Dual Panel1Gij surat kef didif dudou os difesij mar gu iwa osok gij osnok egens ongga ofoka Febe. Ofa tein ororu Yesus Kristus fob. Noba Ofa bera osnok egens ongga ofij ebirfager Mod Ari gij kota Kengkrea.
2Didif duis gu iwa jeskaseda iwa iroun ofa erek yeyin ihuj egens ongga ororu Yesus Kristus morototuma erek iwa fob. Icunc idou ongga okora rot ofa erek Allah efen rusnok nomnaga rucunc rudou ongga omokorema. Noba ofij ofa rot mar ongga ofa ocosu rot, jeska sis fob ofa omfij didif jera rusnok enjgineg tein rot mar ongga memef mocosu rot tein fob.
3Erek koma noba didif dudou os duisu Priskila jera efen mahina Akwila ongga gomfij Yesus Kristus morototuma jera didif.
4Sis fob goga gofij didif rot mar okum ongga angh keingg didif, jefeda mar ofogog ah keingg goga tein gij mona insa koma. Didif duis oufamofa eteb gu goga jeska goga gomfij didif erek insa koma fob. Noba rusnok Mod Ari ongga erek Yahudi guru, rua tein ruis oufamofa gu goga jeska goga gomfij didif erek insa koma sis fob.
5Noba didif duisu rusnok nomnaga ongga rumohoturuma gij gegan mod jeskaseda rugif gu Allah jah suma tein. Didif duisu dedin edohuj Epenetus ongga dudou okora rot tein. Ofa bera erek osumbohka rot rusnok nomnaga ongga ruroru Yesus Kristus gij monuh Asia fob.
6Noba didif duisu Maria tein. Ofa bera emfarur gij efen mar rot ahais jeskaseda ofij iwa.
7Noba didif duisu Andronikus jera Yunius tein. Goga tein gerek gosnok Yahudi ongga gengker gij mod oskusk morototuma jera didif sis fob. Goga bera erek Yesus efen rasul ongga ofoufem tein. Noba goga gororu Yesus Kristus gokag jeska didif.
8Didif duisu Ampliatus ongga dudou okora rot erek osnok egens ongga ororu Tuhan fob.
9Noba didif duisu Urbanus tein. Ofa bera osnok egens ongga omfij Yesus Kristus morototuma jera didif. Noba didif duisu dedin edohuj Stakhis ongga dudou okora rot tein.
10Noba didif duisu Apeles tein. Erek mar okum ah keingg ofa ojgomuja, tina ofa odou okora rot Yesus Kristus ojgomuja. Noba didif duisu rusnok nomnaga ongga ringker morototuma jera Aristobulus tein.
11Noba didif duisu Herodion tein. Ofa bera jeska rua ongga Yahudi morototuma erek didif tein. Noba didif duisu rusnok nomnaga ongga ringker gij Narkisus efen mod ongga ruroru Tuhan Yesus fob.
12Didif duisu Trifena jera Trifosa tein. Gojaga gegeka insa koma bera gemfarur rot ahais nou Tuhan fob. Noba didif duisu dedin edohuj Persis ongga dudou okora rot. Ofa tein emfarur rot ahais nou Tuhan fob.
13Noba didif duisu Rufus ongga ororu Tuhan rot ongkoska fob. Noba didif duisu ofa efen mosu ongga ofij didif erek ofa ofij efen efesa.
14Noba didif dudou os duisu Asinkritus ni, Flegon ni, Hermes ni, Petrobas ni, Hermes ni, jera dedin edohujir nomnaga ongga rumohoturuma morototuma jera rua tein.
15Noba didif duisu Filologus jera Yulia ni, Nereus jera efen meyeser tein ni, Olimpas jera Allah efen rusnok nomnaga ongga rumohoturuma morototuma jera rua ni.
16Gij mona ongga iwa imorodosuma beda yagei itma erek irocunc rot oida idou omokorema. Rusnok gij Yesus efen Mod Ari nomnaga jah sif ruisu iwa nomnaga tein.
17Edohuji, didif duis gu iwa jeskaseda iwa yut joug idou efesi ahais rot rusnok enjgineg ongga rusos iwa jeskaseda yuga omosokuma fogora imekebema. Noba yut joug idou efesi jeska rusnok ongga rusos rineya rudou efesi fogora runororu Allah oga deika guru. Rua bera rukoja mar ongga tenten ongga rusnok enjgineg rumftuftu gu iwa sis fob. Jefeda iwa ibes ifaga jeska rua ojgomu.
18Rusnok ongga rita mar erek insa koma bera runofij mifmin Tuhan Yesus Kristus guru. Tina rua rutunggom mar ongga ereita risinsa rudou eskeira rot ojgomu. Rua rifesij mar rot ruga ongga erek ongkoskamoka jeskaseda rurokrusa rusnok enjgineg ongga rudou osumsumu rot rerin mar ongga ofogog erek insa koma.
19Rusnok ongga ruroru Yesus Kristus jah sif bera ringg rot teinefa iwa yugif gu Allah rot efen oga fob. Jefeda koma bera ereita dudou efesi erek eskeiramera eteb rot. Tina didif duis gu iwa jeskaseda ita idou ongga ocosu efei ahtah rot mar ongga ongkoska, noba ita idou ahais rot mar ongga ofogog ojgomuja.
20Allah, ongga eita eiteij ah ongga eskeira gu rusnok, bera emagob Bilis fogora ofa emesiri gu iwa si. Noba onjoros mona insa koma bera didif dumom diteij gu mifmin Tuhan Yesus Kristus jeskaseda Ofa ocunc efen odou ongga oufamofa eteb skoita iwa.
21Timotius ongga ofij Yesus morototuma jera didif jah sif bera oisu iwa tein. Noba Lukius ni, Yason ni, Sosipater ni, ongga jeska rua ongga Yahudi, bera ruisu iwa tein.
22Didif dufoka Tertius. Didif bera ongga dufij Paulus fogora dugu keingg mar gij surat egens kef nou Ofa. Didif tein duisu iwa oisouska Tuhan ofoka.
23Gayus tein oisu iwa. Ofa bera ofij didif fogora dingker gij efen mod. Noba ofa tein ofij rusnok Kristen jah sif jeskaseda rumohoturuma gij efen mod. Noba Erastus ongga ot joug kota insa kef efen fifi, ofa tein oisu iwa. Noba mefmen mohuj Kwartus, ofa tein oisu iwa.
24(Didif duis gu mifmin Tuhan Yesus Kristus jeskaseda Ofa eita oufamofa eteb gu iwa nomnaga. Ainsoma.)
25Didif dudou os jeskaseda Allah esma ofoka ongga aksa eteb. Jeska oisouska efen oga ongga oufamofa ongga didif difesij gu rusnok fob, noba oisouska efen oga ongga osok gij Yesus Kristus, bera Ofa omofij rusnok jeskaseda ruroru Ofa rot tenten ojgomuja. Sis fob, oga insa koma osok gij Yesus Kristus bera ah jejema jeska rusnok gij mona ongga dektek fob. Tina ebeibeyaif bera Allah oncunc rot oga insa koma gu rusnok fob.
26Ofa oncunc oga insa koma rot koisoisa oisouska mar ongga nabi-nabi runggu gij Mar Efeyi Ebsi sis fob. Noba oisouska Allah, ongga anggot rot mar insa kef, bera rusnok rimfesij rot efen oga insa koma gij monuh nomnaga jeskaseda rusnok rumororu efen oga ongga oufamofa insa koma. Beda rua tein rimeita mar jeni efen oga insa koma ojgomuja.
27Allah bera efen odou ongga ebriyi gij mar erek eteb ekirsa jeska rusnok nomnaga ojgomu. Noba didif dudou os jeskaseda Ofa esma ofoka ongga aksa eteb rot mona ongga ah aibin ojgomuja oisouska Yesus Kristus. Ainsoma.