Alkitab Mobile SABDA
[VER] : [MEYAH]     [PL]  [PB] 
 <<  2 Korintus 9 >> 

1Didif dinefesij osok gij mar insa koma skoita iwa deika guru.

2Jeska didif dijginaga rot oida iwa idou os yufij rusnok insa koma tein ojgomu. Noba didif dinsitit rot ifoka osok gij mar insa koma skoita rua ongga ringker gij monuh Makedonia erek ofoukou fob. Didif danggot gu rua oida, "Askesi tahun sis fob onjoros deisef tein bera rua ongga kota Korintus rinsejah nou rufij rusnok ongga rufojingki rot rerin mareibra." Noba ongga tenten bera, rusnok ongga ringker gij monuh enjgineg tein ringk rot teinefa iwa idou os itunggom mar insa koma fob. Jefeda rua tein rudou os rufij rusnok ongga rufojingki erek iwa ita sis fob.

3Noba didif dumobk mifmin muhujir rugomu insa koma skoita iwa jah kota Korintus jeskaseda ruhoturu mareibra ongga iwa imekeba nou rusnok ongga rufojingki. Beda koma omorocunc rot oida mar ongga memef mesitit rot iwa gu rusnok enjgineg gij monuh Makedonia bera erek rourou guru. Jeska didif dijginaga rot oida gij mona ongga rua rinsaga jah suma, beda iwa insejah nou rita mar insa koma gu rua si.

4Era, erek rusnok jeska monuh Makedonia meja morototuma jera didif skoita iwa, tina iwa inekeba mareibra insa koma enesi, beda mojen didif eteb rot. Noba mojen iwa eteb tein rot mar ongga didif dinsitit rot osok gij iwa skoita rua sis fob.

5Jefeda didif dusujohu rot oida didif dumobk muhujir rugomu insa koma jeskaseda rija okag rot didif skoita iwa. Beda rua rumohoturu mareibra insa koma ongga iwa yanggen rot oida imeita sis fob. Noba gij mona ongga didif dinsaga jah suma, beda mareibra ongga iwa ihoturu fob bera insejah nou ita gu memef ojgomu. Beda koma tein omorocunc rot oida iwa idou os yufij ojgomu, noba erek rusnok enjgineg rineradgodu iwa rot ebeirens gij mona insa koma guru.

6Erek koma jefeda iwa isujohu rot mar kef ongga erek orocunc fog: Rusnok ongga rirefa rerin maat efej erek oskiyai ojgomu bera rua rimesma rerin maat efek tein ongga erek oskiyai ojgomu. Noba rusnok ongga rirefa rerin maat efej erek ofoukou bera rua rimesma maat efek ongga erek ofoukou doska tein. Erek koma tein, rusnok ongga rudou agei rerin mareibra ofoukou bera rikeba mareibra erek oskiyai ojgomu. Beda gij mona kahma bera rusnok enjgineg rumofij rua tein erek oskiyai ojgomu.

7Jefeda orofosutut osnok egens egens osujohu rot koisoisa osok gij efen mareibra egaho ongga ofa emekeba rot rusnok enjgineg ojgomu. Beda ofa ekeba mar koma rot odou ongga oitij rot ojgomu. Noba ofa odou enagei rot mar koma guru, era rusnok enjgineg rineradgodu ofa rot guru. Jeska Allah odou eskeira rot rusnok ongga rikeba rerin mareibra oisouska rudou ongga eskeira rot ojgomu.

8Noba Allah efen owesa efek ongga adaij nou eita mareibra nomnaga ongga iwa idou ocosu rot ojgomu. Ofa omotunggom erek koma jeskaseda yeyin mareibra ongga adaij nou iwa ojgomuja. Beda yeyin mareibra insa koma efen ofod adaij nou fogora irofij rusnok enjgineg rot tein.

9Koma tenten ojgomu, jeska runggu gij Mar Efeyi Ebsi rot oida, "Rusnok ringkeba rerin mareibra ofoukou gu rua ongga rufojingki, Allah omocunc rua erek rusnok ongga rerin mar ongga oska oskiyai tein guru."

10Allah bera ongga ofij rusnok rot maat efej jeskaseda rimerefa gij rerin mekeni. Noba Ofa bera ongga ofij rusnok rot rerin maat jeskaseda rimet maat efema tein. Jefeda erek koma tein, Ofa omofij iwa rot yeyin mareibra tein si. Noba Ofa omogun yeyin mareibra koma dokun deika ojgomuja. Beda oisouska idou ongga efen mar ongga oska jinaga guru bera iwa imekeba yeyin mareibra gu rusnok enjgineg tein.

11Allah omofij iwa rot yeyin mar nomnaga ongga erek ofoukou ojgomuja jeskaseda adaij nou iwa yumfij rusnok enjgineg rot mar insa koma ojgomuja. Noba gij mona ongga memef morka mareibra ongga iwa ikeba insa koma nou rusnok enjgineg, beda rua rumois oufamofa eteb gu Allah rot.

12Noba mar insa koma ongga iwa intunggom bera erek irofij rusnok enjgineg ofoukou. Noba ongga oufa ekirsa deika bera mar koma ereita rusnok rufoukou rudou efesi fogora rimesitit gu Allah rot efen oga tein.

13Noba rua rimesitit gu Ofa rot teinefa iwa yumfij rusnok ongga monuh Yudea jera rusnok enjgineg tein fob. Erek koma, tina ongga oufamofa ekirsa bera rua rumois oufamofa skoita Allah rot iwa tein si, jeska mar ongga iwa intunggom insa koma bera orocunc rot oida iwa iroru jeni Yesus Kristus oga ongga oufamofa rot tenten fob.

14Beda rua rumom riteij rot ahais skoita Allah nou iwa ojgomuja. Jeska Allah ocunc efen odou ongga oufamofa eteb skoita rua oisouska mar ongga iwa intunggom nou rua fob.

15Mimif nomnaga tein muis oufamofa eteb skoita Allah, jeska Ofa obk efen Efesa skoita mimif sis fob. Noba koma bera mar ongga erek ongkoska eteb ekirsa jeska mar nomnaga.


  Share Facebook  |  Share Twitter

 <<  2 Korintus 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel