Dual Panel1Fe'amõigu si medõlu da'e ba khõmi. No musura ba Mbuku Ni'amoni'õ, "Na so hadia ia ni'angadugõ, ba lõ tola lõ so sasi samaduhu'õ darua irugi datõlu niha, awena aro dania fefu hadia ia."
2Niha si no mamazõkhi hõrõ fõna, ba fefu gõi niha bõ'õ, no uhõnagõ ufangelama ira, me mõi ndra'o khõmi no si mendrua kali. Iada'a, fatua ba zarõu so ndra'o, ufuli ufangelama ami, wa na so ndra'o samuza tõ, samõsa lõ ba gotaluara zi tola aefa ba wanguhuku.
3Mi'ila dania dandra, wa sindruhu Keriso zi hede ba wehedegu andrõ. Na Keriso zamalua hadia ia ba khõmi, lõ Ilau ba wa'ombuyumbuyu, hiza i Iforoma'õ gõi kuaso-Nia khõmi.
4Duhu, me luo teforõfa Ia, ba lõ fa'abõlõ-Nia, ba iada'a no auri Ia, bõrõ wa'abõlõ Lowalangi. No sambõ fa'abõlõ gõi ndra'aga ba wa ha sambua ba khõ Keriso, ba ba watahõsa khõmi, ba abõlõ ndra'aga si fao Keriso, bõrõ wa'abõlõ Lowalangi andrõ.
5Mitandraigõ misekhegõ dõdõmi ba mifareso, hadia sindruhu sauri ami molo'õ famatimi khõ Keriso! Lõ tola lõ aboto ba dõdõmi wa Keriso Yesu no so ba khõmi! -- fabõ'õ na lõ faduhu dõdõmi.
6Ba manõtõna ndra'o wa aboto ba dõdõmi, wa ya'aga andre tenga niha si tebai manaha fanandraigõ.
7Ba mangandrõ ndra'aga khõ Lowalangi, ena'õ Itolo ami ba wa lõ mamalua si lõ atulõ. Tenga sa ba wangoroma'õ, wa ya'aga andre niha sonekhe ba wamalua halõw̃õ, no ena'õ milau hadia zomasi Lowalangi mifalua -- akha hulõ zi kala ndra'aga, lõ salania!
8Tebai malau zi lõ faudu ba zomasi Lowalangi; lõ tola lõ ma'o'õ zahulõ.
9Ebua sa dõdõma, na sambõ fa'abõlõ ndra'aga, ba na abõlõ ami. Mangandrõ ndra'aga gõi, ena'õ mo'ahonoa ami.
10Da'õ mbõrõ wa usura zura andre, ba ginõtõ lõ ya'o ba gotaluami. Bõrõ da'õ, na so ndra'o dania, lõ moguna abe'e ndra'o khõmi wangoguna'õ fa'abõlõ si no Ibe'e So'aya khõgu. No Ibe'e wa'abõlõ andrõ soguna ba wanga'azõkhi ya'ami, tenga ba wanudugõ.
11Ba baero da'õ, ya'ami ira talifusõ, ba mi'omusoi'õ dõdõmi ba mi'alui wamo'ahonoa. Mitema fefu menemenegu andre. Ya ha sara dõdõmi ba atulõ ami khõ nawõmi. Lowalangi wa'omasi andrõ, ba Lowalangi sangatulõ andrõ zi faofao khõmi.
12Faoma mi'owai nawõmi si fao fa'omasi. La'owai ami banua Niha Keriso sato fefu.
13Ya So'aya Yesu Keriso zi lõ mamalõ mamahowu'õ ya'ami, ba Lowalangi zi lõ mamalõ mangomasi'õ ya'ami, ba ya Eheha Lowalangi zi lõ tebulõ fao khõmi fefu!
14(13:13)