Dual Panel1Iwa bera erek rusnok ongga rumfij Allah morototuma jera memef. Noba Allah bera oncunc efen oga ongga oufamofa gu iwa rot odou oufamofa. Jefeda memef mois gu iwa jeskaseda inaha oga ongga oufamofa insa koma jah ojgomu guru.
2Jeska runggu gij Mar Efeyi Ebsi rot mar egens ongga Allah anggot gu Yesus erek kef oida, "Gij mona egens ongga Didif dudou eskeira rot bera Didif dingg rot bebin buga. Noba gij mona egens ongga Didif dinsejah nou duskotu bua bera Didif dufij bua." Jefeda Didif duis gu iwa rot oida Allah bera odou eskeira rot mona deisef tein ojgomu. Noba gij mona ebeibeyaif bera Allah ensejah nou oskotu rusnok jeska rerin mar ongga oska.
3Memef meneita mar ongga eragou joug rusnok fogora runororu Allah oga deika guru, erek koma guru. Memef meita mar ongga oufamofa jeskaseda rusnok enjgineg rudou onoska rot mar ongga memef moftuftu rot guru.
4Tina ongga tenten bera, memef motunggom mar ongga erek oufamofa ojgomu jeskaseda morocunc gu rusnok enjgineg rot oida memef bera erek rusnok ongga rumfij Allah rot tenten ojgomu. Noba memef meita mar erek koma rot modou ongga ahais ojgomuja gij mona ongga mar okum ah keingg memef ni, mar okum ereneni memef ni, mar okum otunggom modou emeesa rot ni ojgomuja.
5Noba gij mona ongga rusnok rubu memef ni, era gij mona ongga rusnok ruga emaksema rot mar ongga memef montunggom fob ni, era rikris memef jah mod oskusk ni, era gij mona ongga memef mefarur gij mar rot ahais ni, era gij mona ongga modou efeneinei rot mar ongga memfarur gij ni, era gij mona ongga mosona eteb ongk memef ni, beda mar insa koma nomnaga orocunc rot oida memef bera erek rusnok ongga rumfij Allah rot tenten ojgomu.
6Noba gij mona ongga memef meita mar rot modou ongga ebsi komowa ni, era rot modou ongga ebriyi gij Allah efen oga ni, era memef meita mar rot modou ongga ongkoska skoita rusnok enjgineg oisouska Efena Ebsi ongga engker gij modou efesi ni, era motunggom mar oisouska modou ongga okora rot rusnok erek tenten ni,
7era moftuftu mar osok gij Allah oga rot tenten oisouska Ofa efen owesa efek ongga angh gu memef ni, beda ahah Allah eiteij bera memef motunggom mar insa koma nomnaga oisouska modou ongga efen mar ongga oska oskiyai tein guru. Mar insa koma bera ongga ot joug memef jeskaseda menesiri gij mar ongga oska guru.
8Erek koma noba askesi memef motunggom mar nou Allah bera rusnok rineya rugif gu memef noba rineya rudou oska rot memef tein. Noba rineya ruga oruh memef, tina rineya risitit mefmen mofoka tein. Noba memef meita mar ongga tenten ojgomu, tina rusnok rucunc memef erek rua ongga rurokrusa rusnok enjgineg ojgomu.
9Allah jera efen rusnok rijginaga rot oida didif bera erek rasul egens ongga tenten ojgomu. Tina rusnok rineya rusujohu rot oida didif bera enerek rasul ongga tenten guru. Noba erek doida memef manggos rot mar okum ongga encirej memef, tina Allah omfij memef jefeda memef mefena ebah ros. Noba rusnok rumfra mar okum keingg memef, tina menagos rot guru.
10Noba rusnok raha mar okum keingg memef, tina memef modou efaga ouka rot ojgomu. Noba memef merek rusnok ongga rufojingki ojgomu, tina mar ongga memef moftuftu gu rusnok bera ereita mar ofoukou ongga erek ongkoska eteb gu rua. Noba memef mefmen mareibra ofoukou guru, tina memef mesma mar ongga oufamofa eteb jeska Allah ojgomuja.
11Edohuji ongga ingker gij kota Korintus, didif dudou okora eteb rot iwa, jefeda didif duncunc dudou efesi rot ongkas skoita iwa gij surat egens kef fob. Noba didif dinedemi mar egema tein jeska iwa guru.
12Noba memef monof joug modou efesi rot iwa guru. Tina iwa bera ongga yumf joug idou efesi rot memef fob.
13Erek koma tina ebeibeyaif bera didif dagot mar skoita iwa erek didif dagot mar skoita dedin edeser ojgomu. Jefeda iwa icunc idou ongga okora rot memef morototuma erek memef tein moncunc modou ongga okora rot iwa fob.
14Enadaij nou iwa ibiedi erek egens jera rusnok ongga runougif gu Allah guru. Jeska rusnok ongga ruroru mar ongga tenten ojgomu bera erek toga jeska rusnok ongga runororu mar ongga tenten guru. Enadaij nou iwa ongga erek eisa ibiedi erek egens jera rusnok ongga erek motkobah jinaga guru.
15Erek koma tein, enadaij nou Yesus Kristus oitij morototuma jera mar ongga Bilis efen jinaga guru. Noba rusnok ongga ruroru Allah rot tenten bera rerin mar ongga morototuma erek rusnok ongga runororu Allah rot tenten guru erek jinaga guru.
16Noba enadaij nou mimif mibiedi erek egens jera mar ongga oska ongga rusnok enjgineg rugif gu jinaga guru. Jeska mimif bera erek Allah efen mod ongga Ofa engker gij ojgomuja. Noba Ofa bera ongga efena ebah rot ah aibin. Noba Ofa esinsa bera agot rot erek kef oida, "Didif dimeker gij rudou efesi, beda dimecira morototuma jera rua. Noba Didif dimeja erek rerin Allah. Beda rua rimeja erek dedin rusnok."
17Erek koma jeska Tuhan agot rot mar erek kef tein oida, "Iwa irogna jeska rusnok koma, noba ikeba isinsa jeska rua ojgomu. Noba inoromohohuma jera rerin mar ongga oska egema tein deika guru. Beda Didif dumoroun iwa si."
18"Beda Didif dimeja erek yeyin ika. Noba iwa imeja erek dedin edeser runer jera rujager." Tuhan Allah, ongga efen owesa efek eteb, bera agot rot mar erek koma.