Dual Panel1Erek koma jefeda, ongga oufa bera iwa ifokor gij Allah efen oga erek eteb ekirsa deika ojgomu. Enadaij nou iwa ifokor rot mar ongga memef moftuftu gu iwa rot sismeni ojgomu guru. Jeska mar koma bera nou rusnok ongga ruroru Yesus Kristus erek efeinah ros. Enadaij nou memef moftuftu gu iwa deika oida imeesa joug rot yeyin mar ongga oska jeskaseda ineseiseifa guru ni, era oida iroru Yesus Kristus rot tenten ojgomu ni,
2era eita baptis gu rusnok ni, era osok gij owesa efek ongga Allah eita gu rusnok oisouska Efena Ebsi ni, era osok gij rot teinefa rusnok rimedebecki jeska ranggos ni, era osok gij rot teinefa Allah omofra mar okum keingg rusnok nomnaga ongga rutunggom mar ongga oska tein ni. Jeska iwa ijginaga rot mar insa koma nomnaga fob.
3Noba oisouska Allah odou ejginaga rot bera memef momoftuftu iwa rot mar ongga erek ekirsa deika jeska mar insa koma nomnaga si.
4Memef modou os moftuftu rot Allah oga erek ekirsa deika gu iwa. Jeska erek osnok egens ororu Yesus Kristus efen oga fob, tina ofa ekikif fogora okoja rot oga insa koma, beda ofa emeseiseifa si. Noba enadaij nou rusnok enjgineg ruroun ofa sons skoita Allah jinaga guru. Erek koma jeska, erek osnok egens odou ebriyi gij Allah efen oga osok gij Yesus Kristus fob ni, erek ofa esma mar ongga ongkoska jeska Allah fob ni, erek Efena Ebsi engker gij odou efesi fob ni,
5erek ofa ensma oufamofa eteb jeska Allah efen oga fob ni, erek ofa ek Allah efen owesa efek ongga omorogna keingg rusnok nomnaga gij mona ongga enja ejgwaga fob ni,
6tina ofa ekikif fogora okoja mar insa koma nomnaga, beda enadaij nou rusnok enjgineg ruroun ofa sons skoita Allah jinaga guru. Jeska mar ongga ofa ontunggom insa koma bera erek ofa esinsa otob Yesus Kristus tumu mega salib fob. Noba koma bera erek ofa oga oruh Yesus rot tomnomna gu rusnok nomnaga rudou tein.
7Gij mona ongga mos ens, beda mebi mekeni eja erek ofogu rara. Jefeda rusnok ongga rif mekeni koma risma maat ofoukou. Noba koma bera erek mar ongga oufamofa eteb ongga en jeska Allah. Koma tein bera erek rusnok ongga ruroru Yesus Kristus fob. Jeska erek rua rutunggom mar ongga ereita Allah odou eskeira rot ojgomuja, beda Ofa emeita oufamofa deika gu rua si.
8Tina mebi mekeni ongga ebera rot moworug ofogog bera erek oska ojgomu, noba rusnok rukoja fogora rinerefa maat gij guru. Dektek deika guru, beda rua rimes mah gij mekeni insa koma ojgomu fogora eseiseifa. Erek koma tein rot rua ongga rikikif jeska Allah efen oga fogora rutunggom mar ongga oska deika sons fob. Jeska Allah bera omofra mar okum eteb keingg rua rot si, beda rua rimeseiseifa ojgomu.
9Edohuji ongga modou okora rot, memef mejginaga rot oida iwa bera inerek rusnok insa koma ongga ringkikif jeska Allah fob guru. Jeska iwa bera intunggom mar jeni erek rusnok ongga Allah onskotu jeska rerin mar ongga oska fob.
10Allah bera erek oufa ojgomu, noba Ofa ek rot teinefa iwa imfarur rot ahais nou Ofa fob. Noba Ofa ek rot teinefa iwa icunc idou ongga okora rot Ofa askesi iwa yufij rusnok Kristen enjgineg tein ojgomuja. Jefeda Ofa emeita oufamofa eteb gu iwa rot si.
11Memef modou os rot oida iwa ita mar erek insa koma ojgomuja onjoros iwa insma mar nomnaga ongga iwa yuisum gij Ofa rot.
12Iwa ineita idou ongga eskes rot guru. Tina yuin keingg idou efesi ojgomuja fogora iroru Allah oga rot tenten ojgomuja. Beda iwa imesma mar nomnaga ongga Allah anggen rot nou efen rusnok si.
13Gij mona ongga sismeni eteb fob bera Allah agen gu Abraham rot oida, "Rusnok ongga runjuj jeska bua noba ongga rumougif gu Didif bera rimeja erek rufoukou doska." Beda Allah agen deika rot oida, erek Ofa eneita mar insa koma gu Abraham guru, beda Ofa omocunc esinsa erek oska. Ofa agot mar erek koma jeska enadaij nou rusnok enjgineg rucunc Allah erek oska guru.
14(6:13)
15Jefeda Abraham oin keingg esinsa odou efesi fogora eker rot mar insa koma ongga Allah anggen rot gu ofa ojgomu. Noba gij mona kahma deika beda Abraham ensma mar insa koma jeska Allah fob.
16Gij mona ongga rusnok ragen mar moguma, beda rua ragen mar koma oisouska osnok egens ongga ofoka ekirsa jeska rua. Beda koma orocunc rot oida rua rimeita mar ongga rua ranggen rot si. Noba rusnok nomnaga rumoitij rot mar insa koma ojgomu.
17Erek koma tein, sis fob Allah odou os orocunc erek jeni gu rusnok ongga rimesma oufamofa eteb jeska Ofa rot oida Ofa emeita mar koma ongga Ofa anggen rot gu rua si.
18Noba enadaij nou Allah ocuwei mar jinaga guru. Erek koma tina Ofa anggen rot mar insa koma gu Abraham jera rusnok ongga runjuj jeska ofa jeskaseda mimif mijginaga rot oida mimesma eiteij ah ongga efeinah si. Noba mimif muisum gij Ofa rot mar insa koma. Noba koma bera ongga ereita mudou efesi erek erirei eteb rot ojgomuja.
19Mimif muisum gij Allah efen oga insa koma rot ahais ojgomuja, erek rusnok ongga ruisum gij kamantuw ongga rua rij gij mei jeskaseda agei rerin kabar mei rot ahais. Noba mimif muisum gij Yesus Kristus ongga ongkag rot mimif jah monuh ongga Allah engker gij. Jah suma bera Ofa ot deismos nou mimif skoita Allah. Koma bera erek imam-imam Yahudi ongga rirabj meifeti ongga ont joug montoj rot rusnok jeska Mod Allah efesi. Jah suma bera rua rut deismos nou rusnok nomnaga skoita Allah. Jefeda Yesus Kristus bera enja erek Allah efen imam egens ongga ofoka aksa eteb morototuma erek Allah efen imam egens ongga ofoka Melkisedek rot mona ongga ah aibin ojgomuja. Jeska Melkisedek bera erek Allah efen imam egens ongga ofoka aksa eteb tein.
20(6:19)