Dual Panel1Ba ginõtõ si lalõ ba gotalua mbanua Lowalangi no maoso zama'ele'õ sofaya. Si manõ gõi ba gotaluami maoso dania ndra samahaõ sofaya. Lafa'amõi ba dõdõ niha dania wamahaõ si lõ duhu, samakiko niha. Ba la'osilõ'õgõ Zo'aya si no manehegõ Ya'ia ba wangefa'õ ya'ira. Ba zi manõ la'a'asogõ khõra wa'atekiko si gõna ya'ira dania ba wa'alio.
2Hew̃a'ae si manõ ato niha solo'õ dania lala wa'auri zamahaõ sofaya andrõ nifatõrõ wangisõ si lõ sõkhi. Ba nilau ndra samahaõ sofaya andrõ ato niha dania sango'aya Lala Sindruhu andrõ nibe'e Lowalangi.
3Ba bõrõ wa'omasira gana'a, ladunõdunõ ira samahaõ sofaya andrõ dania khõmi manõmanõ nifakhaikhai dõdõra samõsa ba wanõndra hare moroi khõmi. Ba fanguhuku si gõna ya'ira no ara tefa'anõ, ba fa'atekiko si no muhonogõi khõra no ibazebaze'õ ira.
4Mala'ika si no mamazõkhi horõ, lõ itehegõ Lowalangi aefa ira moroi ba huku, ba Itibo'õ bakha ba narako. Labe'e ira bakha ba naha sogõmigõmi ba nitaha ira ba da'õ irugi Luo Wanguhuku.
5Si manõ gõi gulidanõ ba ginõtõ fõna; lõ Itehegõ manõ Lowalangi aefa moroi ba huku. Ifatõrõ molõ sebua Lowalangi ba gulidanõ ni'iagõ niha si lõ aboto ba dõdõ khõ Lowalangi ba ginõtõ da'õ. Ha Noakhi fao awõ zi dafitu niha tanõ bõ'õnia ni'orifi, bõrõ me no ituriaigõ Noakhi duria sanandrõsa ba wa'auri si faudu ba dõdõ Lowalangi.
6Fagõlõ ira mbanua Zodoma ba Gomora: Ifakiko mbanua andrõ Lowalangi faoma alitõ ba wombali'õ dumaduma ba zanandrõsa hadia ia zalua ba niha si lõ aboto ba dõdõ Lowalangi.
7Ba no I'orifi Loti, bõrõ me i'o'õ zomasi Lowalangi, ba no tefakao sibai ia bõrõ gamuata si lõ sõkhi moroi ba niha si lõ mangata'ufi huku.
8Ba gotalua niha si manõ auri Loti si sõkhi amuata andrõ, ba tefakao sibai gera'era dõdõnia, me ero ma'õkhõ i'ila awõ wa irongo nilaura si lõ sõkhi.
9Tobali, I'ila So'aya hewisa wangorifi niha solo'õ somasi Ia ba falukha ira wanandraigõ. Ba I'ila So'aya hewisa wangirõ'õ niha si lõ sõkhi nifakao dania ba Luo Wanguhuku,
10ba ofõna ba niha sanõrõ lala nõsi niha ba wangisõ sira'ira'iõ ba sangositengagõ fa'abõlõ Lowalangi. Fondrege wa lõ aiw̃õ ba fa'asilõyaw̃a zamahaõ sofaya andrõ irege lõ ada'uda'u ira wango'aya zo noso solakhõmi andrõ ba zorugo!
11Mala'ika na'i, sabõlõ tohude fa'abe'e ba fa'abõlõ moroi ba zamahaõ sofaya andrõ, lõ latandraw̃aisi zo noso solakhõmi andrõ ba zorugo.
12Ba hiza zamahaõ sofaya andrõ ahõli dõdõda! Hulõ gurifõ si tumbu ena'õ lara'u ba labunu. Lõ fangerangerara, lafalua nilaura molo'õ somasi dõdõra manõ irege ngawalõ zi lõ aboto ba dõdõra la'uduni faoma fehede fango'aya. Bõrõ da'õ ba nilaura samõsa, tekiko dania ira si mane urifõ samu'i.
13Si tobali fanegura ba wamakao nifobõrõra, lataõgõ wamakao dania. Molo'õ ya'ira sangomusoi'õ tõdõ ya'ia wamalua hadia ia manõ ba zi ma'õkhõ soguna ba wamõnui somasi nõsira. Na dumadao ira awõmi ba gowuloa wemanga, ba hulõ zi ta'unõ ba si ra'iõ ira bõrõ me mabumabu ira, ba ngawalõ nifaluara si mõi fangaila.
14Bõrõ me lõ awõliwõli ira wamazõkhi horõ, ba somasi ira ya'ia wamaigimaigi ira alawe sohorõ. Ba ladõnisi niha sambõ famati. Tõdõra ba no to'õlõ ba wangisõ si lõ sõkhi. Ya'ira ba no niha ni'elifi!
15Me lõ omasi ira wanõrõ lala sadõlõ, andrõ elungu ira. No latõrõ lala Mbileamo ono Mbe'oro fõna. Omasi sibai Mbileamo andre wanõndra ana'a moroi ba wolaunia si lõ sõkhi.
16Ba no isõndra wamangelama sabe'e ba wa lõ sõkhinia andrõ, me kalidenia si lõ mangila muhede andrõ, tola fahuhuo ba li niha. Ba tetenaw̃a zama'ele'õ andrõ, ba wa lõ tõdõ.
17Ira samahaõ sofaya andrõ no si mane umbu nidanõ sotufo ba si mane lawuo ni'oloi'õ nangi sabõlõ. No Ihõnagõ Lowalangi khõra sambua naha sogõmigõmi sibai.
18Ba lalau gangombakhata si lõ õsi; hokha fangisõ la'oguna'õ ba wama'ala niha si bohou mu'efa'õ moroi ba lala elungu.
19Ira samahaõ sofaya andrõ lafabu'u wangefa'õ ba niha, ba ya'ira samõsa sa no ni'osawuyu mbuabua si to'õlõ samakiko niha. Bõrõ me niha si no i'alani hadia ia, tobali sawuyu zangalani ya'ia andrõ.
20No aefa niha moroi ba wa'abõlõ gulidanõ samakiko niha bõrõ me aboto ba dõdõnia Zo'aya ba Razo Sangorifi ya'ita Yesu Keriso. Ba na aefa da'õ te'u'u ia zui irege i'alani ia fa'abõlõ gulidanõ andrõ, ba abõlõ lõ sõkhi niha andrõ ba gamozuania moroi ba zi fõfõna.
21Abõlõ sõkhi niha si mane da'õ lõ irai aboto ba dõdõra lala sindruhu moroi khõ Lowalangi, moroi na no aboto ba dõdõra, ba aefa da'õ lõ omasi la'o'õ goroisa nibe'e Lowalangi khõra.
22Hadia ia nilaura faudu sibai ba gamaedola andre, "Asu samuli manga hadia ia zi no i'uta'õ," ba "Bawi si no mufemondri, samuli mamagaõlõ ya'ia ba getuna."