Alkitab Mobile SABDA
[VER] : [NIAS]     [PL]  [PB] 
 <<  2 Korintus 3 >> 

1Hadia ba zi manõ hulõ masunosuno zui ndra'aga? Hadia moguna khõma zura wamaduhu'õ sanandrõsa khõmi, ma zui si otarai ami, si mane ni'oguna'õ niha bõ'õ gõi.

2Sura wamaduhu'õma ami, nisura bakha ba dõdõma, ba si tola aboto ba dõdõ ba si tola ibaso dozi haniha.

3No la'ila wa ya'ami zi tobali sura Keriso nisurama, sura andrõ tenga taw̃a wanura ya'ia, no Eheha Lowalangi sauri; tenga gõi yaw̃a ba dete gara wanura musura, no bakha ba dõdõ niha.

4Maw̃a'õ zi mane, bõrõ wanõtõnama khõ Lowalangi soroi Keriso.

5Sambalõ lõ hadõi soroi ndra'aga zi tola mangabõlõ'õ ya'aga wangohalõwõgõigõ halõw̃õ da'e, no Lowalangi zame'e fa'abõlõ andrõ khõma.

6Ya'ia zombali'õ ya'aga tola tobali enoni ba gamabu'ula li si bohou andrõ; amabu'ula li si bohou andrõ si otarai Geheha Lowalangi, tenga ba huku si no musura. Bõrõ me mamunu zi no musura andrõ, ba mangorifi zoroi ba Geheha Lowalangi andrõ.

7Me luo tefazõkhi gamabu'ula li samunu andrõ nisura ba gara, muhaga Lowalangi andrõ ba mbawa Moze. Fondrege wa'atakile haga-Nia andrõ irege tebai latõngõ mbawa Moze soi Gizera'eli, hew̃a'ae me luo da'õ ibõrõtaigõ ahoe haga mbawa Moze. Na famazõkhi amabu'ula li samunu andrõ mulau faoma lakhõmi sebua,

8tatu famazõkhi amabu'ula li nibe'e Geheha Lowalangi andrõ gõi no abõlõ ebua wa'amolakhõminia.

9Na molakhõmi wame'e amabu'ula li sama'ala niha andrõ, tatu abõlõ molakhõmi nasa wame'e amabu'ula li si tola mangatulõ niha khõ Lowalangi.

10Tola taw̃a'õ, hadia zolakhõmi mbõrõta, no lõ molakhõmi sa'ae bõrõ wa'amolakhõmi zi so iada'a.

11Na so hadia ia zaro si lõ arara õlõnia ba wa'amolakhõmi, tatu abõlõ molakhõmi zi lõ tebulõ andrõ.

12Bõrõ me so khõma wanõtõna si mane da'õ, andrõ wa barani ndra'aga maw̃a'õ zi manõ.

13Tenga si mane Moze ndra'aga sombalugõ bawania faoma balubalu, ena'õ bõi la'ila soi Gizera'eli lakhõmi Zo'aya sarakhagõ mate ba taya ba mbawania.

14No teduhõ gera'erara. Irugi ma'õkhõ andre gõi ba no teduhõ manõ wangerangerara faoma balubalu andrõ ba ginõtõ labaso mbuku sanandrõsa ba gamabu'ula li si fõfõna andrõ. Awai tola aheta mbalubalu andrõ ha na ha sambua boto niha khõ Keriso.

15He iada'e, na labaso mbuku Moze andre, ba no manõ ibalugõ wangerangerara balubalu andrõ.

16Ba na ifuli ia samõsa niha khõ Zo'aya, awena aheta mbalubalu andrõ moroi ba mbawania.

17So'aya niw̃a'õ bada'e ba ya'ia Geheha. Ba heza so Geheha Zo'aya andrõ, ba ba da'õ gõi so wangefa.

18Ba bawada fefu iada'e lõ tebalu balubalu andrõ, taforoma'õ wa'amohaga Zo'aya Yesu andrõ. Bõrõ da'õ lõ aetu'aetu tebohouni ita si mane Ya'ia; itugu ara ita ba itugu molakhõmi ita. Fa'amolakhõmi andrõ no moroi ba Geheha, ba Eheha andrõ no So'aya.


  Share Facebook  |  Share Twitter

Download Audio MP3 (2 Korintus 3):
Mobile (Low Quality) - CD (High Quality)

 <<  2 Korintus 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel