Alkitab Mobile SABDA
[VER] : [MONGONDOW]     [PL]  [PB] 
 <<  Lukas 9 >> 

1Ki Yesus nogoinií kom murií-Nya inta mopuḷuh bodoyowaí bo nobogoi ing kawasa moguntun kon dimukud mora'at bo mongundam doman kom bayongan takit.

2Onda intua nopotabaí ko'i monia minayak nopota'a-ta'au makow in Habar Mopia kon naíonda ing ki Allah mamangoi momarentah saḷaku Raja poḷat mongundam kon intau mita inta notakit.

3Na'a ing koyow-Nya ko'i monia, "Dona'aibií modia kon onu bo onu ing kom binaya'an. Dika doman modia kon tungkud andeka baḷun, ka'anon andeka doit, andeka ḷambung pomaḷuian.

4Aka mo'ikow bo ain sinarima kom baḷoi tobatuí, daí pogutundon kon tua modapot im mopaḷut oaíidanmu kong kotaí tatua.

5Bo aka oyuíon in intau inta doií motarima ko'i monimu, yo ḷuaidon kong kotaí tatua bo topirai in ḷobud kon si'oḷmu saḷaku poringatan ko'i monia."

6Daí minayakdon im murií i Yesus mopuḷuh bodoyowaí tatua bo sindaḷan nopoyaput in Habar Mopia poḷat doman mongundam kon intau mita inta nongotakit kon lipu mita inta kinobaya'an monia.

7Naonda ing ki Herodes, raja kon wilayah tatua nokodongog kom bayongan inta ain nobalií tatua, nobingung in sia, sin oyuíon doman intau im moguman kong ki Yohanes in nobiagdon bui.

8Oyuíon doman im moguman, "Ki Elia namangidon bui, bo oyuíon doman im moguman, tobatuí nabi tungkuḷ intua nobiagdon bui."

9Ki Herodes nosingog nana'a, "Aku'oi ain nopotabaí kon intau nomongkoí kon uḷu i Yohanes, yo ki inebií in sia tana'a inta kai'n habar ain nogaid kon inta mokoherang totok kon intau." Daí sia umuran moramiji simbaí moyodungkuḷ i Yesus.

10Bo naonda in rasuḷ mita inta pinotabaí i Yesus nobuidon mangoi, ino'uman monia ko'i Yesus onu inta aim pinomia monia. Daí dinia i Yesus im mosia minayak sinumontanií kon tobatuí kotaí, tangoinya kotaí im Betsaida. Tongaí ki Yesus bo murií-Nya mita ing kon tua.

11Ta'e naonda ing kinota'auan intau mobayong tatua, dinuduian monia in Sia. Daí pinomayak-Nyadon makow mosia in dinumudui ko'i-Nia. Kon tua ki Yesus nopoyaput in Habar soaáḷ naíonda ing ki Allah momarentah saḷaku Raja bo nogundam doman kon intau mita inta notakit kon tua.

12Naonda in no'ungkoḷomdon singgai, namangoidon ko'i-Nia im murií-Nya inta mopuḷuh bodoyowaí tatua bo noguman, "Pak Guru, poki-pobuiaidon in intau mita tanion simbaí mota'aupa im mosia motayak kom ponga'anan bo pogogaian monia kon lipuí inta nodiugmai kon na'a, sin noyayuk bo no'itontanií totok in tampat naton na'a."

13Ta'e ki Yesus noguman ko'i monia, "Mo'ikowbií im mobogoi ing ka'anon ko'i monia tua!" Daí kai monia doman, "Ko'inami tongaí oyuíon in roti lima bo toyak doyowa. Kolikudbií in aka mayak motaḷui ing kami daí oyuíon in ogoi ka'anon monia!"

14(Aka iaponmai in intau kon tua, yo degaí limamai noribu ing kobayongea komintan intau ḷoḷaki.) Daí ki Yesus noguman kom murií-Nya mita, "Pokilituíaidon mita im mosia mokolo-kolompok, tokolompok toḷolimamai nopuḷuh intau."

15Murií-Nya mita nogaid kon onu inta aim pinoguman ko'i monia. Pinokilituíandon mita monia intau moaíntoí tatua.

16Onda intua ginamaídon i Yesus in roti lima bo toyak doyowa nobungaí tatua bodongka iḷumangag kon ḷangit bo nosukur ko'i Allah. Onda intua binosi-bonsig-Nya in roti tatua bo inogoi kom murií-Nya mita pinokisilai kon intau moaíntoí tatua.

17Mosia nonga'an komintan dapot nobotug. Onda intua sinipun monia ing ki agat mita in roti tatua. Nosipun magií yo mopuḷuhpa bodoyowaí nokompeí.

18Kon singgai tobatuí, wakutu ing ki Yesus yogot nosambayang, murií-Nya mita namangoi ko'i-Nia. Daí ki Yesus noliboí ko'i monia, "Aka podudui guman in intau, yo ki ine in Aku'oi na'a?"

19Daí mosia notubag, "Oyuíon noguman ki Yohanes Mobobaptis. Oyuíon doman noguman ki Elia, ibanea doman noguman tobatuí nabi tungkuḷ intua bo nobiag bui."

20Ki Yesus noliboí bui ko'i monia, "Aka podudui in raian monimu, yo ki ine in Aku'oi na'a?" Daí ki Petrus notubag, "Raja Mopoposaḷamat inta pinodandi i Allah."

21Bo ki Yesus noguman kom murií-Nya mita, "Dona'ai poguman magií-makow monimu kon i inekadon."

22Bo ki Yesus noguman doman nana'a, "Ki Adií Intau mustibií motarima kon roriga mobayong, bo Sia im bayowan itoi mita in lipu, imang mita itoi bo mototunduí mita kon agama bo limodon, ta'e kon singgai in toḷunya biagon bui."

23Onda intua Sia noguman doman ko'i monia, "Intau inta mo'ibog dumudui ko'i-Nakoí, mustibií liongonnya in oaíidannya tontanií, bo momota'an kon roriganya pomuḷoi in singgai bo umuran dumudui ko'i-Nakoí.

24Sin intau inta tongaí umuran mo'ibog mogaid kon oaíidannya tontanií, kobulian ing kobiagannya, ta'e intau inta mo'ibog moliong kon rupa-rupa sim mogaid kon oaíidan-Ku, mosaḷamat in sia."

25Onubií im baragunanya, intau moko'ulií kom bayongan rupa-rupa inta mopira kon dunia na'a, aka tua komintan bo tongaí mokobodito ko'inia?

26Sin intau inta mo'oyak im mongaku kon sia tua in dumodudui-Ku bo mo'oyak im mogaid kon onu inta ain sinunduí-Ku, yo ki Adií Intau mo'oyak doman im mongaku kon sia in dumodudui-Ku ko wakutu im mo'iangoi in Sia takin kawasa-Nya bo kawasa i Amaí bo im malaekat mita inta mosuci.

27Baí kota'auan monimumu in na'a, "Kon sigad monimu tana'a oyuíon in diaípabií matoi aka sia diaípa moko'ontong ko'i Allah mamangoi momarentah saḷaku Raja."

28Degaí waḷudon nosinggai nongkon pino'tunduían kom bayongan tatua, ki Yesus nodia ko'i Petrus, ko'i Yohanes bo ko'i Yakobus notakod kom buḷud sim mosambayang.

29Wakutu ing ki Yesus yogot nosambayang kon tua, indoianmai yo pogot-Nya nobaḷui bo ḷambung-Nya in nobaliídon nobudoí mopo'uli-ulinag.

