Alkitab Mobile SABDA
[VER] : [MEYAH]     [PL]  [PB] 
 <<  2 Timotius 4 >> 

1Yesus Kristus omoksons jah mebif deika jeskaseda oga ojga rot rusnok nomnaga osok gij rerin rita mar. Koma rot rua ongga ranggos fob jera rua ongga rifena ebah ros tein. Beda Ofa omofoka ereij keingg rusnok nomnaga erek raja. Jefeda didif duis gu bua jah Allah odou jera Yesus Kristus odou rot mar erek kef:

2Bua bifesij rot Allah oga ojgomuja. Noba bua bisejah budou efesi jeskaseda bagot rot Allah oga gu rusnok nomnaga ongga rudou os rig rot jera rusnok nomnaga ongga runodou os rig rot guru tein. Bua buftuftu rusnok ongga rineita mar ongga oufamofa guru, noba bisisi joug rusnok rot mar ongga oufamofa tein. Bua bita mar insa koma nomnaga rot budou ongga eriagamaga skoita rua. Noba buftuftu rot mar insa koma rot koisoisa tein ojgomu.

3Jeska gij mona ongga emen bera rusnok rineya rumokoja Allah oga ongga tenten si. Tina rua rimekikif jeska oga insa koma fogora rua rumohoturu Guru-Guru enjgineg ongga rumoftuftu mar ongga oska jeni rua risinsa rudou os rot ojgomu.

4Rua rinagosuit rot mar ongga tenten deika guru, tina rua rumoj rusu nou mar ongga rusnok rifesij ongga erek rourou ojgomuja.

5Erek koma tina bua Timotius, bitin budou gij mar nomnaga, noba but rot ahais gij mar okum ongga ereneni bua tein. Noba bifesij rot Allah oga ongga oufamofa gu rusnok ongga rineg rot enesi. Bua bera osnok egens ongga bufij Allah, jefeda butunggom mar insa koma nomnaga rot iskusk ojgomuja.

6Mona ongga didif dimagos bera enesaga doida fob. Noba erek osnok egens ongga era mar orougif gu Allah, beda erek koma tein dedin diteij ah bera erek mar ongga didif durougif gu Allah fob.

7Noba erek tentara efer egens ororu jeni ebirfaga oga, beda didif tein duroru jeni mar nomnaga ongga Allah oncunc gu didif fob. Noba erek osnok egens ofof eremeteima onjoros oisa fob, beda didif tein dincira gij mar nomnaga ongga Allah enjeka didif rot fob. Noba didif dunroru Allah oga nomnaga rot koisoisa fob.

8Jefeda ebeibeyaif Allah ensejah dufons ongga ongkoska eteb nou didif fob, jeska gij mona insa koma bera Allah omoroun didif erek osnok egens ongga efen mar ongga oska oskiyai tein guru. Allah, ongga oga ojga rot rusnok nomnaga oisouska efen oga ongga tenten, bera omorocunc rot didif erek koma gij mona ongga emen. Noba ofa emeita mar insa koma gu rusnok nomnaga ongga rumom rudou nou mona ongga Yesus Kristus ongksons en gu mebif si.

9Timotius, bireni rot iskusk jeskaseda bin skoita didif jah sif.

10Jeska Demas aha didif jah fob noba enja jah Kota Tesalonika. Ofa eja jeska didif erek koma jeska ofa odou os ekirsa rot mareibra ongga angh gu mebif ojgomu. Noba Kreskes tein enja jah monuh Galatia fob, noba Titus tein enja jah monuh Dalmatia fob.

11Noba Lukas esinsiyai bera ongga eneker jera didif jah sif ros. Noba buhca Markus beda buroun ofa morototuma jera bua jah sif. Jeska ofa omofij didif rot iskusk tein.

12Didif dubk Tikhikus jah kota Efesus fob.

13Noba gij mona ongga bua bin, beda burka dedin meisoufa ongga didif dangha gij kota Troas. Koma ah gij mod ongga Karpus efen. Noba burka dedin buku-buku ongga giskini jera Surat Mar Efeyi Ebsi ongga rungkuku tein jah sif.

14Aleksander, ongga otunggom mar jeska besi, ofa eita mar ongga oska ofoukou skoita Didif fob. Tina Tuhan omofra mar okum keingg ofa rot mar insa koma si.

15Jefeda bua tein but joug bisinsa rot ofa, jeska ofa bera ofogog skoita mimif rot mar ongga mimif muftuftu gu rusnok.

16Gij mona ongga didif danggot mar rot disinsa gu ebirfager ongga ranggei didif fob, beda dedin edohujir nomnaga rinja jeska didif fogora runofij didif deika guri. Beda didif duis gu Allah jeskaseda Ofa osuna rot rerin mar ongga oska insa koma ojgomu.

17Erek koma tina Allah ofij Didif fogora eita owesa efek gu didif ojgomu. Ofa ofij didif erek koma jeskaseda difesij osok gij efen oga ongga oufamofa rot ongkasmos gu rusnok nomnaga ongga erek Yahudi guru. Noba Allah oskotu didif jeska rusnok ongga ofogog doska gij mona insa koma tein.

18Didif dijginaga rot tenten oida Tuhan omoskotu didif jeska mar nomnaga ongga ofogog si. Beda Ofa omofra didif jah mebaga rot eskeiramera tein. Mimif mufra efen ofoka erek aksa eteb ojgomuja. Ainsoma.

19Didif duisu Priskila jera efen mahina Akwila. Noba didif duisu Onesiforus jera efen mohona jera efeser tein.

20Erastus engker gij kota Korintus ros, noba Trofimus maren, jefeda ofa engker gij kota Miletus ros.

21Bua bireni rot iskusk ojgomu jeskaseda bin jah sif rot ebeirens ojgomu. Jeska gij mona dektek deika guru, beda mona ongga mof meifina emesaga. Bulus ni, Pudes ni, Linus ni, Klaudia ni, jera rusnok enjgineg ongga ruroru Yesus jah sif ruisu bua.

22Didif duis gu Allah jeskaseda Ofa ofij bua noba ocunc odou ongga oufamofa eteb gu bua. Ainsoma.


  Share Facebook  |  Share Twitter

 <<  2 Timotius 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel