Alkitab Mobile SABDA
[VER] : [MEYAH]     [PL]  [PB] 
 <<  Lukas 9 >> 

1Yesus ohoturu efen rasul setka kungkob erfeka. Beda Ofa eita owesa efek gu rua jeskaseda rikemeji efena ofogog jeska rusnok rudou efesi jera rita eskeira gu rusnok ongga marenir tein.

2Beda Ofa obk rua jeskaseda rijefesij rot teinefa Allah ofoka ereij keingg rusnok, noba jeskaseda rua rita eskeira gu rua ongga marenir tein.

3Ofa agot gu rua deika oida, "Gij mona ongga iwa inja fob, beda inorka mar egema tein guru. Inorka mar erek moskur ni, mesina ni, maat ni, fifi ni, era meisoufa egema dokun tein guru.

4Gij mona ongga iwa injesaga gu monuh egens, beda iwa iker gij mod egens ongga rusnok ruroun iwa gij rot sismeni ojgomu. Noba gij mona ongga iwa imfarur mar nou Allah gij monuh egens, beda iwa iker jah suma ojgomuja onjoros ifarur mar insa koma oisa fob fogora imeja.

5Tina erek rusnok gij monuh egens runoroun iwa rot rudou ongga eskeira guru, beda nou ongga imeja jeska monuh koma, iwa yubsa ikoda rot mebi ofou ongga kota koma efen jeskaseda irocunc rot oida mar ongga okum emen skoita rua si."

6Beda Yesus efen ruforoker rija jah kota-kota ongga angh gij monuh insa koma. Rua rifesij rot Allah oga ongga oufamofa, noba rua rita eskeira gu rusnok rufoukou ongga marenir tein.

7Gij mona insa koma bera raja Herodes eg mar ofoukou jeska rusnok osok gij mar onswos ongga Yesus ontunggom fob. Jefeda ofa odou eineina gij, jeska rineya ranggot oida Yohanes Pembaptis bera endebecki jeska anggos fob.

8Noba rineya ranggot oida nabi Elia jeska mona ongga ensis fob bera orogna keingg rusnok. Noba rineya ranggot oida nabi egens jeska mona ongga sis eteb fob bera efena ebah sons deika fob.

9Tina raja Herodes agot oida, "Didif dubk rusnok jeskaseda ragob Yohanes, jefeda ofa agos fob. Tina osnok egens kef ongga rusnok ranggot oida ontunggom mar onswos ofoukou deika bera idu?" Beda ofa ereni jeskaseda ek Yesus.

10Nou ongga Yesus efen ruforoker rufok setka kungkob erfeka ruksons fob, beda rua rifesij gu Yesus rot mar nomnaga ongga rua runtunggom fob. Beda Yesus oroun rua jah kota Betsaida.

11Tina gij mona ongga rusnok ofoukou rig oida Yesus encira fob, beda rua tein ruroru ofa jah suma. Jefeda Ofa oroun rua tein rot odou ongga oufamofa. Beda Ofa efesij mar gu rua osok gij rot teinefa Allah ofoka ereij keingg rusnok. Noba Ofa eita eskeira gu rua ongga marenir tein.

12Nou ongga mowa enjesiri gij, beda Yesus efen ruforoker rin skoita ofa. Beda rua ragot gu Ofa oida, "Akeina, monuh kef bera ah yes mes. Ongga oufa bera Akeina bubk rusnok kef jeskaseda ruhca maat noba rahca gij kota-kota ongga angh rejrej monuh insa kef ojgomu."

13Tina Yesus oroun gu rua oida, "Iwa ita maat gu rua ojgomu." Beda rua ragot gu Ofa oida, "Memef mefmen roti ofog cinja orijka ojgomu. Jefeda memef mejengk maat eteb nou rusnok rufoukou kef erek teinefa?"

14(Runa erek rufok ribu cinja runofogu jah suma.) Beda Yesus agot gu rua oida, "Yubk rusnok rufoukou insa koma jeskaseda riker gij ebic egens egens erek rufok setka cinja."

15Beda ruforoker koma rita jeni erek Yesus anggot rot.

16Erek koma beda Yesus eita roti ofog cinja jera mos orijka insa koma, beda Ofa eyajga gu mebaga, noba ois oufamofa gu Allah rot. Beda Ofa ekeba roti jera mos insa koma dougdoug, noba eita gu Ofa efen ruforoker jeskaseda rikeba maat insa koma gu rusnok ribu cinja koma.

17Beda rusnok rufoukou insa koma rit maat onjoros ereya rua nomnaga fob. Beda Yesus efen ruforoker ruhoturu maat ofod koma ongga ok morungga eteb erek setka kungkob erfeka.

18Gij mona juens bera Yesus jera efen ruforoker rijeker gu risinsa, noba Yesus om eiteij gu Allah gij odou efesi. Beda Ofa ejeka efen ruforoker oida, "Rusnok enjgineg ragot oida Didif bera erek idu?"

19Beda efen ruforoker ruroun sons oida, "Rineya ragot oida Bua bera Yohanes ongga eita baptis gu rusnok. Noba rineya ragot oida Bua bera nabi Elia. Noba rineya ragot oida Bua bera nabi egens jeska mona ongga sis eteb fob ongga efena ebah sons."

20Beda Yesus ejeka rua oida, "Tina iwa isinsa isujohu rot oida Didif bera erek idu?" Beda Petrus oroun oida, "Akeina, Bua bera Kristus egens koma ongga Allah omobk skoita efen rusnok Israel!"

21Erek koma beda Yesus agot gu efen ruforoker oida, "Iwa inagot gu rusnok enjgineg egema tein rot oida Didif bera Kristus egens koma ongga emen erek koma jinaga guru."

22Beda Yesus agot deika oida, "Didif, Rusnok Efesa, dimeita difera okora eteb beda ebirfager Yahudi jera imam-imam ebirfaga jera Guru-Guru agama tein bera rumokoja Didif. Beda rusnok rimagob Didif. Noba gij mona juomu deika beda Didif dimedebecki sons jeska dagos si."

23Beda Yesus agot gu efen ruforoker oida, "Erek osnok egens odou os ororu Didif erek dedin oforoka egens, beda ofa onosujohu rot mar ongga ofa esinsa odou os rot ojgomu guru. Tina ofa esejah odou efesi rot mar ongga eita efera okora gu ofa erek osnok egens ongga ok mega salib fogora eita efera okora noba anggos tumu tein. Ofa eita mar erek koma beda omororu Didif.

24Jeska idu ongga osujohu rot esinsa efen eiteij ah ojgomu noba onororu Didif guru, beda efen eiteij ah koma emeseiseifa si. Tina erek osnok egens efen eiteij ah bera eseiseifa jeska ofa ororu Didif, beda ofa koma emesma eiteij ah ongga ah aibin si.

25Noba erek osnok egens ohoturu mar ofoukou nou efen eiteij ah kef, tina ofa enesma eiteij ah ongga efeinah guru, jeska ofa onororu Didif guru, beda mar ongga ofa onghoturu insa koma fob bera onofij ofa tein jinaga guru. Ofa eneita mar egema tein jeskaseda eita eiteij ah ongga efeinah insa koma guru.

26Noba idu ongga mojen ofa rot mar ongga Didif, Rusnok Efesa duftuftu fob, beda Didif tein mojenid rot ofa tein gij mona ongga Didif duksons rot owesa efek jeska dedin Akeina morototuma jera malaikat-malaikat ongga ebsi komowa tein si.

27Ongga tenten bera, rusnok rineya ongga riker jah sif rinagos guru onjoros rua rik Allah ofoka ereij keingg efen rusnok si."

28Erek mona cinja orfomu deika beda Yesus oroun Petrus jera Yohanes jera Yakobus beda rija jah memaga ofos jeskaseda rum riteij jah suma.

29Askesi Yesus om eiteij jah suma, beda Ofa efen osum eisa eteb erek mowa. Noba efen meisoufa eja erek ebsi komowa ongga eisa eteb tein.

30Beda Musa jera Elia ongga ganggos sis fob,

31gorogna rot gefesa eteb tein. Beda goga gefesij mar morototuma jera Yesus osok gij mona ongga Yesus emagos gij Yerusalem fogora emeja jah mebaga.

32Ainsa koma tein Petrus jera efen mohujirga rah ahaingkongka fob. Nou ongga rua rusowu beda rua rik Yesus erek efesa eteb. Noba rua rik Musa jera Elia gonot jera Ofa tein.

33Nou ongga goga genja jeska Yesus, beda Petrus agot gu Yesus oida, "Akeina, ongkoska eteb nou memef meker jah sif! Jefeda memef mei modwok orgomu. Egens nou Bua, egens nou Musa noba egens deika nou Elia." (Petrus agot mar erek koma jeska ofa odou enebriyi gij mar ongga ofa engk insa koma fob guru.)

34Askesi Petrus anggot mar insa koma ros, beda mocgoj ofog eteb en noba ocohun rua, jefeda Petrus jera mohujirga rimeesa eteb rot.

35Beda rua rig oga egens jeska mocgoj insa koma agot oida, "Kef bera dedin edesa ongga duncunc fob. Iwa ig rot mar ongga Ofa anggot ojgomu!"

36Nou ongga koma oisa fob, beda rua rik Yesus esinsiyai onot jah suma. Beda rua riker toumou rot mar insa koma, noba rinefesij rot mar koma gu rusnok enjgineg tein guru.

37Gij mona juens deika beda Yesus jera efen ruforoka rugomu rujuj jeska memaga ofos insa koma, beda rusnok rufoukou rin skoita.

38Osnok egens ongga onot gu rusnok rufoukou insa koma rifekesa ois rot oga eteb oida, "Akeina Guru, Bucunc budou ongga okora rot didif fogora bijek dedin edesa egens, jeska ofa erek dedin edesa ongga egensmes ojgomu.

39Noba gij mona ongga efena ofogog oira gij efen odou efesi, beda ofa agerir mar noba efaga oskukwok onjoros awesi efeireira. Efena ofogog koma oskotu ofa noba onorogna jeska ofa jinaga guru.

40Didif duis gu bebin ruforoker jeskaseda rikemeji efena ofogog egens koma jeska ofa, beda rua rireni rot, tina efena ofogog koma onorogna jeska ofa odou efesi guri!"

41Erek koma beda Yesus agot oida, "Iwa idou onororu Didif rot tenten enesei! Iwa idou erek oska ros ojgomu ei! Didif diker jera iwa noba duh dudou gu iwa nou mona egaho fogora imororu Didifi? Buroun oforokai egens koma gu Didif ojgomu."

42Nou ongga rua ruroun oforokai egens koma skoita Yesus fob, beda efena ofogog edi ofa fogora ofora oskukwok. Tina Yesus ekemeji efena ofogog koma jeskaseda orogna jeska ofa, jefeda oforokai egens koma eskeira fob. Beda Yesus oroun ofa sons gu efen meka.

43Rusnok ongga ringk rot mar insa koma nomnaga rudou oubsaha rot Allah efen owesa efek eteb. Askesi rusnok ongga ringg mar insa koma riker rot rudou ongga oubsaha ros, beda Yesus agot gu efen ruforoker oida,

44"Iwa yuj yusu noba ig kef rot iskusk ojgomu fog: Rusnok rimaha Didif, Rusnok Efesa, gu rusnok enjgineg."

45Tina rua rudou enebriyi gij rot mar ongga Yesus enagot insa koma efen ofou guru. Jeska mar koma efen ofou bera ah jejema jeska rua ros. Jefeda rudou enebriyi gij guru, noba rua rimeesa jefeda rinejeka gu Yesus rot mar insa koma efen ofou tein guru.

46Yesus efen ruforoker ruga emekirsema osok gij idu jeska rua bera emesma ofoka ongga aksa ekirsa jeska rineya.

47Yesus ejginaga rot mar ongga ruga emekirsema rot insa koma fob. Jefeda Ofa oroun oforokai egens jeskaseda ot desi Ofa.

48Beda Ofa agot gu efen ruforoker oida, "Idu ongga oroun oforokai egens erek kef oisouska dedin dufoka, beda koma erek ofa oroun Didif tein fob. Noba idu ongga oroun Didif, beda koma erek ofa oroun Allah ongga ombk Didif tein fob. Jeska osnok egens gu iwa ifekesa ongga onohca efen ofoka aksa guru, ofa bera ongga emesma ofoka ongga aksa eteb ekirsa jeska rineya."

49Erek koma beda Yohanes agot gu Yesus oida, "Akeina, memef mek osnok egens ekemeji efena ofogog jeska rusnok oisouska bebin bufoka, tina memef meyahehir joug ofa rot, jeska ofa onoira jera mimif guru."

50Beda Yesus agot gu Yohanes oida, "Iwa ineyahehir joug ofa erek koma guru. Jeska idu ongga onok eretei rot iwa guru, beda ofa tein erek egens jera iwa ojgomu."

51Doida mona ongga Yesus omosok jah mebaga, beda Ofa oga ojga rot oida Ofa emeja jah kota Yerusalem si.

52Beda Ofa obk efen ruforoker rineya rukag Ofa odou. Rua rija jah kota egens gij monuh Samaria jeskaseda risejah mar nou Yesus jah suma.

53Tina rusnok gij monuh insa koma rijginaga rot oida Yesus eris rerin monuh askesi Ofa ecira jah kota Yerusalem, jefeda runoroun Ofa guru.

54Nou ongga Yesus efen goforoka Yakobus jera Yohanes geg rot mar insa koma fob, beda goga gagot gu Yesus oida, "Tuhan, bua budou os jeskaseda magef mois gu Allah fogora mah eisa ojuj jeska mebaga fogora et rua insa koma nomnaga ei?"

55Tina Yesus ekikif skoita goga noba etaha joug goga rot mar ongga ganggot insa koma ojgomu.

56Nou ongga koma oisa fob, beda rua ricira jah kota enjgineg deika.

57Nou ongga Yesus jera efen ruforoker rincira deika, beda osnok egens agot gu Yesus oida, "Akeina, didif dumororu Bua gij monuh nomnaga ongga Bua bimeja gij ojgomuja."

58Beda Yesus oroun gu ofa oida, "Mes merenrah rerin mansu ongga ringker gij enahuma. Noba mem rerin efefa ongga ringker gij enahuma. Tina Didif, ongga Rusnok Efesa, bera dedin monuh egema tein enah nou diker keingg dufons gij guru."

59Beda Yesus agot gu osnok egens egema deika oida, "Bua buroru Didif ojgomu." Tina osnok egens koma agot oida, "Tuan, didif dudou os duksons jah dedin monuh beda disah dedin akeina gij moksu fog. Beda didif dumororu Bua si."

60Beda Yesus agot gu ofa oida, "Rusnok ongga rukoja mar ongga Didif dumftuftu rot bera rimeseiseifa si. Jefeda adaij nou rua risah mar agos gij moksu ojgomu. Tina bua bera buroru Didif ojgomu."

61Beda Osnok egens egema deika agot gu Yesus oida, "Tuhan, didif dudou os duroru Bua. Tina didif duksons jeskaseda duisu dedin rusnok sismeni fog."

62Beda Yesus agot gu osnok egens koma oida, "Idu ongga odou os ororu Didif, tina ofa odou os oksons skoita mar ongga ofa ontunggom sis fob tein, beda enadaij nou ofa oira jera rusnok ongga Allah ofoka ereij keingg guru."


  Share Facebook  |  Share Twitter

 <<  Lukas 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel