Alkitab Mobile SABDA
[VER] : [MONGONDOW]     [PL]  [PB] 
 <<  Roma 2 >> 

1Manangka intua, utat mita ki inebií in ikow nion sim mohakim kon intau ibanea? Ikow tontanií kotaḷaíbií doman! Aka ikow bo mopotaḷaí kon intau ibanea, padahaḷ tumpaḷa nogaid kon naí inta inaidan monia tua, daí mangalenya kon tua ikowdon tontanií in nopoḷabuí in hukuman ko'inimu tontanií.

2Kinota'auan bidon naton kon aka ki Allah im mopoḷabuí in hukuman kon intau mita inta nogaid kon soaáḷ mita naí tatua, yo no'itutuibií ing kaputusan i Allah tatua.

3Ta'e mo'ikow nomia doman kon soaáḷ mita inta pinonapud monimu kon intau ibanea. Degaí iraimai monimu, mo'ikow nion diaíbií kotugatan in hukuman i Allah?

4Andeka diaí pandungon monimu in totabi, kasabaran-Nya bo kopopia ing gina-Nya notarima ko'i monimu? Tantuí kinota'auan bidon monimu kong ki Allah nopo'ontong ing kopopia ing gina-Nya, sin ibogon-Nya mo'ikow mogogaidon mogaid kon dosa mita.

5Ta'e mo'ikow totok motogat ing gina bo doií momaḷui kong gogutuí. Daí mangalenya kon tua mo'ikow bidon tontanií i modugang kon roriga in hukuman ko'i monimu kon singgai tumi, aka popo'ontongdon i Allah in toruí-Nya bo hukuman inta moaídil.

6Ki Allah mobogoibií in tontuliínya podudui in oaíid monia.

7Bo ki Allah mobogoibií ing kobiagan mopia bo mononoi ko'i monia inta umuran mogaid kon inta mopia, ko'i monia inta motayak kon inta momulia, inta motayak kong kahormatan bo inta motayak kon inta mononoi.

8Ta'e intau inta tongaí morai kong kopontingannya tontanií bo diaí doman motoindudui ko'i Allah, bo tongaí doman umuran dumudui kon inta mora'at, intau mita natua ing kosakibií totok ing gina i Allah.

9Intau inta mo'ibog mogaid kon inta mora'at im mosikisa bo moyoyiga, muna-munamai intau Yahudi bo mo'iduduimai bangusa doman ibanea.

10Tongaí bayongan intau inta mo'ibog mogaid kon inta mopia, ogoianbií i Allah ing kamulia'an bo kahormatan takin kobiagan motompia, muna-munamai intau in Yahudi, mo'iduduimai kon tua bangusa doman ibanea.

11Sin diaíbií poyoposion i Allah im bayongan intau.

12Intau mita inta de'eman bangusa Yahudi binaradosabií doman umpakah mosia diaí monota'au kon hukum agama Yahudi. Daí mosia in hukumbií tongaí diaí pinodoyon kon hukum tatua. Ta'e intau mita in Yahudi binaradosa naonda ing kinota'auan monia in hukum tatua. Daí mosia ihukum pinodoyon kon hukum tatua.

13Sin hubungan in intau takin i Allah motompia bui, de'emanbií lantaran intau tatua nonota'audon kon hukum agama Yahudi, ta'e lantaranbií sia nogaidon kon onu inta pinais kom bonu in hukum tatua.

14Intau mita ibanea diaí nonota'au kon hukum agama Yahudi. Ta'e aka intau mita tatua bo mo'ibogbií mogaid kon onu inta pinarentah kon hukum tatua, yo mosia bidon tua im mobalií hukum ko'i monia tontanií, umpakahbií mosia diaí nonota'au kon hukum agama Yahudi.

15Aid monia moponyatadon kon onu inta pinarentah in hukum tatua no'ipaisdon kom bonu ing gina monia. Gina monia mobogoi doman ing katarangan kon soaáḷ tatua, sim mosia tontanií oyuíon im potaḷaían bo oyuíon doman in totu'uon in raian monia.

16Natuata im mobalií kon singgai inta ain sinantuí tua. Kon Singgai tatua, podudui in Habar Mopia inta pinoyaputku na'a, ki Allah pongin i Yesus Kristus mohakim kom bayongan inta no'ibuni kom bonu ing gina bo raian im bayongan intau.

17Ta'e tana'a naonda i mo'ikow ule utat? Mo'ikow mongaku intau Yahudi. Mo'ikow kinumadai kon hukum agama Yahudi bo mopia totok ing gina monimu kon hubungan monimu takin i Allah.

18Mo'ikow noko'ulií kon totunduí mita nongkon hukum tatua, sahingga kinota'auanmudon onu ing kino'ibog i Allah bo mota'au domandon monantuí kon onda inta mopia.

19Bo mo'ikow noyakinbií kom mo'ikow nion itoi in intau bilog bo nobalií bayag ko'i monia inta nobiagpa kon sindip;

20bo nobalií doman guru ko'i monia inta nobodokpa, bo ko'i monia inta nobogaípa. Yo ikow in noyakin bidon kong kom bonu in hukum agama Yahudi, moko'ulií bidon ikow kom bayongan pongotahuan bo totunduí inta nobanar.

21Ki utat motunduí kon intau ibanea, yo nongonu sin ikow in diaíbií motunduí ko'inimu tontanií? Ki utat motunduí kon: "Dika monakow", yo nongonu sin ikow im monakowbií?

22Ikow motunduí kon intau: "Dika monualing", yo nongonu sin ikow tontanií im monualingbií? Ikow morongoí kom bayongan berhala, ta'e nongonu sin ikow im mayakbií mogamaí kom barang mita inta kom bonu im baḷoi berhala mita tatua?

23Mo'ikow dumodia sin oyuíon in hukum i Musa ko'i monimu, ta'e nongonu sim mo'ikow im moningkulebií ko'i Allah takin oaíid doií dumudui kon hukum-Nya mita?

24Kom bonu im Buk Mosuci pinais nana'a: "Lantaran mo'ikow intau mita in Yahudi, daí tangoi i Allah iromu-romukmaidon kon sigad in intau ibanea."

25Aka ikow bo motoindudui kon hukum in agama Yahudi, daí oyuíonbií mangale in sunat tatua ko'i monimu. Ta'e aka ikow bo doií dumudui kon soaáḷ mita inta pinarentah kom bonu in hukum tatua, yo totokbií in diaí mangale in sunat tatua ko'inimu.

26Aka intau de'eman Yahudi inta diaí sinunat dinumudui kon hukum agama Yahudi, yo sia inanggap bidon i Allah naonda bo intau inta ain sinunat!

27Bo intau inta diaí sinunat tua imopotaḷaí ko'i monimu intau in Yahudi, sin oyuíondon in hukum agama monimu bo sinunat domandon i mo'ikow, ta'e mo'ikow tontanií in doiíbií dumudui kon hukum tatua. Mosia tua in diaíbií sinunat ta'e totu-totu'ubií dinumudui kon hukum in agama Yahudi.

28Sin aka totu-totu'u intau in Yahudi, yo de'emanbií tongaí tangoinya intau in Yahudi, naí doman tua intau inta ain totu-totu'u sinunat de'emanbií tongaí kai intau sinunatdon in sia.

29Sin nana'abií, intau inta totokea Yahudi in intaubií inta ginanya totu-totu'ubií jiwa intau Yahudi. Naí doman tua, sunat inta totokea in sunatbií kong gina inta pinomia in Roho i Allah, de'emanbií inta pinais kom bonu im buk. Bo intau natua im pujion i Allah, de'emanbií pujion in intau.


  Share Facebook  |  Share Twitter

 <<  Roma 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel