Alkitab Mobile SABDA
[VER] : [MEYAH]     [PL]  [PB] 
 <<  1 Petrus 4 >> 

1Erek koma jefeda iwa isejah idou efesi erek ahais rot mar ongga eita efera okora gu iwa ojgomu. Jeska sis fob Yesus eita efera okora tumu efen efaga nou mimif tein. Noba idu ongga eita efera okora rot mar oufamofa ongga ofa ontunggom fob, beda koma orocunc rot oida ofa engkikif jeska mar ongga oska rot tenten fob.

2Jefeda ofa onororu mar ongga ofogog ongga rusnok mebif rundou os rot deika guru. Tina ofa eker jeskaseda ororu meidu ongga Allah ondou os rot ojgomu.

3Sis fob bera iwa ita mar ongga oska morototuma erek rusnok mebif rundou os rot tein ojgomuja. Rua ruroru mar ongga oska efekeifa ongga angh gij rudou efesi ojgomuja ni, rua ruckahtah morototuma ojgomuja ni, rudou erebibei rot mofut efeyi ni, risiri morototuma ojgomuja ni, rugif gu mar ongga oska eteb ojgomuja ni, rujohca mar ongga oska efekeifa ni.

4Noba ebeibeyaif rua rudou oubsaha eteb jeska iwa inosoka ebeirens gij rerin mar ongga oska insa koma rot idou ongga erebibei morototuma jera rua deika guru. Jefeda rua ruga oruh iwa rot ojgomu.

5Tina rua rumot jah Allah odou rot gij mona ongga Ofa oga ojga rot rua osok gij rerin rita mar ongga oska nomnaga si. Beda Ofa emaha okum eteb keingg rua rot. Ofa ensejah nou ofra okum eteb keingg rusnok nomnaga ongga ranggos fob jera rusnok ongga rifena ebah ros tein rot rerin rita mar ongga oska.

6Sis fob bera rusnok ruftuftu rot Allah oga ongga oufamofa skoita rusnok ongga ebeibeyaif ranggos fob. Orofosutut osnok egens egens nomnaga rimagos, beda rerin riteij ah insa koma oisa ojgomu fob. Tina rua ruftuftu rot oga ongga oufamofa gu rusnok sis fob jeskaseda rua tein rimesma eiteij ah ongga efeinah morototuma erek Allah efen ojgomu. Eiteij ah koma bera ah aibin ojgomuja.

7Ebeibeyaif mona ongga enja ejgwaga bera ensaga doida fob. Erek koma jefeda iwa yut joug idou efesi rot ahais ojgomu. Yut joug idou efesi jeskaseda inosoka gij mar ongga oska rot ebeirens guru. Iwa ita mar erek koma jeskaseda yum iteij gu Allah rot koisoisa ojgomuja.

8Ongga ofoufemfem bera, iwa idou omokorema rot ahais ojgomuja. Jeska rusnok ongga rita mar erek koma bera rudou eskeira mejerema fogora runotkonu oska rot rusnok enjgineg ongga runtunggom mar ongga oska gu rua jinaga guru.

9Noba iwa icunc idou ongga oufamofa moguma gij mona ongga rusnok runjogog iwa ojgomu. Iwa isum onoskusk rot rusnok insa koma guru.

10Orofosut osnok egens egens era owesa efek ongga Efena Ebsi Allah eita gu ofa fogora orofij rusnok enjgineg tein ojgomu. Iwa ita mar erek koma rot iskusk erek rusnok ongga rinsma owesa efek ofoukou jeska Allah fob. Jeska Ofa eita owesa efek gu iwa rot efen odou ongga oufamofa eteb rot iwa.

11Iwa ongga yuftuftu mar gu rusnok, beda yuftuftu mar rot iskusk ojgomu erek rusnok ongga ranggot mar rot Allah efen oga. Noba idu ongga omfij rusnok enjgineg, beda ofij rot owesa efek koma ongga ofa ensma jeska Allah tein. Ofa otunggom mar erek koma nomnaga oisouska Yesus Kristus efen owesa efek jeskaseda gij mar nomnaga beda rusnok rumofra Allah ofoka erek aksa eteb tein. Mimif mudou os jeskaseda rusnok nomnaga rufra Ofa efen ofoka erek aksa eteb. Noba mimif mudou os jeskaseda Ofa ofoka ereij keingg mar nomnaga rot owesa efek eteb ongga ah aibin ojgomuja tein, ainsoma.

12Edohuji ongga dudou okora rot, iwa idou onoubsaha rot mar koma ongga ereneni iwa fogora ita ifera okora rot guru. Jeska mar koma ongga ereneni iwa bera enerek mar ongga efeinah guru.

13Tina iwa idou efaga ouka rot mar insa koma ojgomu, jeska koma erek iwa ita efera okora morototuma jera Yesus Kristus tein. Iwa ita mar erek koma jeskaseda gij mona ongga rusnok nomnaga rik Ofa ongksons en gu mebif fob, beda yeyin idou emerirei eteb rot efen ofoka ongga aksa gij mona insa koma.

14Noba erek rusnok ruga oruh iwa jeska iroru Yesus Kristus, beda Allah emeita oufamofa eteb gu iwa rot mar insa koma tein. Rua rudou os rutunggom mar ongga oska insa koma skoita iwa jeska Efena Ebsi Allah engker gij idou efesi fob.

15Jefeda ongga oufa nou iwa bera ita ifera okora rot mar ongga oufamofa ongga iwa intunggom fob ojgomu. Jeska rusnok ongga rutunggom mar ongga oska erek ragob rusnok enjgineg ni, rukoreka mar ni, ruromohohuma jera rusnok enjgineg rerin mar ni, rita mar ongga ofogog ni, rua bera rimeita rifera okora jeni rot mar ongga rua runtunggom insa koma si.

16Tina erek iwa ita ifera okora jeska iwa iroru Yesus Kristus fob, beda mojenen iwa rot guru. Tina iwa isitit gu Allah rot ojgomu, jeska iwa bera rusnok ongga ruroru Yesus Kristus rot tenten fob.

17Ebeibeyaif bera Allah ensejah nou omoga ojga rot rusnok nomnaga rerin rita mar ongga oufamofa jera rerin rita mar ongga oska tein. Noba Allah omoga ojga rot mimif ongga erek efen rusnok ebeibeyaif fob. Jefeda gij mona ongga Ofa oga ojga rot rusnok ongga rukoja efen oga ongga oufamofa, beda Ofa omofra mar okum eteb ekirsa keingg rua si.

18Jeska Allah anggot gij Mar Efeyi Ebsi erek kef oida, "Enadaij nou rusnok ongga ruroru mar ongga oufamofa eteb jeskaseda ruskotu risinsa jeska rerin mar ongga oska guru. Tina teinefa rot rusnok ongga runougif gu Allah guru, jera rusnok ongga ruroru mar ongga oska ojgomuja. Erek rua rireni tina rineita eiteij ongga efeinah jinaga guru."

19Erek koma jefeda rusnok ongga rita rifera okora ororu Allah odou ejginaga rot bera ruh rudou efesi gu Ofa, noba rita mar ongga oufamofa ojgomu. Jeska Ofa bera ongga ontunggom mar nomnaga.


  Share Facebook  |  Share Twitter

 <<  1 Petrus 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel