Alkitab Mobile SABDA
[VER] : [MONGONDOW]     [PL]  [PB] 
 <<  Wahyu 13 >> 

1(12-18) Bo naga tatua sinimindog kom pintad. (13-1) Onda intua aku'oi noko'ontong kon tobatuí mahaḷuk inta iḷumuai nongkon bonu in dagat, mopuḷuh in tungoinya bo pitu in uḷunya. Pomuḷoi in tungoi oyuíon im mahkota, bo pomuḷoi in uḷu pinaisan tangoi mita inta pohojat ko'i Allah.

2Mahaḷuk inta inontongku tua, batangannya naonda bo macan tutul, si'oḷnya naonda bo si'oḷ im boruang, bibignya naonda bo bibig in singa. Mahaḷuk tatua inogoian i naga in ropot, tampat pomomarenta'annya bo kakuasa'an inta moḷoben.

3Tobatuí kon sigad in uḷu pitu im mahaḷuk tatua ko'ontongan naonda bo kekeb inta mobogatdon totok, ta'e kekeb tatua nopiadon. Bayongan tombonu in dunia na'a, nodait dinumudui kom mahaḷuk tatua takin nohera-herangan.

4Mosia nosumbah kon naga tatua, sin sia in nobogoi kong kakuasa'an kom mahaḷuk tatua. Mosia nosumbah doman kom mahaḷuk tatua takin noguman, "Diaíbií in notongkai mahaḷuk tana'a! Diaíbií im monahang tumayow moparang takinnya na'a!"

5Mahaḷuk tatua inogoianbií ing kasampatan dumodia im mosingog bo moningkule ko'i Allah. Sia inogoianbií doman ing kasampatan momarentah solama opat nopuḷuh bodoyowaí nobuḷan ko'onggotea.

6Bo sia mulaidon nohojat ko'i Allah, bo kon tangoi i Allah, bo kon tampat doman pinogutunan i Allah, takin bayongan inta nogutun kon soroga.

7Sia inogoianpa doman i wakutu moḷawang kon umat i Allah takin monaḷow ko'i monia. Bo inogoian doman ing kasampatan mongawasa kom bayongan suku, umat, bahasa bo bangusa.

8Mahaḷuk tatua sumbaíanbií im bayongan intau inta nobiag kon dunia na'a. Intau mita inta diaípa kinopaisan in tangoi monia kom bonu im buk kobiagan kapunya'an i Adií in Domba inta ain irataí, pinangkoipamai kon dunia na'a diaípa pinomia.

9Tuamai, aka mo'ikow mokosanggup mokidongog, yo indongogaidon in habar tana'a:

10"Intau inta sinantuídon domokon, mustibií in sia domokon. Bo intau inta ain sinantuí matoi sibaton, yo pasti matoibií doman sibaton. Manangka intua umat i Allah musti monahang bo mosatia."

11Bo aku'oi buidon noko'ontong kon tobatuí mahaḷuk ibanea inta no'itukat nongkon bonu im butaí. Doyowa in tungoinya, naonda bo tungoi adií in domba. Singognya naonda bo singog in naga.

12Kon tayowon im mahaḷuk inta muna tatua, sia nopomakeí ing kakuasa'annya inta moḷoben inta no'uliínya doman nongkon mahaḷuk tatua. Bayongan butaí na'a bo bayongan inta nogutun kon tudunya, pinakisanya mosumbah kom mahaḷuk inta muna tatua, inta kekebnya mobogat ain nopia.

13Mahaḷuk inta induanya tatua nogaid kon tanda inta totok im mokoherang kon intau. Kon tayowon bayongan intau binaliínya in tuḷu noḷabuí nongkon ḷangit.

14Bo bayongan intau inta nobiag kon dunia na'a akaḷannya in aidnya inta pinomianya kon tayowon im mahaḷuk inta muna tatua. Mosia pinokiaíidannya im patong mahaḷuk inta aing kinekeban im pitow, ta'e umuranpa nobiag.

15Mahaḷuk tatua inogoian doman ing kawasa mobogoi in nyawa kom patong tatua, sahingga mota'audon mosingog im patong tatua bo molimod kom bayongan intau inta doií mosumbah ko'inia.

16Bayongan intau, moḷoben bo mo'intok, mobiag no'oyuíon bo nobiag nobogaí, ata bo intau nobebas pinakisa im mahaḷuk tatua motarima kon tanda kon lima monia koḷanan andeka kom pogot monia.

17Diaíbií tobatuímai intau motaḷui andeka mopotaḷui in onukadon, aka diaí in tanda tatua. Tangoi im mahaḷuk tatua im pinonontanda, andeka angka inta nobalií tanda in tangoi tatua.

18Kon soaáḷ nana'a paraḷubií totok ing hikmat. Intau inta mobijaksana mota'aubií mogiap kom mangale angka im mahaḷuk tatua, sin angka tatua in tangoibií in intau. Na'a in angka tatua 666.


  Share Facebook  |  Share Twitter

 <<  Wahyu 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel