Dual Panel1He ya'ami iraonogu! Usura da'e khõmi ena'õ bõi mifazõkhi horõ. Ba na so zamazõkhi horõ, ba so khõda zanolo, Ya'ia Yesu Keriso, si fahõna fa'atulõ andrõ, satulõ, Ilului wangandrõ soguna khõda fõna Nama.
2Ba khõ Yesu Keriso andrõ, tasõndra wangefa horõda. Ba tenga ha horõda manõ, I'efa'õ gõi horõ nõsi gulidanõ ma'afefu.
3Na ta'o'õ goroisa Lowalangi, da'õ dandra wa no aboto ba dõdõda Lowalangi.
4Niha sanguma'õ, "No aboto ba dõdõgu Lowalangi," ba na lõ i'o'õ goroisa Lowalangi, sofaya niha da'õ, lõ monahia Lowalangi ba dõdõnia.
5Ba niha solo'õ taroma li Lowalangi, ba mo'ahonoa wangomasi'õnia Lowalangi. Da'õ dandra wa no ha sambua ita khõ Lowalangi.
6Ba na so zanguma'õ, wa fa'aurinia no ha sambua khõ Lowalangi, lõ tola lõ itara gahe Keriso.
7Ya'ami ira talifusõ ni'omasi'õ! Sinuragu andre ba tenga amakhoita si bohou. Amakhoita si no ara da'e si no mufa'ema khõmi me bõrõta mamati ami khõ Yesu, ya'ia duria si no mitema moroi khõ Lowalangi.
8Ba hewa'ae si manõ, amakhoita nisuragu andre no si bohou gõi; no oroma wa'atulõnia ba khõ Yesu Keriso ba ba wa'aurimi. Bõrõ me si taya zogõmigõmi, ba haga sindruhu andrõ no muhaga sa'ae.
9Niha sanguma'õ wa bakha ba haga so ia, ba na fatiu dõdõnia khõ dalifusõnia, no ba zogõmigõmi so ia irugi iada'e.
10Niha sangomasi'õ talifusõnia, no sauri bakha ba haga, irege lõ manõ tesõndra khõnia wangekhugõ niha bõ'õ ba wamazõkhi horõ.
11Ba niha si fatuwu khõ dalifusõnia, no si so bakha ba zogõmigõmi. No sowaõwaõ ba zogõmigõmi, ba lõ i'ila heza mõi ia, bõrõ me sogõmigõmi andrõ zombali'õ ya'ia lõ i'ila hadia ia.
12Ba usura khõmi, ya'ami iraono, bõrõ me no mu'efa'õ horõmi bõrõ Keriso.
13Ba usura khõmi, ya'ami ira ama, bõrõ me no aboto ba dõdõmi Ia si no so i'otarai mbõrõta. Ba usura khõmi, ya'ami si bohou ebua, bõrõ me no mi'alani Gafõkha.
14Ba usura khõmi, ya'ami iraono, me no mi'ila Lowalangi, Ama. Usura khõmi, ya'ami ira ama, bõrõ me no aboto ba dõdõmi Daroma Li si no so i'otarai mbõrõta. Ba usura khõmi, ya'ami si bohou ebua, bõrõ me no sabõlõ ami. Ba me lõ mamalõ so ba dõdõmi Daroma Li Lowalangi, ba no mi'alani Gafõkha.
15Bõi mi'omasi'õ nõsi gulidanõ andre, ma hadia ia manõ zi so ba gulidanõ andre. Na mi'omasi'õ nõsi gulidanõ, ba lõ fangomasi'õ Ama khõmi.
16Me fefu hadia ia zi so ba gulidanõ andre -- ya'ia da'õ fefu hadia zomasi dõdõ niha si so horõ, ba fefu hadia ia ni'ila ba somasi ni'okhõgõ ba fefu hadia ia ba gulidanõ andre nibe'e we'ewe'e dõdõ -- fefu da'õ no si tenga si otarai Nama, no moroi ba gulidanõ.
17Ulidanõ ba fefu hadia ia zi so bakha khõnia somasi dõdõ niha, ba si taya. Ba niha solo'õ somasi Lowalangi, ba lõ tebulõ sauri sagõtõ fa'ara.
18Ya'ami iraonogu, amozua ginõtõ no ahatõ! Ba si mane si no mu'ombakha'õ khõmi wa so dania zi Fa'udu khõ Keriso, ba iada'e no ato zi maoso zi fa'udu khõ Keriso. No famaduhu'õ da'e wa no ahatõ Luo Safuria.
19Si fa'udu khõ Keriso andrõ no niha si no mondrõi ya'ita, me sindruhunia sa ira tenga niha khõda. Na niha khõda ira, ba lõ tebulõ ira awõda. Ba laheta ira moroi khõda, ena'õ oroma wa samõsa lõ gõi moroi ba khõra zi ndruhundruhu farahu ba ngasida.
20Ba no mitema Geheha Lowalangi nibe'e Yesu Keriso. Da'õ mbõrõ wa aboto ba dõdõmi wamahaõ sindruhu andrõ.
21Tobali, usura da'e khõmi tenga me lõ saboto ba dõdõmi wamahaõ sindruhu, no sindruhu aboto ba dõdõmi, ba no aboto ba dõdõmi gõi wa lõ falimosa ba wamahaõ sindruhu andrõ.
22Niha solau faya ba no niha sanguma'õ wa tenga Razo Sangorifi Yesu si no Ifabu'u Lowalangi. No si fa'udu khõ Keriso niha andrõ; Lõ ifaduhu'õ Nama he gõi Ono andrõ.
23Niha si lõ mamaduhu'õ Ono andrõ, lõ ifaduhu'õ Nama. Ba niha samaduhu'õ Ono andrõ, eluahania itema gõi Nama andrõ.
24Bõrõ da'õ, turia si no mirongo moroi ba mbõrõta lõ tola lõ mihaogõ wondrorogõ bakha ba dõdõmi. Na mihaogõ wanõngõni turia andrõ, ba lõ mamalõ ha sambua ami khõ Nono andrõ ba ba khõ Nama.
25Ba da'e zi no Ifabu'u Keriso khõda: fa'auri sindruhu si lõ aetu.
26Sinuragu andre, no sanandrõsa ba niha sangalui lala ba wolimo ya'ami,
27ba sanandrõsa khõmi samõsa, no Ifaduwa Geheha-Nia Keriso khõmi. Ba sagõtõ Geheha-Nia so bakha ba dõdõmi, lõ moguna so niha samahaõ ya'ami. Bõrõ me Eheha-Nia andrõ zamahaõ ya'ami sanandrõsa ba ngawalõ hadia ia fefu; ba hadia nifahaõ-Nia andrõ ba no sindruhu, tenga faya. Bõrõ da'õ, ya mi'o'õ hadia nifahaõ Geheha andrõ, ba ya lõ mamalõ ha sambua ami khõ Keriso.
28Bõrõ da'õ, ya'ami iraonogu, bõi mibulõ'õ ami ha sambua khõ Keriso, ena'õ na ba ginõtõ we'aso-Nia dania, lõ ata'u ita wangondrasi Ya'ia, ba lõ tabini'õ ita bõrõ wa'aila.
29Ba no aboto ba dõdõmi wa Keriso andrõ no I'o'õ zomasi Lowalangi. Bõrõ da'õ lõ tola lõ aboto ba dõdõmi gõi wa haniha zolo'õ somasi Lowalangi ba no Ono Lowalangi.