Alkitab Mobile SABDA
[VER] : [MEYAH]     [PL]  [PB] 
 <<  Filipi 1 >> 

1Didif Paulus jera Timotius ongga mafij Yesus Kristus bera dunogu surat egens kef skoita iwa nomnaga ongga ingker gij kota Filipi. Iwa bera irek Allah efen rusnok ongga rudou egens jera Yesus Kristus fob. Noba magef masa surat egens gu iwa ongga erek ebirfager Mod Ari tein jera iwa ongga yumfij ebirfager Mod Ari tein.

2Didif dum diteij gu mifmin mika Allah jera Yesus Kristus ongga erek mifmin Tuhan jeskaseda Ofa ocunc efen odou ongga oufamofa rot iwa noba jeskaseda Ofa eita eiteij ah ongga eskeiramera gu iwa tein.

3Gij orofosutut mona ongga didif dum diteij gu Allah nou iwa bera didif duis oufamofa eteb gu Ofa rot iwa ojgomuja.

4Noba gij mona insa koma tein bera didif dum diteij rot dudou ongga erirei eteb ojgomu.

5Jeska sis mona ongga iwa inroru Yesus ojgomuja onjoros mona deisef tein bera iwa imfesij rot Yesus Kristus oga gu rusnok enjgineg morototuma erek didif tein dutunggom ojgomuja.

6Noba didif dijginaga rot tenten oida mar ongga Allah onotunggom gij idou efesi ros bera emecira ojgomuja onjoros mar insa koma omoisa rot gij mona ongga Yesus ongksons en fob.

7Erek koma jeska dudou okora eteb rot iwa. Noba Allah bera oncunc efen odou ongga oufamofa skoita iwa morototuma jera didif askesi mimif muftuftu rot Ofa efen oga gu rusnok enjgineg. Allah oncunc efen odou ongga oufamofa gu didif tein gij mona ongga didif dingker gu mod oskusk ros, era gij mona ongga didif duga eseda rot rusnok enjgineg ongga ranggot oida Allah oga bera erek tenten guru tein.

8Allah ejginaga rot teinefa didif dudou okora eteb rot iwa erek Yesus Kristus esinsa odou okora rot iwa.

9Didif dum diteij gu Allah jeskaseda iwa idou omokorema odudu deika. Erek koma beda iwa idou emebriyi ekirsa gij mar ongga Allah ondou os rot ojgomu. Fogora idou emejginaga rot teinefa iwa intunggom mar nomnaga ongga erek oufamofa ojgomu.

10Noba oisouska mar insa koma bera idou emebriyi gij rot teinefa iwa imeita mar ongga erek ongkoska ojgomu. Beda enadaij nou rusnok enjgineg ragot oida iwa bera erek rusnok ongga rita mar ongga oska jinaga guru. Tina yeyin idou efesi bera erek ebsi komowa ojgomuja onjoros mona ongga Yesus Kristus ongksons en fob.

11Noba Yesus Kristus bera ongga eneita owesa efek gu iwa. Ofa eita owesa efek erek koma jeskaseda mar nomnaga ongga iwa itunggom gij yeyin iteij ah kef bera ororu mar ongga oufamofa jeni erek Allah ondou os rot ojgomu.

12Edohuji, didif dudou osos jeskaseda iwa ijginaga rot oida mar okum ongga ah keingg didif jah sif bera eneragou joug rusnok fogora rineg rot Allah oga erek koma jinaga guru. Tina ongga tenten bera, mar okum insa koma orofij didif fogora rusnok ekirsa ruroru Allah oga ogun odudu dokun deika ojgomu.

13Jefeda ebeibeyaif raja Kaisar efen tentarer ongga runt joug didif jera rusnok enjgineg tein gij kota kef bera rijginaga rot didif fob. Koma bera, rua rijginaga rot oida rusnok enjgineg raha didif gij mod oskusk kef jeska didif duftuftu mar rot Yesus Kristus efen oga.

14Noba jeska mifmin muhujir ongga Kristen ringk rot teinefa Efena Ebsi Allah bera omfij didif jah sif fob, jefeda rua tein rinemeesa rot deika guru. Tina rua ruku rufos keinggir ojgomuja fogora ruftuftu rot Allah oga erek ekirsa ojgomu.

15Noba ebeibeyaif tein, bera rusnok enjgineg rudou os ruftuftu mar rot Allah oga jeska rudou ejisei rot Didif. Jefeda rua tein ruga eretei didif rot mar insa koma ongga didif duntunggom. Tina rusnok rineya bera rifesij mar rot Allah oga oisouska rudou ongga erek eskeiramera ojgomu.

