Alkitab Mobile SABDA
[VER] : [NIAS]     [PL]  [PB] 
 <<  1 Petrus 1 >> 

1Ya'ami ira talifusõ nituyu Lowalangi, si no muzaewe ba wekoli ba danõ Wondro, Galatia, Kafadokia, Asia ba Bitinia. Ya'odo Fetero, sinenge Yesu Keriso, udõnadõna wa Ifahowu'õ ami Lowalangi ba Ihõna khõmi wa'ohauhau dõdõ. Tetuyu ami tobali banua Lowalangi faudu molo'õ nihonogõi Lowalangi Ama. Ba no Ibali'õ banua ni'amoni'õ ami Eheha Lowalangi andrõ, ni'oniagõ khõ Lowalangi, ena'õ solo'õ khõ Yesu Keriso ami ba nisasai ba ndro-Nia.

2(1:1)

3Ta'andrõ saohagõlõ khõ Lowalangi, Ama Zo'aya ya'ita Yesu Keriso! I'omasi'õ sibai ita, andrõ wa no Ibe'e khõda wa'auri si bohou, ya'ia me Isusugi Yesu Keriso moroi ba wa'amate. Tobali tõtõnafõ saro khõda da'õ.

4Tadõnadõna wa ta'okhõgõ howuhowu andrõ si no Ihõnagõ Lowalangi ba mbanua-Nia, ya'ia howuhowu si no te'irõ'õ ba zorugo, irege tebai tekiko, ba ma obou ba ma ahoe.

5Khõmi fefu da'õ, bõrõ me no mamati ami khõ Lowalangi. Andrõ wa Irorogõ ami fa'abõlõ Lowalangi, ena'õ mitema wangorifi andrõ, ni'oroma'õ dania ba luo safuria.

6Bõrõ da'õ, mi'owuawua'õ dõdõmi, hew̃a'ae iada'e abu dõdõmi ba zi lõ arara sibai, me oya falukha ami ngawalõ wanandraigõ.

7Ohitõ dõdõ ba da'õ fefu, ya'ia ba wamaduhu'õ wa sindruhundruhu mamati ami khõ Lowalangi ba ma lõ'õ. Ana'a si tola tekiko na'i, ba mutandraigõ sa'atõ ba galitõ. Ba abõlõ ebua lakhõmi wamatimi andrõ moroi ba gana'a, andrõ wa si lõ tola lõ mutandraigõ, ena'õ aro. Ba bõrõ da'õ nisuno ami ba nifosumange ba ni'alaw̃a'õ ba ngaluo wangawuli Yesu Keriso andrõ.

8No mi'omasi'õ Ia, hew̃a'ae lõ irai mi'ila Ia fõna. Mamati ami khõ-Nia hew̃a'ae lõ mi'ila Ia iada'a. Da'õ wa'owuawua dõdõmi ba mirasoi wa'omuso dõdõ sebua sabõlõbõlõ si lõ tola alua baeha.

9Bõrõ me misõndra wozu wamatimi andrõ, fangorifi noso.

10Fangorifi da'e ni'osisi'õ ba ni'alu'alui ndra sama'ele'õ, ba no lafa'ele'õ howuhowu andrõ ni'amualagõ Lowalangi khõmi.

11No la'alu'alui hewisa ba hawa'ara alua da'õ dania, ya'ia zi no Iw̃a'õ Eheha Keriso andrõ, si so bakha ba dõdõra. Ba ginõtõ da'õ Ifa'ele'õ khõra Eheha andrõ ngawalõ wamakao si lõ tola lõ Itaõgõ Keriso awõ lakhõmi-Nia si so na no aefa da'õ.

12Khõ ndra sama'ele'õ andrõ I'ombakha'õ Lowalangi wa tenga soguna khõra ni'ohalõw̃õgõigõra andrõ, no soguna khõmi, ya'ia ngawalõ nirongomi iada'e moroi ba zanuriaigõ Turia Somuso Dõdõ sanandrõsa khõ Yesu Keriso. Lafa'ema khõmi da'õ si fao fa'abõlõ Geheha Lowalangi nifatenge moroi ba zorugo. Mala'ika gõi na'i, omasi ira la'ila duria ni'ombakha'õra andrõ.

13Bõrõ da'õ, mi'ama'anõ. Mi'angelama ba mifõnui wanõtõnami ba howuhowu andrõ nibe'e khõmi ba ginõtõ we'aso Yesu Keriso andrõ dania.

14Mi'o'õ khõ Lowalangi, ba bõi sauri ba wolo'õ fangisõmi ami si mane fõna, me lõ saboto ba dõdõmi Lowalangi.

15Mi'amoni'õ ami ba ngawalõ nilaumi fefu, si mane Lowalangi si no mogaoni ya'ami, no ni'amoni'õ.

16No tesura ba Mbuku Ni'amoni'õ, "Mi'amoni'õ ami me no ni'amoni'õ Ndra'o."

17Fa'ama ami khõ Lowalangi na mangandrõ ami. Ba hiza, Lowalangi da'õ zanguhuku niha molo'õ nifalua zamõsana, ba lõ famaigi bawa. Bõrõ da'õ, fatua so ami ba gulidanõ andre, mifolakhõmi Lowalangi ba wa'aurimi.

18No mi'ila ira talifusõ hadia zi no mube'e bõli ba wangefa'õ ya'ami moroi ba wa'auri si lõ boto andrõ, moroi khõ ndra tuami mege. Tenga si tola tekiko nibe'e famu'ania, firõ ba ma ana'a,

19no fondrege zebua bõli, ya'ia da'õ, Yesu Keriso samõsa, si tobali ono mbiribiri si lõ sinegu, si lõ si ta'unõ, nibe'e sumange khõ Lowalangi.

20No Ituyu Keriso andrõ Lowalangi, fõna wombõi ulidanõ. Ba wa'ahatõ ginõtõ safuria andre, mõi Ia ba gulidanõ ba wangorifi ya'ami.

21Moroi khõ-Nia wa mamati ami khõ Lowalangi si no manusugi Ya'ia moroi ba ngai zi mate, ba samolakhõmi Ya'ia. Tobali, Lowalangi da'õ nifaduhusimi tõdõ ba ba khõ-Nia gõi manõtõna ami.

22Bõrõ me solo'õ famahaõ si otarai Lowalangi ami, andrõ wa mihaogõ ami, ba mi'omasi'õ niha si sara lala wamati khõmi moroi si'aikõ ba dõdõ.

23Moroi ba daroma li Lowalangi sauri ba si lõ tebulõ andrõ, no tobali niha si bohou ami, tenga si tumbu moroi ba niha, no moroi khõ Nama si lõ tebulõ.

24Ba Mbuku Ni'amoni'õ, no tesura si mane, "Hulõ ndru'u niha fefu, ba lakhõminia ba hulõ mbowo ndru'u. Aleu ndru'u ba atoru mbowonia.

25Ba taroma li Zo'aya andrõ, lõ tebulõ irugi zi lõ aetu." Taroma li andrõ ba no Turia Somuso Dõdõ si no mu'ombakha'õ khõmi.


  Share Facebook  |  Share Twitter

Download Audio MP3 (1 Petrus 1):
Mobile (Low Quality) - CD (High Quality)

 <<  1 Petrus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2023
Alkitab.SABDA.org

Android.SABDA.org
SABDA.mobi
Bantuan
Dual Panel Dual Panel

Laporan Masalah/Saran