30Dalií doman bo inontong intau doyowa, tuata ing ki Musa bo ki Elia noki'pogontong kon yuaík im bayag inta nongkon soroga. Mosia nosirita takin i Yesus soaáḷ kopopatoi-Nya inta diaídon mo'onggot bo kobayaían-Nya kon Yerusalem.

31(9:30)

32Wakutu intua ki Petrus takin yobayatnya mita nosiug, ta'e naonda im mosia no'ibangon inontong monia in sindar motarang nonimbayag ko'i Yesus bo intau doyowa sinimindog kon diug-Nya.

33Bo naonda in intau doyowa tatua nonaḷaímai ko'i Yesus, ki Petrus noguman ko'i Yesus, "Pak Guru, mopira totok kita ing kon na'a. Manikah mogaid ing kami kon kemah toḷu, tobatuí ing ko'i Pak Guru, tobatuí ko'i Musa, bo tobatuí ko'i Elia." (Onu in siningog i Petrus tatua diaíbií kinota'auannya.)

34Yogotpa ing ki Petrus nosingog, baḷuí no'ikoḷubung mangoi ing goḷom ko'i monia, sahingga inangoian ondok im mosia.

35Bo kino'dongogandon in singog nongkon yuaík ing goḷom tatua noguman, "Tana'a ing ki Adií-Ku inta pinilií-Ku, indongogaidon in Sia."

36Naonda in nogogai singog tatua, indoianmai monia yo dongkadon ki Yesus tontanií ing kon tua. Ta'e tua komintan diaíbií ino'uman in murií-Nya mita kon intau ibanea.

37Nopo'ikoḷommai kon singgai, wakutu ing ki Yesus bo murií-Nya taya toḷu nosiligdon nongkon buḷud tatua. Intau moaíntoí namangoi ko'i Yesus.

38Tobatuí ḷoḷaki kon sigad in intau moaíntoí tatua nomaḷuí, "Pak Guru, tuḷungaipa bo indoiai ing ki adiíku totobatuí tua!

39Aka dimukud mora'at mamangoi monubuh ko'inia, sia baḷuí kumarak bo tumogat totok in awaknya bo bibignya ḷuaian im buraí. Dimukud tatua umuran mopororiga ko'inia, bo gogioí diaídon taḷaíannyamai ing ki adiíku tatua.

40Aku'oi nokituḷungdon kom murií mita i Pak Guru moguntun kon dimukud tatua, ta'e diaí mokomampu im mosia."

41Daí ki Yesus sinumoruí kom murií-Nya mita kai-Nia, "Mo'ikow nion intau mita inta mo'ibog momaḷawang bo diaí mopirisaya! Komangoipa degaí in onda Aku'oi musti umuran moyotakin monimu bo mosabar im mo'indoi kon oaíid mita monimu? Dia mangoi in adií tanion!"

42Ko wakutu in adií tatua nopobayak ko'i Yesus, dimukud mora'at tatua nopobanting ko'inia poḷat pinotorondoínya awak in adií tatua. Ta'e totok in sinoruaín i Yesus in dimukud mora'at tatua bo pinokiḷuaian-Nya nongkon adií tatua daí nopiadon in adií tatua bo poḷatdon pinosarahkan ko'i amaínya.

43Komintan intau noherang noko'ontong kong kawasa i Allah inta naímai tua ing koḷoben. Ko wakutu intau mita nongoherangpa totok kom bayongan inta pinomia-Nya tatua, ki Yesus noguman kom murií-Nya mita,

44"Tarukira bo dika koliongan in singog-Ku tana'a: Ki Adií Intau posarahkan kong kawasa in intau."

45Tongaí diaí kinomangalean im murií-Nya mita in singog-Nya tatua. Sin tua in sinontu'onbií binuni ko'i monia simbaí diaí komangalean monia. Bo mosia mo'ondok doman im moliboí ko'i-Nia.

46Bo nomukaídon im bobayowan kon sigad im murií mita i Yesus. Mosia nobobayowan mongo ki ine im moḷobe-ḷoben kon sigad monia tua.

47Tongaí kinota'auan i Yesus in raian monia tatua, tuamai ginamaí-Nya im mongoaídií tobatuí bo pinokisindogan-Nya kon diug-Nyamai.

48Bo Sia noguman kom murií-Nya mita, "Intau inta notarima kon adií tana'a sin nokotorop ko'i-Nakoí, yo tua im mangalenya sia notarima ko'i-Nakoí; bo ki ine in notarima ko'i-Nakoí, yo sia in notarima doman ko'i-Nia inta nopotabaí ko'i-Nakoí; sing ki ine mo'ompaí in dodia kon sigad monimu komintan, yo siabií tua im moḷobe-ḷoben."

49Ki Yohanes noguman nana'a ko'i Yesus, "Tuhan, kami noko'ontong kon intau noguntun kon dimukud mora'at nomakeí in tangoi i Tuhan, tongaí ilarang nami in sia, sin sia de'emanbií dumodudui naton."

50Daí ki Yesus noguman ko'inia, "Dona'aibií ampagan monimu in sia, sing ki ine im motoindudui ko'i monimu, yo sia tua in yobayat monimu."

51Naonda im modiugdon wakutu i Yesus mayak in soroga, sinantuí-Nyadon kon Sia mayakdon in Yerusalem,

52daí Sia nopotabaí kon intau inumuna ko'i-Nia. Mosia minayak bo sinumu'ot kon lipuí intau in Samaria. Makusud monia tua im moposadia kon onu inta paraḷuon i Yesus.

53Ta'e intau mita in Samaria doií motarima kong koaíngoian i Yesus sing mokantaradon totok kon Sia nopobayak naí Yerusalem.

54Nokota'aumai kon natua ing ki Yakobus bo ki Yohanes inta murií i Yesus, mosia noliboí nana'a, "Tuhan, mo'ibog degaí ing ki Tuhan baí po'igumon nami in tuḷu moḷabuí nongkon ḷangit bo momutuí ko'i monia komintan?"

55Ta'e ki Yesus nobobui ko'i monia bo sinumoruí.

56Daí mosia minayakdon kon lipuí ibanea.

57Naonda ing ki Yesus bo murií-Nya mita nongingguputdon kom bobayaían monia, oyuíon intau noguman ko'i Yesus, "Pak Guru, aku'oi mo'ibog dumudui ko'i Pak Guru kon ondakabií im bayaían!"

58Ta'e ki Yesus noguman ko'inia, "Ule, Serigala oyuíon im bubuínya, ḷagapan oyuíon im pugadnya, ta'e ki Adií Intau diaíbií in tampat posiugan-Nya."

59Ki Yesus noguman nana'a kon intau ibanea, "Duduidon ko'i-Nakoí!" Tongaí intau tatua notubag nana'a, "Tuang ogoiaipa muna iwakutu in aku'oi moḷobong ko'i amaíku."

60Ta'e ki Yesus noguman ko'inia, "Pomayakdon makow intau minatoi moḷobong kon intau minatoi; ta'e ikow im bayakdon bo poyaputdon in Habar Mopia kom bayongan intau kon lipu-lipuíannya. Poguman kong ki Allah im mamangoidon momarentah saḷaku Raja."

61Bo oyuíon doman intau in noguman nana'a ko'i Yesus, "Pak Guru, aku'oi im mo'ibog dumudui ko'i Pak Guru, ta'e ogoiaipa muna iwakutu in aku'oi mayak moguman kom bayongan ginaḷumku."

62Ta'e ki Yesus notubag, "Pomuḷoi intau inta momangkoidon momajeko, bo mobobuipa naí tumi, yo sia tua in diaíbií patus mobalií umat i Allah."


  Share Facebook  |  Share Twitter

 <<  Lukas 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel