Alkitab Mobile SABDA
[VER] : [MONGONDOW]     [PL]  [PB] 
 <<  1 Yohanes 2 >> 

1Adiíku mita! Na'a mita pinaisku ko'i monimu, simbaí mo'ikow diaídon mogaid kon dosa. Tongaí aka oyuíon im mogaid kon dosa, daí oyuíon im mototuḷung naton, Sia tua ing ki Yesus Kristus inta moaídil. Sia mayak in tayowon i Allah bo mopo'igum simbaí ampungandon in taḷaí mita naton.

2Bo pinotonsigad ko'i Yesus Kristus tuata, bayongan dosa naton inampungan. Bo de'emanbií doman tongaí taḷaí naton, ta'e taḷaíbií doman im bayongan intau.

3Aka kita bo umuran dumudui kom parentah mita i Allah, daí tua in tandanya kong kita nonota'au ko'i Allah.

4Intau inta mongaku, "Aku'oi nonota'au ko'i Allah," ta'e diaí dinumudui kom parentah-Nya mita, yo mo'uboḷ in intau tatua, bo ki Allah in doiíbií mogutun kom bonu ing ginanya.

5Ta'e intau inta umuran dinumudui kom parentah mita i Allah, yo tabi in intau tatua ko'i Allah nosompurnadon. Tua in nobalií tanda kong kita in nobiagdon notobatuí takin i Allah.

6Ki ine i moguman kon sia in nobiag notobatuí takin i Allah, yo sia musti mobiag takin dumudui kong kobobiag i Kristus.

7Utatku mita inta kinotabiku! Onu im pinaisku tana'a de'emanbií parentah mobagu, ta'e parentahbií inta no'onggotdon inta aim pinogumanku ko'i monimu ko wakutu im mo'ikow bagupa nopirisaya ko'i Kristus, tuata in habar inta nongkon i Allah bo inta ain dinongog monimu kolipod.

8Umpakah natua, ta'e parentah inta pinaisku na'a in nobagubií doman; sing kabenarannya mota'aubií indoian ko'i Kristus bo ko'i monimu. Sin sindip ko'inggamaí-ko'inggamaídon bo bayag inta moḷoben momangkoidon monindar.

9Intau inta noguman kon sia in nobiagdon kon nobayag, ta'e sia umuranpa doman mosaturu ko'i utatnya, yo intau tatua in umuranpabií nobiag kon nosindip uma'ai in tana'a makow.

10Intau inta motabi ko'i utatnya, nobiag kon nobayag sahingga in diaíbií tobatuímai ing ko'inia mokopopisií kon intau ibanea mogaid kon dosa.

11Ta'e intau inta mosaturu ko'i utatnya, nobiagpa kon sindip. Sia minayak kom bonu in sindip, bo diaí kota'auannya mongo kon onda im bayaíannya, sin sindipdon tatua im mogolingoi ko'inia.

12Na'a im pinaisku ko'i monimu ule adiíku mita, sin taḷaímu mita aindon inampungan lantaran tangoi i Kristus.

13Pinaisku in na'a ko'i monimu amaí mita, sim mo'ikow nonota'audon ko'i-Nia inta oyuíondon nongkon pinomangkoianpamai. Pinaisku in na'a ko'i monimu, intau mita inta nongobagupa, sin sinaḷowdon monimu Ki inta Mora'at.

14Ule adiíku mita, aku'oi nomais kon na'a ko'i monimu, sim mo'ikow nonota'audon ko'i Amaí. Pinaisku in na'a ko'i monimu amaí mita, sim mo'ikow nonota'audon ko'i-Nia inta oyuíondon nongkon pinomangkoianpamai. Pinaisku in na'a ko'i monimu intau mita inta nongobagupa, sim mo'ikow moropot. Singog i Allah no'itonop kom bonu ing ginamu, bo sinaḷowdon monimu Ki inta mora'at.

15Dikabií motabi kon dunia na'a ande onu ing kom bonunya na'a. Aka mo'ikow motabi kon dunia na'a yo diaíbií im mo'ikow motabi ko'i Amaí.

16Bayongan yagi-yagi inta kom bonu in dunia na'a, tua ing kino ibog in awak inta baradosa na'a, onu inta ko'ontongan bo inta pongaḷakuang, tua komintan in de'emanbií nongkon i Amaí, ta'e nongkon duniabií na'a.

17Dunia na'a bo bayongan tombonunya inta kino ibog in intau koyogotdon moyoyang, ta'e intau inta dinumudui kon ibog i Allah i mobiagbií mononoi.

18Ule adiíku mita, kopaḷutan dunia motoyongdon! Bo naí inta aim pinoguman ko'i monimu, intau mita inta mosaturu ko'i Kristus i mamangoibií. Bo tana'a mobayongdon im mosia inta mosaturu ko'i Kristus. Tua in tandanya kom motoyongdon ing kopaḷutan dunia.

19Saturu mita i Kristus tua in intaubií mita inta nonaḷaímaidon ko'i naton na'a, lantaran mosia tua in de'emanbií totu'u intau naton. Aka mosia intau mita naton, tantuí mosia umuranbií noyotakin naton. Natuabií simbaí motarangdon ko'i naton kom mosia tua in diaíbií totu-totu'u mo'ibog mopirisaya ko'i Tuhan moyotakin naton.

20Ta'e mo'ikow notarimadon kon Roho i Allah inta ain inogoi i Yesus Kristus, manangka intua mo'ikow nonota'audon kon totunduí mita inta nobanar.

21Pinaisku in na'a ko'i monimu de'emanbií lantaran mo'ikow diaípa nonota'au kon totunduí inta nobanar, ta'e lantaranbií kinota'auandon monimu in totunduí tatua bo kinota'auandon monimu kon diaíbií in uboḷ kon totunduí inta nobanar tatua.

22Ki ine im mo'uboḷ tua? Tantuí intaubií inta noguman kong ki Yesus tua in de'emanbií Raja Mopoposaḷamat inta pinodandi i Allah. Mosia tua in saturu i Kristus, sin diaíbií aku'onnya ing ki Amaí andeka Adií.

23Intau inta diaí motarima ko'i Adií, daí mangalenya sia diaí doman motarima ko'i Amaí.

24Sin tuamai, habar inta ain dinongog monimu, wakutu im mo'ikow bagupa nopirisaya, mustibií taguíon monimu kom bonu ing gina. Sin aka habar inta ain dinongog monimu tua umuran kogina-gina makow monimu, yo mo'ikow umuranbií mobiag motobatuí takin i Adií bo i Amaí.

25Bo na'a im pinodandi i Kristus tontanií ko'i naton: "Kobiagan motompia bo mononoi."

26Pinaisku tana'a ko'i monimu in soaáḷbií intau mita inta umuran moramiji monguboḷ ko'i monimu.

27Ta'e aka soaáḷ mo'ikow nion aim bidon inogoian i Kristus in Roho-Nya. Bo solama in Roho tatua mongawasapa ko'i monimu, diaí bidon paraḷu intau ibanea motunduí ko'i monimu, sin Roho bidon tatua im motunduí kom bayongan yagi-yagi ko'i monimu. Bo onu in tunduíon-Nya totu'ubií intua de'emanbií tongaí uboḷ. Tuamai tantuídon dudui kon onu inta ain sinunduí-Nya tua ko'i monimu bo umurandon kobiag motobatuí takin i Kristus.

28Pogumanku bui ko'i monimu adiíku mita: Kobiag umuran motobatuí takin i Kristus, simbaí aka Sia mamangoidon bui, yo kita diaídon mo'ondo-ondok in tumayow ko'i-Nia, bo diaí domandon mo'oya-oyak.

29Kinota'auandon monimu kong ki Kristus nobiag podudui in ibog i Allah. Tuamai musti kota'auan doman monimu kom pomuḷoi in intau inta nobiag podudui ibog i Allah, ki adiíbií mita i Allah.


  Share Facebook  |  Share Twitter

 <<  1 Yohanes 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran