Dual Panel1Bo aku'oi noko'ontong kon tobatuí malaekat ibanea inta moroton noponag nongkon soroga. Sia inoliungan ing goḷom bo kino bandowan in alibobag. Pogotnya naonda bo mata in singgai, si'oḷnya naonda bo oigi tuḷu.
2Sia kokada-kadai in litodan buk mo'intok inta no'ibukaí makow. Si'oḷnya koḷanan nomuntuk kon dagat bo si'oḷnya koḷoigi nomumtuk kon toba.
3Bo sia nomaḷuí noropot naonda bo ganggor in singa. Nopaḷut makow in sia nomaḷuí, sinubagan ing gotup pitu inta moyodudu-duduimai.
4Naonda in diaídon singog ing gotup pitu tatua, mo'ibog in aku'oi momais kon tua, ta'e kinodongoganku in singog nongkon soroga noguman, "Bunidon onu im pinoguman gotup pitu tatua, dona'aidon paison tua!"
5Bo malaekat inta inontongku in si'oḷnya nomuntuk kon dagat bo kon toba nopotonggoí in limanya koḷanan kon ḷangit.
6Sia nongibot pinodoyon kon tangoi i Allah inta diaí mato-matoi bo inta ain nomia kon ḷangit bo butaí, dagat bo bayongan tombonunya. Malaekat tatua noguman, "Wakutunya diaí bidon sorongon bui!
7Ta'e aka malaekat impitunya mogirupdon kon terompetnya, yo aidandon i Allah in roncana inta binuni-Nya, naí inta aim pinota'au muna kon intau mita inta nogaid kon oaíidan-Nya bo kon nabi mita."
8No'iduduimai kon tua singog inta ain dinongogku nongkon soroga tua, nosingog bui ko'inakoí. Kainia: "Bayakdon gamaí in litodan buk inta ain no'ibukaí makow tatua kon lima im malaekat inta nomuntuk kon dagat bo kom toba tua."
9Daí aku'oi minayak domandon kom malaekat tatua bo nopoigum simbaí ogoinyadon in litodan buk mo'intok tatua ko'inakoí. Sia noguman ko'inakoí, "Gamaídon bo ka'andon in na'a. Aka kon sianmudon yo mobalií bidon sia mopait, ta'e aka kom bibigpa yo moromimitbií in sia naonda bo madu."
10Ginamaíku domandon in litodan buk tatua nongkon limanya bo kina'an. Kom bibig naonda bo madu in nanamnya, ta'e naonda ing kon siandon mopait bidon ing korasa'an.
11Onda intua aku'oi pinarenta'an simbaí buipa mopoyaput magií-makow in habar i Allah soaáḷ bangusa mita, negara mita, bahasa mita bo raja mita.