Alkitab Mobile SABDA
[VER] : [MEYAH]     [PL]  [PB] 
 <<  Wahyu 16 >> 

1Erek koma beda didif dig oga egens orogna jeska mer efesi ongga angh deismos gij Allah efen mod insa koma. Oga egens insa koma agot gu malaikat-malaikat cinja erfeka insa koma oida, "Iwa ija noba itkinaja yeyin mongkei mos cinja erfeka ongga ebera rot Allah efen mar okum keingg rusnok mebif ojgomu."

2Jefeda malaikat ongga sismeni eja noba otkinaja Allah efen mar okum jeska mongkei mos gij mebi kemb. Ofa otkinaja mar insa koma esij rusnok nomnaga ongga risma mar ongga orocunc rot mar ofogog insa koma efen ofoka tumu ritoufu, jera rua ongga rugif gu mega efebr ongga rusnok ranggosus erek orocunc rot mar ofogog insa koma efen efaga tein ojgomu. Beda rua risma mowug efera ofoukou ongga orotunggom rua fogora rufogu okora eteb ojgomuja.

3Beda malaikat ongga egeka eja noba otkinaja Allah efen mar okum jeska mongkei mos gij mei mojumu efei. Beda mei mojumu efei eja erek rusnok ongga ranggos rerin rugufu. Jefeda mar nomnaga ongga angh gij mei mojumu efei agos rot ojgomu.

4Erek koma, beda malaikat ongga orgomu eja noba otkinaja Allah efen mar okum jeska mongkei mos koma gij mei mosu jera mei eiteij nomnaga. Beda mei insa koma nomnaga eja erek rusnok rugufu.

5Beda didif dig malaikat egens ongga ont joug mei mog nomnaga agot oida, "Bua bera ongga bunofoguma gij mona ongga sismeni, noba Bua bunofoguma ebeibeyaif tein. Bua bera ongga ebsi komowa eteb. Noba Bua bera ongga buga ojga rot rusnok nomnaga rot tenten ojgomu, jeska Bua bumfra mar okum keingg rusnok rot rerin mar ongga oska erek tenten fob.

6Jeska rusnok ongga rufogog insa koma bera ongga ranggob bebin rusnok jera bebin nabi-nabi sis fob. Jefeda rerin rugufu bera ongksons skoita rua erek tenten fob."

7Beda didif dig oga egens en jeska meja ongga angh gij Mod Allah efesi agot oida, "Bua bera Allah ongga efen owesa efek eteb. Noba Bua bera ongga buga ojga rot rusnok nomnaga rot tenten ojgomu. Noba Bua bufra mar okum keingg rusnok rot rerin mar ongga oska erek tenten tein."

8Erek koma beda malaikat ongga tohkuru eja noba otkinaja Allah efen mar okum jeska mongkei mos gij mowa eiteij. Beda mowa eiteij koma esma owesa efek jeskaseda eisa egigir erek mah ongga et rusnok rufos ojgomuja.

9Jefeda rusnok insa koma ongga rugif gu mar ofogog insa koma bera rita rufogu okora eteb jeska mowa eisa egigir insa koma ojgomuja. Beda rua ruga oruh Allah rot mar insa koma ojgomuja. Jeska rua rijginaga rot oida Ofa bera ongga ensa mar okum insa koma skoita rua. Erek koma tein rua rudoubu joug rimeesa rot rerin mar ongga oska, noba runofra Allah ofoka erek eteb jinaga guru.

10Erek koma beda malaikat ongga cinja eja noba otkinaja Allah efen mar okum jeska mongkei mos gij monuh ongga mar ofogog insa koma ofoka ereij keingg rusnok jeska tein. Jefeda ofa efen monuh nomnaga ongga ofa ofoka ereij keingg bera eja erek motkobah ojgomu. Beda rusnok riska rufuj ofou jeska rua rita rufogu okora eteb ojgomuja.

11Beda rua tein ruga oruh Allah ongga engker gu mebaga ojgomuja, jeska rua rita rufogu okora eteb erek insa koma ojgomuja. Tina rua rudoubu joug rimeesa rot rerin mar ongga oska ongga rua runtunggom sis fob ojgomu.

12Erek koma beda malaikat ongga cinja erfens eja noba otkinaja Allah efen mar okum jeska mongkei mos gij mei mosu eteb ongga ofoka Efrat. Beda mei mosu insa koma ofora fogora ahahir jeska oforga nomnaga. Ofa otunggom mar koma jeskaseda raja-raja ongga ringker gij monuh ongga mowa orogna jeska bera rumoira rot rerin tentarer rufoukou tein.

13Beda didif dik efena ofogog orgomu ongga erek mos inyob orgomu. Didif dik mos insa koma orogna jeska magosu ongga ofoka Naga awesi, noba egema orogna jeska mar ongga ofogog insa koma awesi tein, noba egema orogna jeska Bilis, ongga erek nabi ebireira, efen awesi tein.

14Rua bera efena ofogog ongga risma owesa efek jeskaseda rutunggom mar onswos ofoukou. Noba rua bera ongga rija ruhoturu raja-raja jera rerin tentarer nomnaga jeskaseda rimedima jera Allah efen owesa efek gij mona eteb egens ongga emen.

15Iwa isku jah joug ojgomu, jeska Yesus Kristus anggot oida, "Gij mona kahma beda Didif dumorogna keingg iwa ebeirens erek osnok egens ongga ongkoreka mar orogna keingg rusnok ebeirens gij rerin mod efesi tein. Noba rusnok ongga rinsejah nou Didif gij mona insa koma, rua bera rudou emefaga ouka eteb, jeska mojen en rua gij mona insa koma guru. Koma erek osnok egens ongga enahca jeska efen mod guru, tina ofa eker noba ergi efen meisoufa ojgomu. Beda ofa onofos graga rot rua ongga rurogna keingg ofa jeskaseda rukoreka efen mar guru."

16Beda mar ofogog ongga erek mos inyob insa koma rumohoturu raja-raja jera rerin tentarer nomnaga gij monuh egens ongga rijeka ofoka Harmagedon gij Yahudi oga.

17Erek koma beda malaikat ongga cinja erfeka eja noba otkinaja mongkei mos rot Allah efen mar okum gij mebaga. Beda ainsa koma tein didif dig oga egens agot jeska kursi eteb ongga angh gij Allah efen mod efesi. Oga egens insa koma bera agot oida, "Oisa fob!"

18Beda didif dik moc efesa, noba dig moc ogugur eteb, beda mebi icusur eteb doska. Noba sis mona ongga Allah onotunggom rusnok mebif enesi onjoros mona deisef tein bera minek mebi icusur erek insa koma enesi. Jeska koma erek eteb doska ekirsa jeska nomnaga.

19Beda kota eteb ongga ofoka Babel bera ebriyi erek orgomu tumu fogora esma nomnaga. Noba kota-kota ongga angh gij monuh enjgineg tein bera esma nomnaga. Allah ontunggom mar insa koma jeska Ofa odou ah keingg rot rusnok gij kota Babel rerin mar ongga oska efekeifa. Noba rua ongga kota Babel runokoja mar okum insa koma jinaga guru. Mar okum ongga Allah ofra keingg rua bera erek osnok egens ongga otkonu oska eteb fogora eradgodu rusnok jeskaseda rij anggur efei ojgomuja. Noba enadaij nou rua rukoja mar insa koma jinaga guru.

20Noba motowohu nomnaga jera memaga mosu nomnaga eseiseifa ojgomuja.

21Noba mos eteb ongga erek eis mamu ojuj jeska mebaga. Eis mamu insa koma egens egens nomnaga bera okum erek kilo setka cinja. Noba mar insa koma esiri keingg rusnok fogora rita rufogu okora eteb rot. Tina rua nomnaga ruga oruh Allah rot ojgomuja.


  Share Facebook  |  Share Twitter

 <<  Wahyu 16 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel