Dual Panel1Nou ongga mar insa koma oisa fob, beda didif dik malaikat tohkuru rija gu mebif. Beda malaikat egens ojot gu monuh ongga mowa orogna. Noba malaikat egema ojot jah monuh ongga mowa esiri gij. Noba malaikat egema ojot jah emaga. Noba malaikat egema ojot jah agosu. Beda rua ragei mof aki gij monuh tohkuru insa koma jeskaseda mof onokuj gij mebif ni, mei mojumu efei ni, era mega ni deika guru.
2Beda didif dik malaikat egens ongga egema deika en jeska monuh ongga mowa orogna jeska. Ofa orka mar egens ongga erek orocunc rot Allah ongga efena ebah rot ah aibin ojgomuja. Beda ofa ois mar rot oga eteb skoita malaikat tohkuru insa koma ongga rinsma owesa efek jeskaseda rutunggom mar okum skoita mebif jera mei mojumu efei tein.
3Ofa agot gu rua rot oida, "Iwa inotunggom mar okum skoita mebif era skoita mei mojumu efei era skoita mega tein enesi jeskaseda memef maha mar tumu rusnok ritoufu ongga orocunc rot oida rua bera erek Allah efen rusnok ongga rufij Ofa sismeni fog."
4Beda didif dig rot rusnok idu ongga rimesma mar insa koma tumu ritoufu. Rusnok rufok 144,000 jeska rusnok ebic Israel nomnaga bera rimesma mar insa koma.
5Koma bera orofosutut rusnok rufok 12,000 jeska ebic Yehuda ni, ebic Ruben ni, ebic Gad ni,
6ebic Asyer ni, ebic Naftali ni, ebic Manasye ni,
7ebic Simeon ni, ebic Lewi ni, ebic Isakhar ni,
8ebic Zebulon ni, ebic Yusuf ni, ebic Benyamin ni, rusnok rufok 12,000 jeska ebic insa koma nomnaga rimesma mar insa koma tumu ritoufu si.
9Nou ongga mar insa koma oisa fob, beda didif dik rusnok riskembemba doska ongga rin jeska orofosutut monuh ni, rusnok ebic egens egens ni, ruga rusnok egens egens ni. Rua bera rufoukou doska jefeda enadaij nou didif dufosuit rua nomnaga jinaga guru. Beda didif dik rua nomnaga rut jah kursi odou ongga Domba Efer insa koma engker gij. Rua rirgi meifeti ongga ebsi komowa, noba rua ragei ayug efeyi tumu ritma.
10Beda rua nomnaga ragerir rot ruga eteb oida, "Allah, ongga engker gij efen kursi fogora ofoka ereij keingg rusnok nomnaga jera Ofa ongga erek Allah efen Domba Efer, bera ongga eita eiteij ah ongga efeinah gu rusnok ojgomu."
11Noba malaikat-malaikat nomnaga rut rejrej kursi Allah jera ebirfager setka egeka noba tohkuru jera mar ongga efena ebah tohkuru insa koma tein. Beda rua risiri fogora rugif gu Allah.
12Beda rua ragot oida, "Mimif mudou os oida rusnok nomnaga risitit noba rugif gu mifmin Allah noba ruis oufamofa eteb skoita Ofa! Jeska Ofa bera ongga efen ofoka ongga aksa eteb ni, noba ongga efen owesa efek ongga ekirsa jeska nomnaga ni, noba ongga efen odou ongga ebriyi gij mar nomnaga ni, rot mona ongga ah aibin ojgomuja. Ainsoma."
13Beda ebirfaga egens jeska ebirfager setka egeka noba tohkuru insa koma ejeka didif oida, "Rusnok insa kef ongga rirgi meifeti ongga ebsi komowa bera idu? Noba rua bera rin jeska guaidu?"
14Beda didif duroun gu ofa oida, "Tuan, didif dinejginaga rot guru." Beda ofa agot gu didif oida, "Rua bera ongga rifena ebah ros gij mona ongga mar okum ah keingg rusnok nomnaga fogora rita rifera okora eteb gu mebif. Rua bera ongga rut rerin meisoufa oisouska Domba Efer efen ogufu fogora rutunggom erek ebsi komowa fob. Jefeda,
15'Rua riker gij mod Allah jah kursi odou ongga Ofa engker gij. Noba rua rufij Ofa gij efen mod orofosutut mona jera motu ojgomuja. Noba Allah bera ongga orocohun rua rot efen owesa efek ojgomuja.
16Mosona onongk rua gij mona ongga egema tein deika guru. Noba magonen rua tein deika guru. Mowa tein onofogog skoita rua deika guru. Mar egema tein ongga erek ofoufem enefet rua deika guru.
17Jeska Domba Efer egens ongga engker gij kursi insa koma bera orot joug rua erek gembala egens ongga eja okag rot efen domba-domba. Ofa bera omocunc mei eiteij ongga eita eiteij ah ongga efeinah gu rua. Beda Allah omosuna rot mar nomnaga ongga ereita rudou okumkum rot tein.' "