Alkitab Mobile SABDA
[VER] : [NIAS]     [PL]  [PB] 
 <<  2 Korintus 4 >> 

1Ma'ohalõw̃õgõigõ halõw̃õ da'e si fao fanolo Lowalangi. Ya'ia zame'e halõw̃õ da'e khõma. Da'õ mbõrõ wa lõ aetu wanõtõnama.

2Lõ ma'oguna'õ lala zogõmigõmi sangailasi Lowalangi. Lõ omasi ndra'aga falimo ba wohalõw̃õma, ba ma mafaelungu niw̃a'õ Lowalangi. Mahalõ halõw̃õ andrõ si fao tõdõ safusi molo'õ somasi Lowalangi. Bõrõ da'õ madõnadõna wa lasu'a sõkhi ndra'aga fefu niha soroi ba dõdõra.

3Na Turia Somuso Dõdõ ni'ombakha'õma andrõ lõ nasa saboto ba dõdõ niha, ba ha niha sanaw̃a fa'atekiko zi lõ nasa aboto ba dõdõ ya'ia.

4Eheha si lõ sõkhi samatõrõ ulidanõ da'e zombalugõ fangerangera niha si lõ famati. Ya'ia zomba'aba'agõ ya'ira ena'õ lõ la'ila haga Duria Somuso Dõdõ sanandrõsa ba lakhõmi Keriso andrõ; si no khalakhala Lowalangi.

5Turia nifa'emama andrõ tenga turiama samõsa, no turia Yesu Keriso; wa Ya'ia Zo'aya ba ya'aga genoni bõrõ Yesu Keriso;

6Lowalangi zanguma'õ, "Ya tumbu haga moroi bakha ba zogõmigõmi," Lowalangi andrõ gõi zamatumbu'õ haga andrõ bakha ba dõdõda, ena'õ mohaga wangerangerada, afu aboto ba dõdõda lakhõmi Lowalangi andrõ si haga ba mbawa Keriso.

7Ba harato noso si sõkhi andrõ ma'ohe ia ba mbotoma si lõ harago andre nifazõkhi moroi ba danõ. Bõrõ da'õ oroma wa lakhõmi wa'abõlõ Lowalangi andrõ no so ba khõ-Nia, ba tenga moroi ba khõma.

8Fefu gofu heza ba lafakao ndra'aga, ba lõ tolazi ndra'aga, tosasa ndra'aga, ba lõ sa'atõ teduhõ dõdõma.

9La'uduni ndra'aga niha ba alukhõ sa'atõ ha samõsa ndra'aga. Ba hew̃a'ae asese labõzi ndra'aga irege alau tou ba danõ, ba lõ sa'atõ mate ndra'aga.

10Ba gofu heza so ndra'aga ba marasoi manõ wa'amate Yesu ba mbotoma, ena'õ oroma gõi wa auri Yesu ba mbotoma.

11Sagõtõ fa'aurima, lõ aetu'aetu i'alani ndra'aga fa'amate bõrõ Yesu, ena'õ oroma gõi wa'auri Yesu ba mbotoma andre si mate.

12Eluahania wa ba mbotoma andre mohalõhalõw̃õ wa'amate, ba ba mbotomi mohalõhalõw̃õ wa'auri.

13Bakha ba Mbuku Ni'amoni'õ so wanguma'õ, "No faduhu dõdõgu, da'õ mbõrõ wa humede ndra'o." Bõrõ wa'afaduhu dõdõma si manõ da'õ gõi wa humede ndra'aga.

14Manõtõna ndra'aga wa Lowalangi, si no mangorifi So'aya Yesu, da'õ gõi dania zangorifi ya'aga awõ Yesu, I'ohe ami ba ya'aga gõi tanõ fõna-Nia.

15Fefu da'õ ba soguna khõmi. Bõrõ me itugu ato niha si falukha fa'omasi Lowalangi, itugu ato gõi niha sangandrõ saohagõlõ nifa'ema khõ Lowalangi; bõrõ zi manõ tefolakhõmi Lowalangi.

16Da'õ mbõrõ wa lõ maduhõ dõdõma. Hew̃a'ae itugu tekiko ndra'aga dali mboto andre, ba tõdõma bakha tebohouni ero ma'õkhõ.

17Ba fa'abu dõdõ si lõ abõlõbõlõ andre, si falukha ndra'aga si lõ arara, ba i'a'asogõ khõma lakhõmi sebua ba si lõ aetu. Abõlõ ebua lakhõmi andrõ na tafaedogõ ia faoma fa'abu dõdõ andrõ.

18Bõrõ me nitõngõnima, ya'ia ngawalõ zi lõ oroma, ba tenga soroma. Soroma andrõ sa ba lõ arara, ba si lõ oroma andrõ ba irugi zi lõ aetu.


  Share Facebook  |  Share Twitter

Download Audio MP3 (2 Korintus 4):
Mobile (Low Quality) - CD (High Quality)

 <<  2 Korintus 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel