Alkitab Mobile SABDA
[VER] : [NIAS]     [PL]  [PB] 
 <<  2 Tesalonika 3 >> 

1Afuriata, ya'ami ira talifusõ, mi'angandrõ salahima. Ba mi'angandrõ ena'õ turia si otarai Zo'aya andrõ alio terongo misa ba mutema'õ sõkhi ia, si mane si no alua ba khõmi fõna.

2Mi'angandrõ gõi ena'õ I'efa'õ ndra'aga Lowalangi moroi ba niha safaito awõ niha si lõ sõkhi. Bõrõ me lõ fefu mamati niha ba duria soroi Zo'aya andrõ.

3Ba lõ sa farõi Zo'aya. Ya'ia dania zangabe'e ya'ami ba sondrorogõ ya'ami moroi ba Niha si Lõ Sõkhi.

4Ba afõnu manõtõnaga khõ Zo'aya ba khõmi andrõ, wa lõ mo'aetufa mifalua ba mi'o'õ hadia zi no ma'o'ou ya'ami.

5Ba ya So'aya zondrõnia'õ ya'ami ba wa'aboto ba dõdõ wa I'omasi'õ sibai ami Lowalangi, awõ wa Ibe'e khõmi wanaha tõdõ Keriso.

6Ya'ami ira talifusõ, ba wa'abõlõ Zo'aya Yesu Keriso mafaretaikõ ami ena'õ mifabali ami ba niha sareu, ba si lõ molo'õ famahaõ andrõ si no mabe'e khõra.

7Mi'ila samõsa wa lõ tola lõ mi'o'õ khõma. Lõ sareu ndra'aga me luo so ndra'aga khõmi.

8Lõ ni'ama õ si lõ nibe'ema bõli. Ba zi tambai da'õ bongi ma'õkhõ maforege wohalõw̃õ, ena'õ bõi mabusi dõdõ gofu haniha ba khõmi.

9Tenga bõrõ wa lõ tola ma'andrõ ena'õ mitolo ndra'aga wa malau da'õ, ba hiza i, me omasi ndra'aga tobali dumaduma khõmi.

10Me so nasa ndra'aga ba khõmi, no mabe'e gamakhoita da'e, "Niha si lõ omasi mohalõw̃õ, ba tebai manga."

11Maw̃a'õ da'e bõrõ me marongo, wa so õsa ba gotaluami zareu. Larõrõ ira ba wamadunõdunõ halõw̃õ niha bõ'õ, ba lõ sa sambua halõw̃õ lababaya.

12Ba wa'abõlõ Zo'aya Yesu Keriso, mafaretaikõ niha andrõ ba mafangelama ira, ena'õ mohalõw̃õ ira ba la'alui samõsa mbalazora.

13Ba hew̃a'ae si manõ, ya'ami ira talifusõ, bõi atage ami wolau si sõkhi.

14Ma so dania niha si lõ omasi molo'õ hadia zi no maw̃a'õ bakha ba zura andre. Na alua da'õ ba mi'angelama ba niha si manõ ba bõi mifariawõ khõnia, ena'õ aila ia.

15Ba bõi hulõ zi fa'udu ami khõnia; mi'amenesi ia si mane talifusõ.

16Khõ Zo'aya i'otarai fangorifida. Ba ya lõ mamalõmalõ Ibe'e khõmi wa'ohahau dõdõ ba ngawalõ hadia ia fefu. Ya So'aya zango'awõgõ ya'ami fefu.

17Fangowaigu, Faulo. Ya'o samõsa zanura faosatõ da'e. Da'e dandra nibe'egu ba zuragu fefu.

18Ba ya So'aya ya'ita Yesu Keriso zamahowu'õ ya'ami fefu.


  Share Facebook  |  Share Twitter

Download Audio MP3 (2 Tesalonika 3):
Mobile (Low Quality) - CD (High Quality)

 <<  2 Tesalonika 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel