeda erek didif dutunggom mar ebireira ongga dudou osos rot noba ongga enekirsa jeska Allah oga guru, beda koma bera onoska guru. Tina didif dunorons rot mar egema tein oroku dudou efesi skoita mar erek koma ojgomuja guru.
13Erek koma tina rineya jeska iwa ragot rot mar egens ongga orocunc erek kef oida, "Allah ontunggom maat nou mutkonu, noba Ofa ontunggom mutkonu nou maat. Noba gij mona kahma bera Allah omohoda mar insa koma nomnaga fogora omorowora rot ojgomu." Iwa ira mar ongga orocunc erek insa koma fogora isujohu rot oida adaij nou iwa ita mar ebireira ongga idou osos rot ojgomu. Tina koma erek isiri morototuma jera rujager ebireira tein! Noba koma bera erek oska eteb fob. Allah bera ontunggom mifmin mutkonu nou maat. Tina Ofa onotunggom mifaga jeskaseda mita mar ebireira rot ojgomuja guru. Ofa ontunggom mifaga jeskaseda murofij Tuhan esinsiyai ojgomu. Noba Ofa, ongga erek mifmin Tuhan, bera ofoka ereij keingg mifmin mifaga tein ojgomu.
14Erek koma noba oisouska Allah efen owesa efek bera Ofa omfra Tuhan Yesus jeska agos fob. Noba oisouska efen owesa efek insa koma beda Ofa omofra mimif tein jeska manggos si. Jefeda enadaij nou mimif mutunggom mar ebireira ongga mudou os rot mifmin mifaga ojgomuja guru.
15Idou ah keingg rot oida yeyin idou bera injerek egens jera Kristus fob. Jefeda ebeibeyaif Ofa bera ongga ofoka ereij keingg iwa jera yeyin ifaga tein. Erek koma jefeda erek osnok egens ongga efen efaga ongga Yesus ofoka ereij keingg fob bera esiri morototuma jera rujaga ongga rija motu rot fifi, beda koma bera erek oska eteb fob! Tina iwa inosujohu erek koma guri.
16Beda iwa idou ah keingg rot oida erek orna egens esiri rot rujaga rija motu egens, beda koma erek godou morototuma erek egens tein. Noba mimif mijginaga rot erek koma jeska runggu gij Mar Efeyi Ebsi rot oida, "Gij mona ongga orna egens jera efen mohona gefaga erek egens beda godou efesi tein eja morototuma erek egens."
17Tina gij mona ongga osnok egens odou eja erek egens morototuma jera Tuhan, beda ofa efen efena tein eja erek egens jera Efena Ebsi Allah.
18Erek koma jefeda iwa ibes ifaga jeska mar ongga oska efekeifa erek insiri morototuma ojgomu. Jeska mar ongga oska koma ongga rusnok runtunggom bera enecirej rerin rifaga ojgomu guru. Tina mar koma bera encirej rerin rudou efesi tein. Noba koma enadaij nou guru. Jeska rudou efesi bera erek egens jera Kristus fob.
19Iwa ijginaga rot fob oida ifaga bera erek mod egens ongga Efena Ebsi Allah engker gij. Noba Allah esinsa bera ongga ombk Efena Ebsi koma skoita iwa fob. Jefeda yeyin ifaga koma bera nou isinsa guru, tina ifaga koma bera nou Allah esinsiyai ojgomu.
20Allah era mar ongga efen efera osok eteb fogora erengk iwa fob. Noba mar ongga efen efera osok koma bera Yesus Kristus ongga anggos tumu mega salib nou iwa erek koma. Jefeda iwa ira ifaga ongga ongkoska rot mar koma ojgomu fogora irougif gu Allah gij mar koma nomnaga.