16Rua rita mar koma rot rudou ongga okora nou didif, jeska rua rijginaga rot oida didif dingker gij mod oskusk insa kef rot Yesus Kristus oga ongga didif dimfesij gu rusnok sis fob.

17Erek koma tina rua ongga enjgineg insa koma ruga eretei didif rot rudou ongga oska skoita didif ojgomu. Noba rua ruftuftu rot Allah oga jeskaseda rusnok rufra risinsa rufoka erek aksa ojgomu. Rua rita mar erek insa koma jeskaseda rurofra okum ekirsa keingg didif askesi dingker gij mod oskusk jah sif ros.

18Tina skoidu, dudou onokum rot mar ongga rusnok insa koma runtunggom skoita didif guru. Jeska erek rusnok ruftuftu Allah Oga rot rudou ongga egeka era rot rudou ongga eskeira tein, beda mar ongga egeka tein bera oufa ojgomu. Jeska ongga ofoufem bera rusnok insa koma ruftuftu rot Allah oga osok gij Yesus Kristus ojgomu. Noba koma bera ongga eita dudou erirei rot. Erek koma tein, dudou eskeira rot mar insa koma ojgomuja.

19Jeska didif dijginaga rot tenten oida oisouska mar ongga iwa yum iteij gu Allah rot, noba oisouska owesa efek ongga Efena Ebsi Allah eita bera didif dimesma oufamofa eteb gij mar meidu meidu ongga encirej didif ojgomu.

20Erek koma jeska didif dita dudou ahais noba duisum gij Allah rot oida mojenen didif rot mar ongga rusnok enjgineg rutunggom skoita didif guru. Erek rua ruga ojga rot oida difena ebah era dagos rot tein, beda didif dumoku dufos rot ojgomu jeskaseda dufra Yesus Kristus efen ofoka erek aksa gij mar nomnaga ongga encirej didif ojgomu.

21Erek koma jeska didif dusujohu rot oida erek difena ebah ros, beda dumofra Yesus Kristus efen ofoka erek aksa ojgomuja. Noba erek didif dagos tein, beda koma erek oufamofa ekirsa nou didif, jeska didif dijeker morototuma jera Yesus ojgomu.

22Noba erek didif difena ebah ros, beda didif dumotunggom mar egema deika nou Yesus Kristus ojgomu. Erek koma tina kenefo bera ongga erek oufamofa ekirsa nou didif ei. Didif dinejginaga rot guru.

23Koma bera, didif disejah dudou egeka rot mar insa koma ojgomuja. Didif dudou os dagos fogora dijeker morototuma jera Yesus Kristus gu mebaga. Jeska koma bera oufamofa eteb ekirsa nou didif.

24Tina ongga ofoufem ekirsa bera difena ebah ros jeskaseda dufij iwa ojgomuja.

25Erek koma jeska didif dijginaga rot tenten oida difena ebah ros noba dimejeker morototuma jera iwa deika. Beda didif dumofij iwa deika jeskaseda iwa iroru Yesus oga rot ahais ekirsa ojgomuja noba jeskaseda iwa tein imeita idou ongga erirei ekirsa rot mar insa koma ojgomuja.

26Erek koma jefeda yeyin idou efesi emefaga ouka eteb rot gij Yesus Kristus erek ekirsa jeska didif diker morototuma jera iwa sons fob.

27Ebeibeyaif mar ongga ofoufem bera, iwa ita mar ongga ongkoska jeni Yesus Kristus anggot rot sis fob. Iwa ita mar erek koma jeskaseda erek didif din skoita iwa, era erek didif dingg mar osok gij iwa, beda dudou emejginaga rot tenten oida iwa yut joug ahais rot idou ongga erek egens ojgomuja. Koma bera erek iwa yuin keingg rusnok ongga rukoja Yesus Kristus efen oga rot idou egens jeskaseda irocunc rot oida Yesus efen oga bera erek tenten ojgomu.

28Mar insa koma tein omorocunc rot gu rusnok insa koma oida iwa inemeesa rot rua guru. Noba koma tein omorocunc rot oida Allah omofra mar okum keingg rua tein si. Tina skoita iwa bera Ofa emeita eiteij ah ongga ah aibin si.

29Jeska Allah oncunc iwa rot odou ongga eskeiramera fob jeskaseda iwa iroru Yesus Kristus ojgomuja. Noba erek koma tein Ofa oncunc iwa fob jeskaseda ita ifera okora nou Yesus.

30Noba ebeibeyaif tein iwa ita ifera okora gij mar ongga ereneni iwa erek didif dita gij mona ongga dingker jah Kota Filipi sis fob, noba erek dita ebeibeyaif gij mod oskusk jah sif tein.


  Share Facebook  |  Share Twitter

 <<  Filipi 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel