Alkitab Mobile SABDA
[VER] : [MEYAH]     [PL]  [PB] 
 <<  Galatia 5 >> 

1Yesus Kristus bera onsuwa mimif nomnaga jeska hukum Musa fob. Jefeda ebeibeyaif bera mimif mut gu misinsa rot tenten fob. Erek koma jefeda iwa yut joug idou efesi rot ahais ojgomuja noba inesiri gu rua ongga rugif gu hukum Musa insa koma guru.

2Iwa ig rot mar egens ongga didif, Paulus ongga erek rasul egens, dagot erek kef: Erek iwa isiri gu rusnok insa koma fogora iris ifom mareij ofos jeska, beda mar ongga Yesus Kristus ontunggom nou rusnok bera onofij iwa tein jinaga guru fob.

3Didif dagot rot mar insa koma gu iwa juens deika oida, erek osnok egens odou os eris ofom mareij ofos jeska, beda ofa ororu hukum Musa nomnaga tein erek jeni ojgomu.

4Jeska ebeibeyaif ofa bera osujohu rot oida emesma odou ongga ebsi komowa ahah Allah eiteij oisouska mar insa koma ongga ofa esinsa ontunggom ojgomu, tina guru. Jefeda mar ongga ofa ontunggom koma bera erek efen motka ongga ebga jeska Yesus fob. Enadaij nou ofa esma oufamofa jeska Allah rot efen mar ongga oska deika jinaga guru.

5Tina mimif bera ongga muisum gij Allah oisouska Efena Ebsi ongga engker gij mudou efesi jeskaseda Ofa omocunc mimif erek efen rusnok ongga rerin mar ongga oska oskiyai tein jinaga guru. Noba koma tein bera oisouska mudou ongga ororu Yesus Kristus rot tenten fob.

6Jeska mimif mifmin mudou ongga enja erek egens jera Yesus Kristus fob, jefeda erek rusnok riris rufom mareij ofos jeska era gurei, beda koma bera onofoufem skoita Allah guru. Tina mar ongga ofoufem bera mudou ororu Yesus Kristus ojgomu. Beda rusnok enjgineg rimek rot teinefa mudou omokorema moguma ojgomuja.

7Sis fob bera iwa iroru Allah oga ongga oufamofa osok gij Yesus Kristus rot iskusk ojgomuja. Tina teinefa fogora iwa inororu efen oga ongga oufamofa insa koma rot iskusk deika guro! Idu bera ongga eragou joug iwa fogora inororu mar insa koma deika guru!

8Rusnok insa koma riradgodu iwa jeskaseda iwa tein iris ifom mareij ofos jeska. Tina koma enen jeska Allah guru. Jeska Ofa bera ongga enejeka iwa jeskaseda ija erek Ofa efen rusnok ojgomuja.

9Noba mar insa koma ongga rua rumftuftu gu iwa rot bera erek roti efen efed. Jeska roti efen efed bera orok mokcin roti nomnaga fogora efifij. Beda erek koma tein, mar ongga oska ongga rua rumftuftu insa koma bera omorok mokcin iwa nomnaga si. Beda iwa nomnaga imororu mar insa koma tein.

10Erek koma tina, didif dudou egens jera iwa oisouska Yesus Kristus fob, jefeda didif dijginaga rot fob oida iwa imororu mar insa koma deika guru. Tina Allah omofra mar okum eteb keingg rusnok nomnaga ongga rusos iwa rot mar insa koma si.

11Edohuji, rusnok enjgineg ragot oida didif bera duftuftu mar gu rusnok jeskaseda riris rufom mareij ofos jeska ojgomu fogora rua rimesma rudou ongga ebsi komowa ahah Allah eiteij. Beda rua ruroru hukum Musa nomnaga ros. Tina koma bera tenten guru. Jeska rua rita efera okora gu didif ojgomuja ros. Ongga tenten bera didif duftuftu rot oida, oisouska Yesus Kristus ongga anggos tumu mega salib bera mimif mita mudou ongga ebsi komowa ojgomu. Noba koma bera ongga orotunggom rua jeskaseda rita efera okora gu didif ojgomu.

12Rua insa koma bera ruftuftu rot oida rusnok riris rufom mareij ofos jeska. Erek koma jefeda didif dudou os oida rua riris rerin rici ofongga nomnaga jeska tein ojgomu! Jeska rua bera ongga rutunggom rusnok Mod Ari nomnaga fogora rudou eineina gij rot mar ongga tenten ojgomu.

13Edohuji, Allah bera enejeka iwa jeskaseda iroru hukum-hukum jera erebent ofoukou ongga rusnok rerin ojgomuja guru. Tina Ofa enjeka iwa jeskaseda yut gu isinsa ojgomu. Erek koma tina enadaij nou iwa itunggom mar ongga idou eftirir keingg ojgomuja guru. Tina ongga oufamofa bera iwa idou omokorema moguma noba imofijma ojgomuja.

14Hukum egens bera agot erek kef oida, "Iwa idou okora rot yeyin ihujir nomnaga erek iwa idou okora rot isinsa ojgomu." Noba erek mimif muroru jeni hukum egens insa koma ojgomu, beda koma bera erek mimif muroru hukum Allah nomnaga fob.

15Tina erek iwa isejah idou efesi ongga ofogog morototuma noba idou oska morototuma, beda mar koma omorotunggom iwa fogora imekebema noba irebserma ojgomuja.

16Jefeda didif duis gu iwa jeskaseda iwa yuitij rot Efena Ebsi Allah ecira rot iwa ojgomuja. Jeska koma bera omofij iwa jeskaseda inesiri gij mar ongga idou eftirir keingg guru.

17Jeska mar ongga iwa idou eftirir keingg ongga erek ofogog bera eretei rot mar ongga Efena Ebsi odou os rot tein. Noba mar ongga Efena Ebsi odou os rot bera eretei rot mar ongga idou eftirir keingg tein. Koma bera, erek iwa iroru mar ongga idou eftirir keingg, beda enadaij nou iwa itunggom mar ongga Efena Ebsi Allah odou os rot tein guru. Noba erek iwa iroru mar ongga Efena Ebsi Allah odou os rot ojgomu, beda enadaij nou iwa itunggom mar ongga idou eftirir keingg tein guru.

18Erek koma, tina erek Efena Ebsi Allah encira rot iwa fob, beda hukum Musa efen owesa efek enah gu iwa deika guru.

19Mar insa koma ongga mudou eftirir keingg bera ah tomnomna gu rusnok riteij. Koma bera erek rusnok risiri morototuma ni, rutunggom mar ongga oska egema tein rot rifaga morototuma ni,

20rugif gu mar ongga tenten guru ni, risa mar ongga oska skoita rusnok enjgineg ni, rita rudou ofogog skoita rusnok enjgineg ni, ruga omosokuma ni, rudou emejiseima ni, rita mar rot rutkonu oska ni, rufra risinsa rufoka aksa ekirsa jeska rusnok enjgineg ni, rua rimekebema ni, rukoja rusnok enjgineg ongga rudou enerek egens jera rua guru ni,

21rudou eftirir keingg rusnok enjgineg rerin mar ni, ribirfaga erebibei rot mofut efei ojgomuja ni, risba maat mefma fogora risiri morototuma ni. Noba didif disisi keingg iwa rot mar insa koma nomnaga sis fob. Jefeda didif dudou os disisi keingg iwa juens deika oida rusnok ongga rutunggom mar erek insa koma bera runoira jera rusnok ongga Allah ofoka ereij keingg jinaga guru.

22Erek koma, tina rusnok ongga ruitij rot Efena Ebsi Allah encira rot rua bera rita mar erek kef oida, rua rudou omokorema ni, rudou erirei eteb ni, rua riker rot rudou ongga eskeiramera ni, rua ruin keingg rudou efesi ni, rua rucunc rudou ongga oufamofa skoita rusnok enjgineg ni, rua rutunggom mar ongga rua ranggen rot sis fob ni,

23rua rita mar rot rudou ongga eriaga ni, rua ruin keingg mar ongga oska ongga ah gij rudou efesi ni. Noba rusnok ongga rita mar erek insa koma bera rinekirsa rot hukum-hukum egema tein jinaga guru.

24Erek koma tein, rusnok nomnaga ongga ruroru Yesus Kristus bera rikikif jeska mar ongga oska insa koma nomnaga ongga oroku rudou efesi fob, fogora rua rita rudou ongga egens jera Yesus Kristus ongga runtob tumu mega salib. Ofa bera agos nou mifmin mar ongga oska erek insa koma nomnaga fob.

25Noba jeska mimif misma eiteij ah ongga efeinah oisouska Efena Ebsi Allah fob, jefeda oufa nou mimif mita mar jeni erek Efena Ebsi Allah ocunc gu mimif ojgomu.

26Noba ongga oufa bera munofra misinsa mufoka erek ekirsa jeska rusnok enjgineg guru. Noba mimif mineita mar ongga orotunggom rusnok enjgineg fogora rudou oska rot mimif era rudou ejisei rot mimif guru.


  Share Facebook  |  Share Twitter

 <<  Galatia 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel