Alkitab Mobile SABDA
[VER] : [MONGONDOW]     [PL]  [PB] 
 <<  Yohanes 17 >> 

1Nopaḷut makow nosingog kon tua, ki Yesus iḷumangag kon ḷangit bo noguman, "Amaí, na'adon i wakutunya. Poḷantudon ing ki Adií-Mu, simbaí ki Adií-Mu mopoḷantud doman ko'i Amaí.

2Amaí inogoi-Mudon ing kawasa ko'i-Nia si mongawasa kom bayongan inta nobiag, simbaí Sia mobogoi doman ing kobiagan mononoi ko'i monia inta inogoi i Amaí ko'i-Nia.

3Nana'a ing kobiagan mononoi tua; ibogon tua bayongan intau monota'au ko'i Amaí inta tongaíbií Sia tua ing ki Allah inta mobanar, bo monota'au doman ko'i Yesus Kristus inta pinotabaí i Amaí.

4Aku'oi ain nopomulia ko'i Amaí kon dunia na'a takin cara nokopoḷapat kon oaíidan inta pinoki aid i Amaí ko'i-Nakoí.

5Amaí! Pomuliadon Aku'oi tana'a makow kon tayowon-Mu, takin kamulia'an inta ko'i-Nakoí wakutu in noyotakin i Amaí kon dodai in dunia na'a diaípa pinomia.

6Pinota'au-Kudon ing ki Amaí kom bayongan intau kon dunia na'a inta ain inogoi i Amaí ko'i-Nakoí. Ki Amaíbií ing kitogi ko'i monia tua, bo ki Amaíbií doman in nobogoi ko'i-Nakoí ko'i monia. Mosia dinumuduidon kon singog i Amaí.

7Tana'a kinota'auandon monia kom bayongan inta inogoi i Amaí ko'i-Nakoí komintanbií nongkon i Amaí.

8Pinota'au-Kudon ko'i monia in singog inta inogoi i Amaí ko'i-Nakoí; bo sinarimadon monia. Kinota'auan monia kon Aku'oi in totu-totu'ubií namangoi nongkon i Amaí bo mosia mopirisayabií kong ki Amaíbií in nopotabaí ko'i-Nakoí.

9Sambayangan-Ku im mosia. De'emanbií dunia na'a in sambayangan-Ku, ta'e intaubií mita inta ain inogoi i Amaí ko'i-Nakoí, sing ki Amaíbií ing kitogi ko'i monia.

10Onda ing kapunya'an-Ku, kapunya'anbií doman i Amaí-Ku intua, bo onda ing kapunya'an i Amaí, kapunya'an-Kubií doman tua. Aku'oi ain pinomulia kon sigad monia.

11Aku'oi mamangoidon ko'inimu in tana'a. Diaí bidon Aku'oi mogutun kon dunia na'a, ta'e mosia umuranpabií kon dunia na'a. Amaí inta mosuci, ḷukadaipa i mosia takin kawasa in tangoi-Mu. Tangoi inta ain inogoi-Mu ko'i-Nakoí, simbaí mosia motobatuídon naí kitada.

12Wakutu Aku'oi koyota-yotakinpa monia, iḷukadan-Kudon mosia takin kawasa in tangoi-Mu, tangoi inta inogoi i Amaí ko'i-Nakoí. Iḷukadan-Kudon im mosia bo diaíbií tobatuímai nobalií kon sigad monia tua, kolikudbií in sia inta ain sinantuí kom mobuli, simbaí mobaliídon onu inta aim pinais kom Buk Mosuci.

13Tana'a Aku'oi mamangoidon ko'i Amaí. Tua komintan pinota'au-Kudon wakutu in Aku'oi kon duniapa na'a, simbaí totu-totu'udon korasaan monia sanang ing gina-Ku.

14Pinota'au-Kudon ko'i monia im Pirman i Amaí bo mosia sinaturu in dunia, sin de'emanbií kapunya'an in dunia na'a im mosia, naí doman Aku'oi inta de'emanbií kapunya'an in dunia.

15De'emanbií Aku'oi mopo'igum kombaí gamaíandon i Amaí im mosia nongkon dunia na'a, ta'e po'igumon-Ku simbaí ḷukadan i Amaí im mosia nongkon kawasa i inta mora'at.

16Naí Aku'oi na'a inta de'emanbií kapunya'an in dunia na'a, daí mosia doman tua in de'emanbií kapunya'an in dunia.

17Pomiadon im mosia tongaí mobalií kapunya'an i Amaí pongin kabenaran. Pirman i Allah tuata ing kabenaran.

18Naí ki Amaí nopotabaí ko'i-Nakoí namangoi in dunia na'a, daí natua doman Aku'oi mopotabaí ko'i monia kon dunia na'a.

19Lantaran kopontingan monia, Aku'oi noposarahkandon in awak-Ku saḷaku kapunya'an i Amaí simbaí mosia tongaí doman mobalií kapunya'an-Ku pongin kabenaran i Amaí.

20Bo de'emanbií tongaí mosia in sambayangan-Ku, ta'e intaubií doman mita inta mopirisaya ko'i-Nakoí kon singgai mo'iduduimai lantaran mosia nopirisaya kon onu inta pinota'au monia na'a.

21Aku'oi mopo'igum Amaí simbaí mosia komintan motobatuídon, naí ki Amaí notobatuí takin-Ku bo Aku'oi notobatuí doman i Amaí; simbaí mosia motobatuí doman takin Naton simbaí dunia mopirisaya kon Ikowbií inta ain nopotabaí ko'i-Nakoí.

22Mosia inogoian-Kudon ing kamulian inta inogoi i Amaí ko'i-Nakoí, simbaí mosia motobatuídon naonda bo Kita ain notobatuí.

23Aku'oi takin mosia, bo ki Amaí takin Aku'oi, simbaí mosia totu-totu'udon motobatuí, simbaí kota'auandon in dunia na'a kong ki Amaíbií in nopotabaí ko'i-Nakoí bo ki Amaíbií im monotabi ko'i monia naí tabi i Amaí ko'i-Nakoí.

24Amaí, ibogon-Ku, simbaí mosia inta ain inogoi i Amaí ko'i-Nakoí moyotakin-Ku doman kon tampat inta bayaían-Ku, simbaí ko'ontongandon monia ing kamulia'an-Ku, inta ain inogoi i Amaí ko'i-Nakoí. Sin Aku'oi kino-tabi i Amaí ko wakutu in dunia na'a diaípa pinomia.

25Amaí inta moaídil! Diaí kinota'auan in dunia na'a ing ki Amaí, ta'e Aku'oi in nonota'aubií ko'i Amaí bo intau mita tana'a nonota'au bidon kong ki Amaíbií in nopotabaí ko'i-Nakoí.

26Pinota'au-Ku bidon ko'i monia in tangoi Amaí bo umuran-Kubií popota'au intua, simbaí tabi i Amaí ko'i-Nakoí umuran makow kong gina-gina makow monia bo Aku'oi motobatuí monia."


  Share Facebook  |  Share Twitter

 <<  Yohanes 17 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel