Dual Panel1lima nosinggai no'iduduimai kon tua, Imang Moḷoben ki Ananias bo itoi mita in Yahudi takin tobatuí pongacara monia inta ki Tertulus in tangoinya, namangoi kon tayowon i Gubernur Peliks bo nopongadu ko'i Paulus.
2Ki Paulus dinia domandon kon tayowon monia, ki Tertulus inoiniídon doman, daí nomangkoidon ing ki Tertulus nosingog kainia, "Tuang gubernur inta mopia! Naonda ing ki Tuang nomarentah kom butaí nami na'a, mopiadon totok ing kinorasa'an nami. Bo ki Tuang mopandoi momarentah daí nobayong domandon im mopia ing kinorasa'an nami.
3Tua komintan sinarimadon nami takin pia ing gina bo kami im mopoyaput doman in sukur ko'i Tuang.
4Ta'e baí diaí moaíntoí in wakutu pakeíon, daí aku'oi im mopo'igum simbaí ki Tuang mo'ibog mongindongog kon onu im pongadu nami tana'a.
5Aindon kino kadapatan nami kon intau tana'a mongongacaubií inta mokobahaya. Sin kon ondakabií im bayaíannya, sia umuran mokopomukaí kon ropatoi kon sigad intau Yahudi. Sia na'a nobaliídon itoi intau Nasaret.
6Sia ain nonungkuḷ doman nongotor kom Baḷoi Tuhan. [Manangka intua dinomok nami in sia bo hakimon podudui in hukum agama nami.
7Ta'e itoi in tontara ki Lisias tua namangoi bo nogagow ko'inia nongkon inami,
8bo sia nomarentah simbaí intau mita inta mo'ibog mopongadu mamangoi ko'i Tuang.] Aka ki Tuang momirikisa tontanií ko'inia, kota'auan bidon i Tuang in taḷaínya inta pinogadu nami na'a."
9Intau mita in Yahudi inta kon tua nopototu'u doman kon onu im pinonapud tua ko'inia. Mosia noguman doman, "Totu'ubií in singog i Tertulus tua."
10Daí ki Gubernur nobogoi ing kasampatan ko'i Paulus nosingog. Daí ki Paulus nosingog nana'a, "Kinota'auanku bidon kon aindon kon taongannya ikow nobalií hakim kon intau mita in Yahudi. Tuamai in diaíbií mo'ondo-ondok in aku'oi momayow kon onu inta aim pinonapud monia ko'inakoí kon tayowon i Tuang.
11Mota'aubií pirikisa'an tontanií i Tuang, kon diaíbií no'iliu kom mopuḷuh bodoyowaí nosinggai inta ain kinotaliban aku'oi namangoi in Yerusalem sim mosambayang.
12Bo diaíbií doman kon dodai onda in tobatuímai intau noko'uma ko'inakoí koyogot nobobayowan intau ibanea andeka nogaid kong kakacauan kom bonu im Baḷoi Tuhan andeka kom baḷoi pososambayangan andeka doman kon tampat ibanea kong kotaí.
13Bo mosia in diaíbií doman mota'au mobogoi ing bukti kon onu inta ilapur monia ko'i Tuang soaáḷ inta pinonapud monia ko'inakoí tua.
14Ta'e akuonkubií ko'i Tuang kon aku'oi in nosumbahbií ko'i Allah im mogoguyang nami podudui in onu inta aim pinais kom bonu im buk i Musa bo buk in nabi mita.
15Aku'oi in naí bií doman mosia inta moharap doman makow ko'i Allah kom bayongan intau im mobiagbií bui naonda im matoi, intau mopia andeka intau mora'at!
16Tuamai aku'oi umuran moramiji totok simbaí ginaku umuran modarit kon tayowon i Allah bo kon tayowon intau.
17Bo naonda in tongonumaidon notaong nonaḷaímai kon Yerusalem aku'oi nobui mangoi kon tua sing modia kon doit inta pinotuḷung kom bangusaku bo mayak doman mobogoi in sosumbah ko'i Allah.
18Wakutu in aku'oi koyogot nomia kon tua kom Baḷoi Tuhan, kinotambakan mangoi monia in aku'oi, bo naonda in nopaḷut upacara pinondaritan kon awakku tua, wakutu intua diaíbií nobayong intau bo diaíbií noropatoi. Tongaíbií tongonumai intau Yahudi kon tua inta nongkon Asia.
19Tuamai mosiabií tua im musti mamangoi na'a bo mopongadu ko'i Tuang, aka oyuíon im pinonapud monia ko'inakoí.
20Andeka pomayakdon makow simbaí intau mita tatua im mamangoi tontanií bo moguman kon romuk onu in no'ulií monia ko'inakoí wakutu in aku'oi kon tayowon im Mahkamah Agama.
21Tongaíbií tokalimat tana'a in noulií monia inta siningogku wakutu in aku'oi kon tayowon monia, na'a in singogku: Akuoi adilon monimu in singgai na'a tongaíbií lantaran aku'oi mopirisaya kon intau mita inta aim minatoi im mobiagbií bui."
22Bo ki Peliks inta nonota'audon totok kon soaáḷ totunduí i Yesus nonimpodon kon sidang soaáḷ porkara tatua. Sia noguman, "Aka mo'iangoidon na'a itoi in tontara ki Lisias, bain tua bo tantuíonku im perkara monimu tanion."
23Bo ki Gubernur nopotabaí kom porwira inta noḷukad ko'i Paulus simbaí mayak monahang ko'inia, ta'e sia in nobaliíbií tahanan bebas bo yobayatnya mita im mota'aubií mamangoi ko'inia bo mobogoi ing kaparaḷuannya mita.
24Bo naonda in tongonumaidon nosinggai namangoidon ki Peliks takin ki buḷoinya ki Drusila inta intau in Yahudi. Bo ki Peliks noki'onií ko'i Paulus bo nongindongog in sia kon totunduí i Paulus soaáḷ mopirisaya ko'i Yesus Kristus.
25Ta'e naonda ing ki Paulus nongonguman kon soaáḷ mobiag mo'itutui, soaáḷ monahang kon napusu bo soaáḷ hukuman kon singgai tumi, inagiían ondok ing ki Peliks sahingga in nogumandon nana'a in sia, "Ikow mota'audon mayak in tana'a. Bain aka oyuíon ing kasampatan mopia, buikubií poki-oinií in ikow."
26Ki Peliks noharap makow kon ogoianbií i Paulus in doit in sia. Tuamai umurannya poki oinií ing ki Paulus bo mongonguman takinnya.
27Ta'e naonda in notompodon doyowa notaong ki Peliks, binaḷuiandon in sia, ki Perkius Pestusdon in nobalií gubernur. Bo lantaran mogamaí kong gina in intau Yahudi daí pinomayakdon makow i Peliks ing ki Paulus kom bonu im ponjara.