Dual Panel1Ba ya'odo, Faulo, omasido uw̃a'õ zi sambua huhuo khõmi. Ya'odo andre, molo'õ fehede niha, ba no sohauhau na fatahõ khõmi, ba hiza, barani na ba zarõu. Bõrõ wa'ohauhau ba fa'asõkhi dõdõ Keriso,
2utõtõna sibai bõi mi'andrõ ena'õ abe'e ndra'odo khõmi na luo sodo. Bõrõ no so ba dõdõgu wolau sabe'e ba niha sanguma'õ, wa fohalõw̃õma ba ba wangalui õsi gulidanõ.
3Duhu, wa ba gulidanõ nasa so ndra'aga andre, ba hiza fasõndratama tenga molo'õ fa'a'ulidanõ.
4Fangõna ni'oguna'õma ba wasõndrata andre, tenga fangõna soroi gulidanõ, no fangõna si otarai Lowalangi sabõlõ. Faoma fangõna da'õ madudugõ ngawalõ watahana niha; mataha fefu ngawalõ huhuo fasosota,
5ba madudugõ ngawalõ wa'aganuno ni'otomosi ba wolaw̃a sindruhu khõ Lowalangi. Mafa'u'u ngawalõ gera'era niha ba wombali'õ ya'ira solo'õ khõ Keriso.
6Ba na no a'oi so wolo'õmi, no mafa'anõ ndra'aga ba wangotu'õ fefu niha si lõ molo'õ.
7Ya'aboto ba dõdõmi zindruhunia. Na aro dõdõ zi samõsa niha wa tana khõ Keriso ia, ba ya'ifareso ia mangawuli awõ wa ibotokhi ba dõdõnia wa ya'aga gõi no tana khõ Keriso si mane ya'ia.
8Lõ ailado na usuno ndra'o ba wa'abõlõ andrõ si no Ibe'e So'aya khõma, bõrõ me ba wanga'azõkhi ya'ami Ibe'e wa'abõlõ andrõ, ba tenga ba wamakiko.
9Lõ omasi ndra'o na miw̃a'õ tõdõmi hulõ ufeta'uta'u ami ba zuragu.
10Law̃a'õ niha, "Surasura Waulo andrõ abe'e ba molakhõmi, ba na so ia ba gotaluada sa, ba no sambõ fa'abõlõ ia, ba huohuonia ba lõ eluaha!"
11Ba ena'õ aboto ba dõdõ niha si mane da'õ wa na so ndra'aga ba gotaluami dania, ba fenahõi si mane si so ba zurasurama andrõ nifaluama.
12Tatu gõi lõ barani ndra'aga mafaomagõ ba ma mafaedogõ ndra'aga ba niha sanguma'õ sebua ira. Ha wa'abodonia ira! La'ehao samõsa zu'asu'a ba la'anu'a'õ khõra ya'i zu'asu'a da'õ.
13Tenga si manõ ndra'aga. Na masunosuno ndra'aga, ba lõ matalu'i nola. No so ndra'aga ba nola'ola halõw̃õ si no Ihonogõi Lowalangi khõma. Ba farahu ami bakha ba nola halõw̃õ andrõ.
14Bõrõ da'õ, me ma'ondrasi ami awõ wa ma'ohe Duria Somuso Dõdõ sanandrõsa khõ Keriso ba khõmi, sindruhunia lõ nitalu'ima nola'ola halõw̃õma andrõ.
15Lõ masunosuno ndra'aga ba halõw̃õ niha bõ'õ si so baero nola'ola si no Ihonogõi Lowalangi khõma. Ba madõnadõna wa na tedoudou wamatimi, ba ebua halõw̃õ ni'ohalõw̃õgõima ba khõmi, molo'õ ola'ola si no Ifakhoi Lowalangi andrõ khõma.
16Bõrõ zi manõ tola gõi mafa'ema Duria si sõkhi andrõ ba mbanua bõ'õ misa, hew̃a'ae lõ moguna mangosebua ndra'aga ba halõw̃õ nifalua ba nahia wohalõw̃õ niha bõ'õ.
17Bakha ba Mbuku Ni'amoni'õ no tesura, "Niha somasi manunonuno hadia ia, ba ya musunosuno hadia ia zi no Ifazõkhi So'aya."
18Bõrõ me niha nisuno ya'ia niha nisuno Zo'aya, ba tenga niha zanuno ya'ia.