Alkitab Mobile SABDA
[VER] : [MEYAH]     [PL]  [PB] 
 <<  2 Tesalonika 2 >> 

1Edohuji, memef modou os magot mar gu iwa osok gij mona ongga mifmin Tuhan Yesus Kristus omoksons en deika. Gij mona insa koma bera Allah omohoturu mimif nomnaga jeskaseda miker morototuma jera Ofa.

2Tina rusnok enjgineg ranggot rourou oida Yesus Kristus bera ongksons en fob ojgomu. Rua ragot oida Allah oncunc rot mar insa koma gu rua gij rudou efesi fob. Noba rineya tein ragot oida memef bera monggu rot mar insa koma tein gij mefmen surat egens fob. Tina koma bera tenten guru. Jefeda iwa idou enemeesa rot mar ongga rucuwei rot insa koma guru.

3Gij mona ongga rusnok rudou os rurokrusa iwa osok gij mar insa koma, beda iwa inororu rerin ruga insa koma jinaga guru. Jeska mar ofoka egeka bera emecira rot sismeni fog, beda Yesus Kristus omoksons en si. Mar ofoka egeka koma bera erek kef: Rusnok rufoukou rumokoja Allah noba rudou eskes rot efen oga. Beda osnok egens ongga eretei rot Allah oga nomnaga omorogna si. Sis fob Allah ensejah nou eij ofa gij mahmei meren.

4Ofa emeretei rot mar nomnaga ongga Allah ontunggom fob. Noba Ofa emeretei rot mar nomnaga ongga rusnok runtunggom gij mona ongga rua rugif gu Allah tein. Beda ofa omofra esinsa efen ofoka erek aksa ekirsa jeska Allah ofoka fogora ofa omoira gij Mod Allah beda ocunc esinsa erek Allah ojgomu.

5Iwa ijginaga rot fob oida didif dimfesij rot mar insa koma gu iwa gij mona ongga didif dingker jera iwa ros.

6Noba ebeibeyaif iwa ijginaga rot mar ongga eragou joug osnok egens ongga ofogog insa koma jeskaseda onorogna enesi. Mar koma eragou joug ofa jeskaseda ofa orogna gij mona ongga Allah oga eris rot ojgomu.

7Erek koma tina Bilis, ongga orokrusa rusnok erek wuswus jeskaseda rudou okoja Allah, bera otunggom mar koma ojgomuja fob. Tina Ofa ongga eragou joug osnok egens ongga ofogog insa koma bera emagei ofa onjoros mona ongga Allah oga eris rot. Beda Ofa omosuwa osnok egens koma

8fogora rusnok rimek ofa si. Noba gij mona ongga Tuhan Yesus ongksons en rot owesa efek eteb fob, beda Ofa emera awesi efeni orofc osnok ongga ofogog egens insa koma fogora ofa emesiri gu Yesus ojgomu. Beda ofa emeseiseifa ojgomuja.

9Erek koma, tina sismeni bera osnok egens ongga ofogog insa koma omorogna rot owesa efek eteb ongga ofa esma jeska Bilis. Beda ofa omocunc rot mar onswos ofoukou ongga orokrusa rusnok rufoukou fogora rudou oubsaha eteb rot ofa noba rumororu ofa tein.

10Ofa emera mar ongga ofogog fogora orokrusa rusnok ongga rimeja jah mahmei meren ojgomu. Rua rimeseiseifa jeska rua rukoja Allah oga ongga tenten, noba runodou os jeskaseda Allah oskotu rua jeska rerin mar ongga oska guru.

11Jefeda Allah omobk mar egens gu rua gij rudou efesi jeskaseda rua ruroru mar ongga osnok egens insa koma ocuwei rot ojgomu.

12Beda rusnok nomnaga ongga rungkoja Allah oga ongga tenten noba ongga rudou os ruroru mar ongga ofogog insa koma bera rimesma mar okum eteb jeska Allah si.

13Edohuji ongga Allah odou okora rot, orofosut mona bera memef mois oufamofa eteb gu Allah rot iwa. Jeska gij mona ongga sismeni bera Allah ocunc iwa jeskaseda oskotu iwa jeska yeyin mar ongga oska. Noba Ofa ontunggom koma oisouska Efena Ebsi ongga eita idou ongga ebsi komowa fob. Noba mar insa koma nomnaga en oisouska idou ongga ororu efen oga ongga tenten fob.

14Noba ofa enjeka iwa jeskaseda isma mar insa koma oisouska mar ongga memef moftuftu gu iwa sis fob. Ofa ontunggom mar koma jeskaseda iwa tein imesma ifoka ongga aksa eteb morototuma jera Yesus Kristus.

15Erek koma jefeda edohuji, iwa yut rot ahais gij mar nomnaga ongga memef momftuftu gu iwa jera mar nomnaga ongga memef monggu gij surat-surat gu iwa ojgomuja.

16Memef mom meiteij gu mifmin Tuhan Yesus Kristus jera mifmin mika Allah, ongga odou okora eteb rot mimif ni, ongga eisisi joug mimif ni, noba ongga ofij mimif oisouska odou ongga oufamofa rot mimif ni jeskaseda muisum gij ofa rot mona ongga ah aibin ojgomuja.

17Memef mom meiteij gu Ofa jeskaseda Ofa emeisisi joug iwa gij idou efesi noba eita owesa efek gu iwa fogora imeita mar ongga oufamofa noba imefesij rot mar ongga oufamofa tein ojgomuja.


  Share Facebook  |  Share Twitter

 <<  2 Tesalonika 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel