Dual Panel1Erek mona cinja deika beda Ananias, ongga ebirfaga imam-imam Yahudi, jera ebirfager Yahudi rineya tein rija jah kota Kaisarea jera osnok egens ongga ofoka Tertulus. Ofa bera erek osnok egens ongga agot mar rot rua skoita Gubernur Feliks. Beda rua rija skoita Gubernur Feliks noba rifesij gu Ofa rot mar ongga Paulus ontunggom fob.
2Nou ongga Feliks oroun Paulus gij mer efesi koma, beda Tertulus efesij rot mar ongga Paulus ontunggom erek kef oida, "Gubernur Feliks ongga oufamofa! Bua bera ongga bufoka ereij keingg mefmen monuh, jefeda memef meker rot eskeiramera nou mona ongga dektek fob. Noba oisouska mar ongga bua banggot rot budou ongga efesis eteb bera memef meita ongkoskamoka tein.
3Noba gij mar nomnaga ongga memef motunggom bera memef mois oufamofa eteb gu bua rot mar ongga oufamofa insa koma nomnaga.
4Noba didif direjgei gu bua jeskaseda buin keingg budou efesi rot memef fogora didif dimefesij rot mar insa kef ojgomu.
5Memef mosujohu rot oida osnok egens kef erek ofogog eteb. Jeska gij ongga mona ofa ensaga gu monuh Yahudi nomnaga, beda ofa otunggom mar ongga ereita rusnok Yahudi rutkonu oska noba ragot mar oga ofoukou. Noba ofa tein erek ebirfaga egens nou rusnok ongga ruroru mar ongga Yesus, ongga ojga jeska Nazaret, omftuftu sis fob.
6Noba memef magei ofa gij mona ongga ofa ensejah nou otunggom mar ongga oska efekeifa gij Mod Allah. ((Memef mesinsa modou os moga ojga rot ofa ororu mefmen hukum agama.
7Tina ebirfaga tentarer ongga ofoka Lisias oskotu ofa jeska memef.
8Noba ofa bera onobk memef nomnaga jeskaseda magot rot mar insa koma gu bua ojgomu.)) Jefeda erek bua bisinsa bijeka joug ofa, beda bua tein bimek rot oida mar nomnaga ongga memef manggot rot ofa bera erek tenten ojgomu."
9Rusnok Yahudi insa koma nomnaga ragot rot mar insa koma tein osok gij Paulus.
10Beda Gubernur Feliks era etma ereni gu Paulus oida ebeibeyaif ofa agot mar rot esinsa. Jefeda Paulus agot gu Feliks oida, "Gubernur Feliks, Didif dijginaga oida bua bufoka ereij keingg rusnok gij monuh kef erek dektek fob. Jefeda didif dudou efaga ouka eteb jeska bua bera ongga buga omojga rot mar ongga didif danggot ainsa kef tein.
11Erek mona setka kungkob erfeka fob beda didif dija jah Yerusalem jeskaseda dugif gu Allah jah suma. Erek bua bijeka bebin rusnok jah suma, beda rua rimagot oida koma bera tenten ojgomu.
12Noba rusnok ongga Yahudi insa kef bera rinek didif duga omosokuma jera osnok egema tein gij Mod Allah guri. Noba rua tein rinek didif dusos rusnok jeskaseda rudou otkonu oska eteb fogora ruga ofoukou gij mod ongga rusnok rum riteij gij tein guru. Noba didif dineita mar erek koma gij mod enjgineg tein guru.
13Noba enadaij nou rua rucunc gu bua oida mar ongga rua rimfesij insa koma osok gij didif bera erek tenten jinaga guru.
14Didif dagot gu bua rot tenten oida didif dugif gu Allah ongga mefmen meimowa rugif gu sis fob. Noba didif duroru mar ongga Yesus omftuftu rot sis fob tein. Noba didif duroru hukum Musa jera mar ongga nabi-nabi runggu rot sis fob tein ros.
15Didif tein dudou oisum gij Allah rot oida rusnok nomnaga ongga runtunggom mar ongga oska jera mar ongga oufamofa bera rimedebecki jeska ragos si.
16Jefeda didif dut joug dudou efesi rot ahais jeskaseda dudou efesi erek ebsi komowa ahah Allah eiteij jera rusnok riteij tein.
17Erek tahun ofoukou bera didif dineker gij kota Yerusalem guru. Jefeda didif duksons jah kota Yerusalem jeskaseda durka fifi gu dedin rusnok Yahudi ongga erek rufojingki, noba durka mar egema nou dumorougif gu Allah tein.
18Noba gij mona ongga rua rik didif gij Mod Allah bera didif dugif gu Allah jah suma ojgomu. Noba ainsa koma tein didif dusiomu gij mei ororu mefmen agama erebent tein. Tina rusnok rufoukou rineya tein rineker jera didif jah suma guru. Noba erek rusnok rinagot mar oga ofoukou jah suma tein guru.
19Tina rusnok Yahudi rineya ongga runt jah suma bera rin jeska monuh Asia ojgomu. Ongga oufa bera rua rin jah sif fogora rucunc didif erek oska ojgomu. Jeska rua bera ongga runtunggom mar oga ofoukou gij mona insa koma fob.
20Era rua ongga Yahudi insa kef ragot rot mar ongga oska ongga rua ringk didif duntunggom gij mona ongga rua rurka didif skoita ebirfager agama ongga rufoka aksa.
21Rua rutkonu oska rot mar oskiyai ongga didif danggot rot erek kef: 'Iwa ongga Yahudi iroun didif jah sif jeskaseda yuga ojga rot didif jeska didif dusujohu rot oida rusnok ongga ranggos bera rimedebecki si.' "
22Feliks ejginaga osok gij rusnok ongga ruroru moroju ongga Yesus oncunc fob, jefeda ofa agot oida, "Gij mona ongga Lisias en fob, beda didif dumoga ojga rot yeyin mar oga insa kefi si."
23Beda ofa obk ebirfaga tentarer egens jeskaseda ot joug Paulus ojgomu, tina onot joug Paulus erek ahais guru. Adaij nou Paulus ecira gij efen mod efesi, noba ofa oitij rot oida Paulus efen mohujir rumorka mar ongga Paulus ocosu rot gu ofa ai tein ojgomu.
24Gij mona egema deika, beda Feliks oksons jera efen mohona Drusila. Drusila bera erek osnok Yahudi egens. Beda ofa obk tentarer jeskaseda rujoroun Paulus sons skoita ofa fogora ofa emeg Paulus emfesij rot teinefa rusnok ruroru Yesus Kristus.
25Jefeda Paulus efesij mar osok gij rot teinefa rusnok risma rudou ongga ebsi komowa ahah Allah eiteij, jera rot teinefa rua ongga Kristen rut joug rudou efesi jeska mar ongga oska, jera osok gij mona ongga Allah omoga ojga rot rusnok nomnaga rerin rita mar. Nou ongga Feliks engg rot mar insa koma nomnaga fob, beda ofa emeesa rot. Jefeda ofa agot gu Paulus oida, "Ebeibeyaif bua bija ojgomu. Erek dedin efekesa deika beda dumoroun bua sons deika si."
26Gij mona insa koma Feliks odou os oida Paulus eita fifi eteb gu ofa fogora ofa omosuwa Paulus. Jefeda ofa oroun Paulus skoita ofa erek ofosma ofoukou jeskaseda efesij mar jera ofa deika, tina guru.
27Gij tahun egeka deika fob beda Perkius Festus eferwei Feliks erek Gubernur nou monuh insa koma deika. Tina Feliks aha Paulus eker gij mod insa koma ojgomuja. Ofa otunggom mar insa koma jeskaseda rusnok ongga Yahudi rudou os rot ofa.