Alkitab Mobile SABDA
[VER] : [NGAJU]     [PL]  [PB] 
 <<  Wahyu 6 >> 

1Limbah te aku mite Anak Tabiri te mukei segel je solake bara uju segel te. Palus aku mahining auh ije biti bara ewen epat taloh belom te hamauh, "Kahetoh!" Auhe hamauh te kilau auh nyaho.

2Maka aku mite, palus aton gitan ije kongan kuda baputi. Oloh je manongkang kuda te mimbing ije panah, tuntang ije makota inenga akae. Ie miar kilau ije biti pangkalima hai je handak haguet marabut kamanang.

3Limbah te Anak Tabiri te muap segel je kaduee, tuntang aku mite taloh belom je kaduee hamauh, "Kahetoh!"

4Palus ije kongan kuda je beken balua tinai. Kuda te bahandang warnae. Oloh je manongkang kuda te inenga kuasa uka mampanihau kadamai intu hunjun petak, mangat kalunen hapatei sama arepe. Maka akae inenga ije kabilap padang hai.

5Palus Anak Tabiri te mamusit segel je kateloe. Tuntang aku mahining taloh belom je kateloe hamauh, "Kahetoh!" Aku mite, lembut ije kongan kuda babilem. Oloh je manongkange mimbing timbangan intu lengee.

6Tuntang aku mahining taloh je auhe kilau auh je mantehau bara marak taloh belom te. Auh te hamauh, "Ije liter gandom je bahalap, regae sama kilau upah oloh bagawi jandau, tuntang telo liter jagung tingkat je beken regae sama kilau upah oloh bagawi jandau kea. Tapi ela marusak kare batang sikon tuntang kabon anggor!"

7Limbah te Anak Tabiri te mukei segel je kaepate. Tuntang aku mahining taloh belom je kaepate hamauh, "Kahetoh!"

8Aku mite palus lembut ije kongan kuda ampin warnae kalas. Oloh je manongkange te bagare Pampatei. Bara hila likute, ie inuntut awi Lewun Pampatei. Kuasa inenga akan ewen uka marentah saperepat bagian kalunen toh, mangat ewen tau mampatei mahapan parang, wayah lau, kare ganan panyakit tuntang kare meto basiak.

9Limbah te Anak Tabiri te mukei segel je kalimee. Maka aku mite hong penda mesbeh aton kare roh oloh je impatei karana ewen manyampai peteh Hatalla mahapan kasaksian ewen.

10Ewen mangkariak hapan auh je hai, "O Tuhan je Paham Kuasa, je barasih tuntang bujur! Kilen katahie hindai harun ikau mahukum oloh kalunen awi ewen mampatei ikei?"

11Akan genep bitin ewen te inenga ije kalambar jubah baputi. Palus ewen inyoho mentai hanjulo tinai sampai kare kawal tuntang paharin ewen saperjuangan je imapatei kilau ewen jadi sukup karee.

12Palus aku mite Anak Tabiri te mukei segel je kajahawen. Te petak palus hagerek paham. Matanandau manjadi babilem sama kilau benang babilem je kasar, tuntang bulan manjadi bahandang sama kilau daha.

13Kare bintang baduroh bara langit akan hunjun petak sama kilau bua ara je manta baduroh bara batange katika inggerek awi riwut barat.

14Langit nihau imbalon kilau karatas, kakare bukit tuntang pulau tatindar bara ekae.

15Palus kare raja hong kalunen, kare oloh hai, kare pangkalima, kare oloh tatau tuntang kare oloh panguasa, tuntang kare oloh awang beken, aloh oloh je jipen atawa oloh mardeka, uras manyahokan arepe hong kare goha tuntang intu helat kare batun bukit.

16Dengan kare bukit tuntang dengan kare batu te ewen mangkariak, "Enyet ikei, sahokan ikei bara tampayah oloh te je mondok hunjun padadusan, tuntang bara kalait Anak Tabiri te!

17Andau je paham kahaie jari sampai, toh ewen mamparahan kalait ewen, tuntang ije biti mahin jaton oloh je olih tahan manaharep ewen!"


  Share Facebook  |  Share Twitter

 <<  Wahyu 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel